Esaie 12 - Ma Zhiklè

Dimèsh nshid gèɗ

¹ A pats nasa ka da gada: Ndo nzi pèc pècèk, i shida ka gèɗ! Ka gu ndav a géɗ ga, te deɓaʼa ka jèkeda ngi ndav, a ka bidyè.

² Na haha Zhiklè man a mbelyè. I pi ndav ga a nengaʼa, i hér gèɗ zlau asaɓai. Ndo nzi pèc pècèk, nengaʼa wuɗi ga, a dimèsh ga! Nengaʼa nʼngaʼa a skwi mbelyè.

³ Kin da géj iyam te nlèlè mʼmbel ndo a mwuffè.

⁴ Kin tèlèba kin da gada a pats nasa: Va-shida na gèɗ a Ndo nzi pèc pècèk, va-slubordo nzlembaɗ nengaʼa, va-ngreda skwi man a ga ta ndohi a géɗ herkeda, va-ngreda nzlembaɗ nengaʼa nʼnzalaʼa!

⁵ Va-slu dimèsh nslébèrdè Ndo nzi pèc pècèk! Aman nengaʼa a ngau nrkedi mbiaʼa. Herkeda tèlèba da suna!

⁶ Va-hazlawa a mwuffè, ndohi te Sion! Aman Zhiklè Israel nkezlaʼa, nengaʼa a zhè te ndev kinè, mbiaʼa.