Esaie 19 - Ma Zhiklè

Egypte

¹ Nhèdè ma a géɗ Egypte. Na haha, Ndo nzi pèc pècèk a shkè a géɗ vanai man kozlar a hèdèʼa, a dè a kokwar Egypte. Vrihi Egypte ta gudzai a sam nengaʼa, a ndav ndohi Egypte a mʼmbeɗ na.

² I woya a i pa ta gèɗ a va a ndohi Egypte, ngiɗè a ngiɗè, ngiɗè a ngiɗè; staɗ a bèzlè va a ngiɗè, nslamagi ngiɗè a nslamagi ngiɗè, kokwar a kokwar ngiɗè, kokwar-bi a kokwar-bi ngiɗè.

³ A i dzakaɓama ta mèzhèɓ te ndav ta, a maya te gèɗ, a ta dè a ta mbèh skwi te gi ngwozla, a ta gèɗ vrai, a ta pi kwa.

⁴ A i woya a i va ta ndohi Egypte a ri a bi man mwuɗitpa, bi man a ga ta shèwa, a da kwor ta, Bi Zhiklè bi mbiaʼa a gaɗa.

⁵ Iyam te woyam Nil a da she na, iyam a gwor na kusalaʼa.

⁶ Te wurrai, skwi a zhkè te pa. Te woyam, iyam a skwi man te pa, a gwor na. Gozlolo a cénjèra ta gwor ta a pa.

⁷ Sliɗèu a skwi man ta zlekau a ma woyam Nil tèlèba ta gwor ta, a kozlar a heldama, a njèka skwi a pa ɓai.

⁸ Ndohi mpèr klèf ta da kuɗai, ta lèyèʼa, ta tèlèba man ta wusheda jir a woyam Nil. A tengaʼa man ta wusheda lata ta a iyam, ta hér gèɗ.

⁹ Ndohi ntsi gogumai ta ngècè hori a dai. Ndohi mʼmin gogumai a ndohi ntsi maslaka ta gi zlau.

¹⁰ Ndohi ntsi maslaka ta nza, ri a bazlazlam. Ndohi mizlinè tengaʼa ta kuɗi te ndav.

¹¹ Bihi Tsoan, ndohi nrzla a vava. Ndohi maya Pharaon, man maya ta a zhè, ta nde ta a madaɗauhai. Kin slaha kin gaɗa na Pharaon: iyè, i kra ndo maya; iyè, verzi ga verzi ɓai daga halaʼa, za ɗè?

¹² Ndohi maya ngaya ta tema? Sèi ta ngra ka skwi man Zhiklè bi mbiaʼa a nhur a géɗ Egypte.

¹³ Bihi Tsoan ta rzla; bihi Noph, ndo ngiɗè a nʼngwode ta. Mbibihia nengaʼa ta zede kokwar Egypte.

¹⁴ Ndo nzi pèc pècèk a nzlinda mèzheɓ ndzakaɓama ta gèɗ a ndohai a kokwar Egypte. Ta zede Egypte te skwi tèlèba man a giaʼa, ara ndo zom man di nciɗ ɓai, a vinèhè.

¹⁵ Egypte a slaha man a ndikeda na gèɗ a skwi azɓai; mizlinè a nhün te verziaʼa ɓai, a nʼndikeda géɗèʼa ɓai: gonokwaɗ ba azɓai, sliɗèu ba azɓai.

¹⁶ A pats nasa, ndohi Egypte ta ara ngwozihai; ta gi zlau, ta gudzai.

¹⁷ Kokwar Juda a da pa ta zlau a gèɗ a ndohi Egypte. Ko wawa man ta slefi ma Ndo nzi pèc pècèk a sam na, a gi zlau a géɗ skwi man Zhiklè a nhur a da giaʼa.

¹⁸ A pats nasa, kokwar zlam te kokwar Egypte ta da gèɗè daʼai Canaan, a ta mbèɗè a ta vi va ta a ri Zhiklè bi mbiaʼa. Staɗ, nzlembaɗ na Ir-Harèhès (kokwar ngedassaʼa).

¹⁹ A pats nasa sam mvi skwi a Zhiklè a zhè te ndev kokwar Egypte, a kwa nzlatseda a Ndo nzi pèc pècèk a ma kuma tengaʼa.

²⁰ A nengaʼa a gi a skwi mal-wuɗai, a ngrédè skwi Ndo nzi pèc pècèk auda te kokwar Egypte. Aman ta kuɗi a sam Zhiklè a géɗ ndohi nʼnga ta mata-kwan, nengaʼa a da zlindeka ta ndo nta-kaha ta. Nengaʼa a da pre ta auda.

²¹ Ndo nzi pèc pècèk a gi a ndohi Egypte ta shi-nèʼa. A pats nasa ndohi Egypte ta da sun Zhiklè. Ta da slébèrdèʼa a skwi man ta zla na, a skwi man ta va na, a ta da gaɗda ma a hi a sam na, a ta gi arsa.

²² Ndo nzi pèc pècèk a da tse ta ndohi Egypte; a da tse ta, aman a da mbel ta zaʼa. A ta menkaɗa deɓa a sam Ndo nzi pèc pècèk, a nengaʼa a cè ma tengaʼa, a mbel ta.

²³ A pats nasa, civèɗ te kokwar Egypte ndè a kokwar Assyrie mʼmbazla. Ndo Assyrie a dè a kokwar Egypte, a ndo Egypte a dè a kokwar Assyrie, a ndohi Egypte ta da slébèrdè Ndo nzi pèc pècèk a nda ndohi Assyrie.

²⁴ A pats nasa Israel kokwar mamakaraʼa man ta derzla ma ta a ndohi Egypte, a ndohi Assyrie. Israel a ndi a skwi mpshè ma a géɗ herkeda te ndevaʼa,

²⁵ man Ndo nzi pèc pècèk a pshè na ma, a ngaɗa: I pshè na ma a kokwar Egypte, ndohi ga, a Assyrie, skwi man ri ga a ngau, a Israel, skwi nʼndi gi ga.