Esaie 17 - Ma Zhiklè

Damas

¹ Nhèdè ma a géɗ Damas. Damas ngi dè a ma ma kokwar mbiaʼa asakaɓai. Kokwar na mʼmbeɗ na.

² Ndohi ta jèkeda kokwarhi Aroer, a ta ndi a sam nwèr skwai. Skwi a mènè a pa, ndo a dzar ta azɓai.

³ Zlazlar kokwar bi Ephraim mʼmbeɗ na. Kokwar bi Damas klèng. Njèkèɗiaʼa te Syrie a da ngècè nʼnjèl lèmèlèmè ara ndohi Israel, Zhiklè bi mbiaʼa a gaɗa.

Israel

⁴ A pats nasa, nʼnjèl Jacob a gi a nkèshèʼa. Va nengaʼa ndaɓaraʼa sa, a gwèr na.

⁵ A gi ara man ndo ntsi dau a gshè dau, a tsiaʼa; a gi ara man ta pèr iyamaʼa tʼhai a dal Rephaim.

⁶ Ta jèkaha slèw-slèw kata, ara man ta kèldè nyi wof: cèw, makar, te ndev géɗèʼa, faɗ, zlam, te civèɗ ri wof ngiɗè, Ndo nzi pèc pècèk, Zhiklè Israel, a gaɗa.

⁷ A pats nasa ndo a da pi di a Zhiklè nʼngau, a war Zhiklè Israel nkezlaʼa.

⁸ A pi di a vri man ri nengaʼa a ngau, a skwi man ri nengaʼa nroma, asaɓai, a woy skwi mbèh skwai a kwa man ta zlatseda a mblom asaɓai.

⁹ A pats nasa ta jèkeɗa samaʼa, ara sam mʼmbèh skwai a vrai man ndohi Hevi a Amor ta jèkeda man ta hu ta a ndohi Israel. Sam tèlèba hèshèkèɗ genè.

¹⁰ Aman Zhiklè, man a mbel ka, mpca ka a gèɗ. Za man ka slaha ka nghédè va a pa, ka hera ɓai. Gar haha ka gi gi lak a zhiklè mbèh skwi ngaya, a ka geda wof zhiklè mbèh skwi ngiɗè a pa.

¹¹ A pats man ka ngiaʼa, ka grèʼa; a prèk man ka ngiaʼa, a wurzhè ma, aman ka ɓicè skwi azɓai, te ri matakwan man madzaf nengaʼa azɓai.

¹² Hai, wobau! Nrubai ndohi herkeda kumba! A cinè ara iyam mbiaʼa man a hai.

¹³ Nhèzlèwè ndohi herkeda mbiaʼa, a cinè ara iyam mbiaʼa man a hai. Ta hèzlèwè ara iyam mbiaʼa. Aman Zhiklè a guv ta, a dzar ta ara kozlar man a hil koskosai a géɗ za, ara ndombozlor man a tsi lokotor.

¹⁴ A pats dakwaɗ, zlau var a dza ta. Aman a prèk, ndohi ta asaɓai. Na haha skwi man ndohi ngedasse nga ta ngècèʼa, a skwi man a ga ta ndohi man ta gi metsar a sam nga.