Esaie 13 - Ma Zhiklè

Babylone ngedas na

¹ Skwi man a da gi a ma, man a rka na di a Esaie, kra Amots, a géɗ Babylone.

² Va-zlatseda lamba a géɗ za kurn-dazlndazlaʼa. Vo-boho a wuɗai! Va-kutèka ta rai, a ta bizhè a pa, a ntamagi ndohi mbibihiaʼa.

³ Iyè, i baha ta ndohi man i pe taa mizlinè, a tagi kita. I bahata ngul ndohai, man ta wuffè a géɗ nʼnjèl-bi ga.

⁴ Tsena dakwa! Nhèzlèwè te za ara nhè-zlèwè ndohi var kumba. Tsena ɗakwa! Ara nrubai kokwar-bihai a ndohi herkeda mɓicaʼa! Zhiklè bi mbiaʼa a par ta ndohi var.

⁵ Ta shkè te kokwar dra, te man a verzi gai, Ndo nzi pèc pècèk a ndohi var nengaʼa, a ta gédèshè nerkeda tèlèba.

⁶ Va-kuɗau! Aman pats kita Ndo nzi pèc pècèk a zhè ndul ndul, a shkè a ngé-dèshè ndo, a wuɗi nengaʼa, Bi wuɗai.

⁷ A wushedama ta rai, tèlèba ndav ta a mbeɗè.

⁸ Zlau a gs ta, ta ɓerzl ta, a ta ɗish va, ara ngwoz man a yi kra. Ngiɗè a pi di kurzlaʼa a ngiɗè, a vazaza a di sreffsreffaʼa.

⁹ Na haha, pats kita Ndo nzi pèc pècèk a shkè, wuɗitpa, a ndzoan, a ndav mbiaʼa, a ngwèdè herkeda a hèshèkèɗ, a ndeva malihai a géɗ herkeda.

¹⁰ Bantihai te giɗfèk a ntèkocèk ba ta hél sam asaɓai. Pats a shkè auda, a hél sam asaɓai, kia ba a hél sam asaɓai.

¹¹ I woy a herkeda a mpela mali na, a ndohi man ta woy Zhiklè ɓai ta pil skwi tengaʼa ambaɓiaʼa. I woya a i ndeva njégèr va ndohi nfi va, a i mbatsa massayaf ndohi mbibihiaʼa.

¹² I gi a ndohi ta nzi staɗ staɗ ara guro ndaɓalaʼa, a ndohi man a nshèffè ta nzi staɗ staɗ ara guro nshfaʼa.

¹³ A géɗ nengaʼa giɗfèk a da gudzai, a herkeda a da gi zlau a samaʼa, a sam ndzoan Zhiklè bi mbiaʼa, a pats ngi ndav nengaʼa man a vècè ara vogwa.

¹⁴ Ara mènèɗ man skwi ngiɗè a pra na zlau a va, ara tambakihi man ndo a ɓic ta azɓai, ndo staɗ staɗ tèlèba a da woy ndohi na, a ta hi a deɓa a ko-kwar bab ta.

¹⁵ Ndohi man ta ngats ta, ta tez ta a gwèsh. Ko wawa man ta gshèʼa, ta kéɗèʼa a tsakwal.

¹⁶ Ta tseda ta gèɗ a wudahi a sam di ta, ta helama ta skwi a metsar te gai, ta kala ta va a ngwozi tengaʼa.

¹⁷ Na haha i poko ta gèɗ auda a ndohi Mèdes, man ta fa na gèɗ a verzhègenè a guro azɓai.

¹⁸ Ta ɓàr ta golahi a lèkèɗ. Wud ndohai, ko kra nkèshèʼa, ta jèkè azɓai, ta se ta te va azɓai.

¹⁹ Skwi haha a da gi te Babylone, kokwar-bi man a fena kokwar-bihi ngiɗè tèlèba. Nʼnjèlè man ndohi Chaldée ta fi va a vna, a da gi lèmèlèmè ara Sodome a Gomorrhe, man Zhiklè a ngedas ta.

²⁰ A mèdèp ndo a da gi gi te pa azɓai, a ndohi te verzi verzi ndohai ta nzi a pa azɓai. Ndohi Arabes ta gi gi a pa azɓai, a ndohi nwèr skwai ta lè ta skwihi a pa azɓai.

²¹ Sèi skwi dak a nzi te pa. A gihi tengaʼa, zhèrèu a hayda va a pa, a madzagihi ta tsi mɓarwasl te pa.

²² Kda dak a bkwè te gi ɓai, nvalaval a kuɗi te gi man ndohi ta gots te pa. Pats ndikèmaʼa kalka ma, ta mènè a vata azɓai.