Esaie 10 - Ma Zhiklè

¹ Wobau a gèɗ ndohi man ta gèɗè ma kita ncèkèlma, a gèɗ ndohi man ta windè ma nkwèr mwuɗitpa pèc pècèk,

² man ta fi zlembaɗ a kita ndohi ntawas-saʼa azɓai, a ta cèma ta skwi a ndohi nta-wassaʼa te kita, ta ngwode ta ngwozi ma-zihai, a ta gi metsar a sam wud dikai.

³ Kin woy a kin gi mè a pats kita man a di a shkè? Iyam mʼmonko va! Kin woya a kin hi a ma? Nda takaha kinè wa?

⁴ Ngidè a dè dangai, ngiɗè ta keɗaʼa. Ko ar haha, Zhiklè a gi ndav di genè, a ngeda ri na genè.

Zhiklè a gi mizlinè a Assyrie

⁵ Wobau a géɗ ndohi Assyrie! I fu a gada mbèzl va ga, a mènèwèd man i ndèh ndohi a vna.

⁶ I hilèʼa, a i ndèhè ndohi mphö-mè a vna. I zlindèʼa a sam ndohi herkeda man i gi ndav a géɗ tengaʼa, a da düm skwi te pa, a gi metsar te pa, am batsaha ta a civèɗ ara koskosai.

⁷ Aman Assyrie a nhera te gèɗ arsa ɓai, a woya te ndav arsa ɓai; aman a nhur a ngedas ta ndohi herkeɗa klèk, kètè genè ka ɓai.

⁸ Aman a gaɗa: Ndohi ngra-grahiaʼa bihi tèlè ka ɓi ɗè?

⁹ Calno ara Carkemish ka ɓi ɗè? Hamath ara Arpad ka ɓi ɗè? Samarie ara Damas ka ɓi ɗè?

¹⁰ Skwi man ri ga a ngau a sam kokwar-bihai, man vrihi kumba te pa, a fena kokwar Jérusalem a Samarie;

¹¹ a i gi a sam kokwar Jérusalem a vrihi nengaʼa lèmèlèmè ara man i gu a sam Samarie a mbèh skwi nengaʼa ka ɓi ɗè?

Kira a géɗ bi Assyrie

¹² Aman Bi Zhiklè a da ndeva mizlinè nengaʼa te za Sion, te kokwar Jérusalem tèlèba ma, a pats nasa a da ga na kita a gèɗ a bi Assyrie, a géɗ nfi va a njégèr va nengaʼa tèlèba.

¹³ Aman nengaʼa a ngaɗa: I gau a wuɗi ri ga, a maya ga: iyè, i ndo maya. I herdaha kuma ndohi a pa, i hul skwi mèshèlè tengaʼa, i koldoko ta bihi auda ara ngul-ndo.

¹⁴ Ri ga a nhul skwi mèshèlè ndohai, ara man a pèr gi ɗiaki-hai, a i ceda herkeda a ma, ara man ta hil slaslai man ɗiak a njèkeda a pa. Ngidè kelpasl azɓai, ntsi daʼai azɓai.

¹⁵ Dzana a fi va a géɗ ndo man a ngél skwi a vna ɗè? Skwi ncizl wof a grè gèɗ a sam ndo man a cìzlè skwi a vna ɗè? Mè, mènèwèd a ngwèdè va a gèɗ a ndo ngshè ɗè? Gada a ngwèdè va a gèɗ a ndo ntsi ndo ɗè?

¹⁶ Gar haha Bi Zhiklè bi mbiaʼa a ga na matakwan a va ndo, a sama na pombaz auda te va; nʼnjèl nengaʼa, a pa na vogwa a va, ara vogwa man a vècè.

¹⁷ Skwi nhél sam Israel a ndi a vogwa, Zhiklè nengaʼa nkezlaʼa a ndi a nèʼèn vogwa. Nengaʼa a da vècè, a ndi vatak a nkuddzari a pats staɗ.

¹⁸ A da gedassa sam mbelaʼa man wof nhaya a pa, a gi lak, a deɓa ba, tʼhwaɗaʼa ba, gedam tèlèba. A da gi lèmèlèmè ara ndo matakwan man a hezhèkaʼa.

¹⁹ Njèkèɗi wof a sam wof nhayaʼa a gi faɗkata, kra nkèshèʼa a slaha a ngrèʼa, a mwindèʼa.

Ndohi man ta thè va a Zhiklè

²⁰ A pats nasa njèkèɗi ndohi Israel, a njèkèɗi ndohi Jacob man ta wuc ta, a ta nzi a nshèffè, ta thè va a nengaʼa man a bazl ta azɓai, aman ta da thè va a Ndo nzi pèc pècèk a vava, Zhiklè Israel nkezlaʼa.

²¹ Njèkèɗi ndohi kètè, ndohi gi Jacob, ta da menkaɗa deɓa a sam Zhiklè wuɗai.

²² Israel, ko ndohi ngaya ta mènè a vata, ara wyak a ma woyam, njèkè kèshkata genè ta da menkaɗa deɓa. Zhiklè a mba-sla gèɗ a woy a ngedas ta. Nasa kita nzuraʼa.

²³ A géɗ ngédèsh ta, a géɗ pats man a da gedas ta, Zhiklè a nhuro nengaʼa a géɗ herkeda tèlèba.

Zhiklè a takaha ta ndohi na

²⁴ Gar haha Bi Zhiklè bi mbiaʼa a goɗ aranta: Ndohi ga, man kinè a zhè te Sion, kin gu zlau ndohi Assyrie ɓai, man ta tse kinè a gada, ta slambaɗdaha kinè mènèwèd, lèmèlèmè ara ndohi Egypte ta gau halaʼa.

²⁵ Njèkè kèshkata, ndzoan nengaʼa klèng. Ndzoan ga a di a gedas ta.

²⁶ Zhiklè bi mbiaʼa a da vitè ta mènèwèd a gèɗ ara halaʼa man a mbazl ta ndohi Madian a sam za Oreb, a nslambaɗda gada nengaʼa a géɗ woyam mbiaʼa, lèmèlèmè ara man a gau a géɗ kokwar Egypte.

²⁷ A pats nasa skwi nʼnzala ka a deɓa, a dè auda a deɓ ngaya. Wof te daʼai ngaya a kelèwè auda.

²⁸ Ndohi man ta shkè a ta beza a ndev Migron, ta kala ta a va a ndohi Aijath, ta jèkeda kolongwi a Micmash.

²⁹ Ta beza a slrats. ‘Nga da mènè a Gué-ba!’ Rama a gudzai, Guibea Saul a hi na.

³⁰ Bath-Gallim, tsu lalau! Lais, tsenaʼa! Anathoth, mbeɗa na a ma!

³¹ Madména a mhu na, ndohi Guébim ta woy sam nghédè va.

³² A patsna ba a zhè te Nob, a kutèka na ri a di a za a kokwar Sion, a di a za Jérusalem.

³³ Na haha, Bi Zhiklè bi mbiaʼa a ncizlè gèɗ wof a ntsi iyam, a wof man a grè a zhiklè kumba, a ngeldahai, a ngelaha mbibihiaʼa.

³⁴ A ɗècè wof a dzana, a Liban a kèlè te ri ndo wuɗai.