Esaie 1 - Ma Zhiklè

Juda a jèkeda Zhiklè

¹ Skwi man a da gi a ma te Juda a Jérusalem, man a rka na di a Esaie, kra Amots, te va man Ozias, Jotham, Achaz, Ezéchias, bihi Juda.

² Kin giɗfèkihai, vatsenaʼa! Herkeda, fu zlembaɗ! Aman Ndo nzi pèc pècèk a gèɗè: I gra wudahai, a ta ge ta a mbiaʼa, a ta kwolyè.

³ Marai a sun ndo mʼmono, a kɗèh a sun gi bab na. Aman Israel a senyè ɓai; ndohi ga, maya ta azɓai.

⁴ Wobau a géɗ ndohi kokwar haha man ta gi malai, man mali a ntsama ta va a gèɗ, verzi ndohi malihai, wudahi man ta gi mèdègèɗ! Ta jèkeda Ndo nzi pèc pècèk, ta kwola Zhiklè Israel nkezlaʼa, a ta ngwoda na deɓa.

⁵ Sam man ta ndah kinè a pa di ɓai, a za zhi ɗè? Kinè man kin dè a ma ma te shèwa? Gèɗ kinè tèlèba a dzaha kinè; ndav kinè, ntulè keɗaʼa,

⁶ a hinè tʼhwaɗ sak a ndè a ndev gèɗ, skwi mbe-laʼa te va asaɓai. Samaʼa murmuraʼa, mblè, sam ncizlaʼa man ta mana ɓai, ta pada ɓai, ta ga madzaf a pa ɓai.

⁷ Herkeda kinè nara hèshèkèɗ. Kokwar kinè, vogwa a nʼndeda ma. Gi dau kinè, ndohi ngiɗè ta ndeda ma a sam di kinè. A nde na hèshèkèɗ, ara Sodome man a ngedas na.

⁸ Njèkè kokwar Sion, a nza ara bodom te gi lak, ara gèjèk dak te gi vanda, ara kokwar man ta dumdama.

⁹ Aman agassa Zhiklè bi mbiaʼa a njèkaha nga kèshkata ɓai, ar nga lèmèlèmè ara Sodome, ara Gomorrhe.

Juda a tsi ri a Zhiklè ambalai

¹⁰ Kinè bihi Sodome, va-tsena ma Ndo nzi pèc pècèk! Kinè ndohi Gomorrhe, vafu zlembaɗ a ma kita Zhiklè nga!

¹¹ I gi a skwi man kin vay kumba kumba sa mè? Ndo nzi pèc pècèk a gaɗa. I ngeza a droki kumba man kin ndarayè, a mbeza wud zlèhai. Pombaz marihai a tambakihai a ɓokwai nʼngay asaɓai.

¹² Aman kin shkè a sam ga, ngaɗka kinè wa, aman kin mbatskay a dalmagi ga?

¹³ Kin vay skwi ambali te deɓaʼa ɓai! Skwi man kin vayè aranta a ndarayè. Ngolala mvèng kia, ngolala pats nshèk va, ngolala mɓicè va: i woy ngolalahi a mali te pa ɓai!

¹⁴ Ngolala mvèng kia a ngolalahi kinè, ndav a dzayè a géɗèʼa, ta ngezlay a gèɗ ma, i ngeza te riaʼa.

¹⁵ Aman kin geda ri a zhiklè, i ngwoda di ga aussa. Ko kin tsi ri kumba, i fi zlembaɗ azɓai. Pombaz a ri kinè.

¹⁶ Va-pana va, va-tila va kinè! Va-cè na shèwa kinè auda a sam diga! Va-jè-keɗa malai!

¹⁷ Va-slebau ngi skwi man amba, va-woy skwi nzuraʼa, va-ngra na maya a ndo man a cè skwi ndo a wuɗai, va-takaha kra dikai, va-nza na a deɓa a ngwoz mazai!

Mpèsl ri Zhiklè

¹⁸ Anai vo-washkè, a ngotsommokoy ma, Ndo nzi pèc pècèk a gaɗa. Aman ma-lihi kinè nduzoʼa ara vèvèzh, ta da gi a nslekaɗaʼa ara gogumai. Aman nteva, ta da ngwod ta ara gwots tambak.

¹⁹ Aman kin woya a kin fi gèɗ a ma ga, kin da ndi skwi gi dau kinè.

²⁰ Aman kin woya ɓai, a kin kwolyè genè, ta da bazl kinè a tsakwal. Aman Ndo nzi pèc pècèk a ngoɗ te ma na.

²¹ Kokwar nlèɓèslèʼa man a ngau skwi nzura tèlèba, nʼnde na a fali dam, kè! Ngi-zuraʼa a nʼnza te pa, anai ndohi nkede ndo ta nzi a pa.

²² Verzhègenè ngaya a nʼnde na a zi züdo. Barassa ngaya, iyam ambali tedai.

²³ Tsuvomhi ngaya ta poko ta gèɗ auda a ndohai, a ta humda va a metsarhai. Ta tèlèba ta woy aman ndohi ta va ta skwai, a ta hèsh skwi mbalai. Ta takaha kra diki azɓai, ta nza na a deɓa a ngwoz mazi azɓai.

Zhiklè a da gi kita a géɗ Juda

²⁴ Gar haha, Bi Zhiklè bi mbiaʼa, Bi wuɗai, a gada: Yowa, i woya aman i ngwossaha ta ndohi shèwa ga, a ndohi mayamhi ga ta pulkoy gèɗ!

²⁵ I woya a i ngwoda gèɗ ga, a i wosl ka a ri ga, a i pon-ko derɗa auda tèlè, a i cko zi auda tèlèba.

²⁶ I woya a i pa kinè ndohi kita ara halaʼa, a i ngatsa kinè ndohi maya, ara man ta hünkodai. Te deɓaʼa ta da baha ka kokwar ngi-zuraʼa, kokwar nlèɓèslèʼa.

²⁷ Kita a da proko Sion auda, ngi-zuraʼa a da prokoɗi ndohi man ta ngwoda ndav ta auda.

²⁸ Aman ndohi man ta tsena gèɗ ɓai, a ndohi mali tèlèba, ta gedas ta. A tengaʼa man ta jèkeda Ndo nzi pèc pècèk, ta zi ta.

²⁹ Skwi ntèwèlè gèɗ man kin wuffe a gèɗ nengaʼa, a da pa kinè hori a dai. Gètèl wof man ambaha kinè, a soko kinè pombaz auda te va.

³⁰ Kin da ndi lè-mèlèmè ara skwi ntèwèlè gèɗ man nʼngworaʼa, ara gètèl wof man mɓuto, te ri iyam man azɓai.

³¹ Ndo mbiaʼa a da ndi lèmèlèmè ara kda gogumai, a mizlinè nengaʼa a da gi lèmèlèmè ara nwurcè vogwa. Cèw ba vogwa a da ndiaʼa, ndo mbècè vogwa azɓai.