Ephésiens 6 - Ma Zhiklè

Nfi gèɗ, mwoy ndo

¹ Kinè wudahai, va-fu gèɗ a ma bab a mam kinè te Bi Zhiklè. Nasa amba.

² Slubordo bab ngaya a mam ngaya! Nasa ma nkwèr Zhiklè nshèlèkuraʼa, man a pasla nga ri a pa,

³ a ka nzi amba, a ka nzi dai a nshèffè tʼherkeda.

⁴ Kinè babhai, kin poko ta gèɗ auda a wudahi a ndzoan ɓai! Aman va-gre ta, va-ngatsa ta maya, va-ngez ta te Bi Zhiklè!

⁵ Kinè ɓèlèlihai, va-dzodzor ma babgihi kinè man ta sum kinè, a zlau a ngudzai, a ndav nlèɓèslèa, ara man a sam Kristi,

⁶ a mizline a di ndo gene ka ɓai, aman ara ɓèlèlihi Kristi, man ta gi skwi man Zhiklè a woyaʼa, a ndav tèlèba.

⁷ Va-gu mizlinè kine a ndav kine tèlèba, ara man a sam Bi Zhiklè, ara man a di ndohi genè ka ɓai.

⁸ Va-suna: Skwi man amba staɗ staɗ tèlèba, man ndo a giaʼa, a ngècè a deɓa a sam Bi Zhiklè, ko ɓèlè, ko kra ngwai.

⁹ Kinè, bihai, va-gu lèmèlèmè, kin guv ndo ɓai! Kin suna, Bi kinè a tengaʼa ba a zhè te zhiklè te géɗèʼa. Nengaʼa a pèr ndo mpèrè azɓai.

Skwi var Zhiklè

¹⁰ Te deɓaʼa: Va-nzala va kinè te Bi Zhiklè, a wuɗi nʼnjèl na!

¹¹ Va-feda skwi var Zhiklè tèlèba a va, aman kin slaha a kin zlècè a sam man bi madzagai a pe kinè a wai a maya na.

¹² Nga gi var a ndohi azɓai; aman a wuɗihai, a bihi ruva tʼherkeda haha, a mèzhèɓhi ambaɓihiaʼa tʼhwaɗ giɗfèk.

¹³ Gar haha vo-co skwi var Zhiklè tèlèba, aman kin slaha a kin gi slagama a pats man ambaɓai, a kin ɓir dal var kinè.

¹⁴ Ani haha va-zlatsahai, va-dzawa va kinè a ma nzuraʼa! Slarba ngi-zuraʼa a ndav kinè!

¹⁵ Kotokoroh te sak kinè, nasa ndè a ma mbelaʼa te gumai.

¹⁶ A géɗ skwi tèlèba, vo-co gambar, nengaʼa ncè-a-ndav. A nengaʼa kin slaha a kin gedassa sulom, man vogwa te pa, tèlèba te ri ndo man ambaɓai.

¹⁷ Va-feda dzokwom a gèɗ, nengaʼa skwi mʼmbel kinè; vo-co ma Zhiklè, nengaʼa kafahi gwèsh, man Mèzhèɓ a va kinè.

¹⁸ Va-tsu ri pèc pècèk a géɗ skwi tèlèba, a ntsi ri mbuh-mbuhaʼa te Mèzhèɓ. Vo-zhoro a vna, va-nza a dai! Va-tsu rai a géɗ ndohi Zhiklè nkezlaʼa tèlèba,

¹⁹ a géɗ ga ba, aman i slaha a i winè ma ga a mwuffè, a i njè skwi nʼnghedaʼa te ma mbelaʼa.

²⁰ I ndo sak nengaʼa, i dzawa a géd nengaʼa. Va-tsu rai, aman i gèdè maʼa a mwuffè, ara man sèi i gèdè ndèzl!

Mbali man a deɓa

²¹ A géd man kinè ba kin suna, ara man i nza, a skwi man i giaʼa, Tychique, kramam ga man i woya a ndav ga, ndo nta-kahaye nlèɓèslèʼa te Bi Zhiklè, a di a ngreda kinè tèlèba.

²² I zlinda a sam kinè, aman kin cinè te ri nengaʼa ara man i nza, a bidè kinè.

²³ Gumai a sam kramamhai, a mwoyndo, a ncè-a-ndav, man shkè te Bab Zhiklè, a Yèsu Kristi, Bi nga.

²⁴ Pombai a nda ndohi tèlèba, man ta woy Yèsu Kristi, Bi nga, a ndav ta a mèdèp.