Esaie 16 - Ma Zhiklè

¹ Va-zlinda na tambakihi a bi kokwar, a hinè te Séla, tʼhèshèkèɗ, a ndè a za kokwar Sion.

² Dalahi Moab ta zhè a dzah woyam Arnon, ara ɗiakihi man ta dzam ta te gi ta, a ta zhèwèlè diaʼa.

³ Ngatsa nga maya, ngra nga skwi man nga giaʼa, ngwoda géɗ pats a ruva, nghe-da ndohi man ta ksar ta, ka ga ta ri a gèɗ a ndohi man ta hu ta ɓai!

⁴ Da pe ta ndohi man ta hu ta a gai! Gau sam man ta nzi a hwaɗaʼa, a ndo ngedas ta da ngats ta ɓai. Aman ndo nʼngi matakwan klèng, matakwan klèng. Ndohi ngedassa kokwar ta ka! ta.

⁵ Pombai a va na wuɗi a sam nʼnzi ɓai, a ndo kita nlèɓèslèʼa nzuraʼa a nzi a pa, te gi David.

⁶ Nga tsena ma Moab, a fi va, a fi va kumba, a jégèr va, a grè gèɗ, a gi massayaf, a fu va a deɓa gene.

⁷ A géɗ nengaʼa ndohi Moab ta kuɗai a géɗ va ta, ta kuɗi tèlèba. Ta kuɗi diki Kir-Haréseth, a leyde ta.

⁸ Aman gi lak Hesbon ngwora, wof barassa te Sib-ma, man nyi nengaʼa mbelaʼa a vitka ta bihi herkeda, gi lak man a dè dra ha Jaezer, a wurde na a deɓa ha ndè hèshèkèɗ, a hérdèʼa a hérdèʼa a sam woyam mbiaʼa.

⁹ A géɗ nengaʼa i kuɗai a géɗ wof barassa te Sibma, a nda ndohi Jaezer. Hesbon a Elealé i pan kinè a kuɗ ga; te man a géɗ nyi wof ngaya, a géɗ man ta para nyi wof ngaya, mayamhi ta tsi sabi a géɗèʼa.

¹⁰ Mwuffè a nʼngwèshè te gi lak klèng. Ta bèhèdè daʼai a ta wuffè te gi lak asaɓai, a ta kèlè nyi barassa te skwi nkèl nyi wof asaɓai, ta wuffè te pa asaɓai.

¹¹ A géɗ nengaʼa va ga a ndav ga njingnjingaʼa ara mar ganzavar, a géɗ Moab a Kir-Harès.

¹² Te deɓaʼa, man Moab a ngeza va na a sam te géɗèʼa, a dè a sam ntsi ri nengaʼa, a ngècè skwa azɓai.

¹³ Ma haha Ndo nzi pèc pècèk a goɗ a géɗ Moab halaʼa.

¹⁴ Aman anai Ndo nzi pèc pècèk a goɗ aranta: Njèkè mvi makar dai, ara mvi sojè, a nʼnjèl Moab a gédèsh na, a ndohi nengaʼa rèdèdèʼa tèlèba. Njèkèɗia az a vata ɓai, ndohi ambali kèshka-ta genè.