Esaie 18 - Ma Zhiklè

Ethiopie

¹ Wobau a géɗ kokwar te wud woyam Ethiopie! Skwi man a gidè te pa a gi ngulam-gulamaʼa.

² Kokwar man a zlinde ta ndohi a wurom a géɗ iyam. Vodo, kinè ndohi nciɗèʼa, a sam ndohi ngur-gurhiaʼa ntevaʼa, a sam ndohi herkeɗa man ko ahngwa ahngwa ta gi zlau ta, a sam ndohi nkurslaslaʼa nsal-salaʼa, man woyam tsaɗ tsaɗ a bèzlè ndev kokwar ta.

³ Kin tèlèba man kin nzi a géɗ herkeda, man kinè a zhè a géɗ herkeda: Aman ta da zlatseda lamba a géɗ za, va-pu dai! Aman ta da tsi tolom, va-tsenaʼa!

⁴ Aman Ndo nzi pèc pècèk a ngaɗayè aranta: A sam man i zhè a pa, i nza ga nshèffaʼa, a i pi dai, ara pats a vècè, ara minmèn man a gi te ndev ntsi dau.

⁵ Aman ga skwi a slai, aman nwurzhè a wush na ma, wof mpa ma, i zli ntsatseri auda a gwodza, i sliɗè ri wof, i ngélèʼa.

⁶ I jèke ta a ri paramagerzihai a skwi dak tè-lèba, ko ngwar, ko via, ta nzi a pa.

⁷ A pats nasa ndohi ngur-gurhiaʼa ntevaʼa, ndohi man ko ahngwa ahngwa ta gi zlau tengaʼa, ndohi nkurslaslaʼa nsalsalaʼa, man woyam tsaɗ tsaɗ a bèzlè kokwar ta, ta da cko na skwi mbalai a Zhiklè bi mbiaʼa, a za Sion, a sam man ta bèhè nzlembaɗ Zhiklè bi mbiaʼa.