Ephésiens 4 - Ma Zhiklè

Nhumda te Mèzhèɓ Zhiklè

¹ Gar haha i fa kinè ma a gèɗ, iyè ndo dangai a géɗ Bai Yèsu: Va-nza a maya, ara man kin njèl Zhiklè man a baha kinè.

² Va-manda gèɗ a hai, a ndav nlüɓekwaʼa, vo-zhor skwi a ma ma, va-lèɓèslè a va kinè, ngiɗè a sam ngiɗè, te mwoy-ndo.

³ Va-gu maya a vata, aman gumai a humde kinè te Mèzhèɓ te va staɗ, te Mèzhèɓ staɗ,

⁴ ara man Zhiklè a baha kinè a sam nzhèrè te ndav kinè staɗ.

⁵ Bai staɗ, ncè-a-ndav staɗ, baptême staɗ,

⁶ Zhiklè staɗ, Bab ndo tèlè, nengaʼa man a zhè a géɗ skwi tèlèba, a sam skwi tèlèba, te skwi tèlèba.

⁷ Aman ndo staɗ staɗ te ndev nga a nʼngots pombai, ara man Kristi a va na.

⁸ Gar haha ta Windo: Ndè na a géɗèʼa, a hulta ndohi dzawaʼa a skwi man a verzai, a mva ta pombi tsaɗ tsaɗ a ndohai.

⁹ Aman a ‘dè a géɗèʼa’, lèmèlèmè ara man a do, a herkeda a hwaɗaʼa ba.

¹⁰ Nengaʼa man a do a hwaɗa, a ndo a géɗèʼa, a géɗ zhiklèhi tèlèba, aman a ndhè tèlèba.

¹¹ Tengahi ngiɗè a pe ta a ndohi sak, tengahi ngiɗè a ndohi nhadka ma; tengahi ngiɗè a ndohi njè ma Zhiklè; tengahi ngiɗè a ndohi mɓir ndohai; tengahi ngiɗè a ndohi njèngè,

¹² aman a til ta ndohi Zhiklè nkezlaʼa a sam mizlinè ta. Arsa va Kristi a grè a ma ma,

¹³ ha nga tèlèba nga staɗ te ncè-a-ndav, te nshin kra Zhiklè; a nga ga a ndo nshfaʼa, man skwi Kristi tèlèba nʼngaʼa jèlalaʼa a sam nengaʼa.

¹⁴ Te deɓaʼa nga wudahi ka ɓai, a njè ma ambali tsaɗ tsaɗ, a shèwa ndohi man ta ngwèdè ndo, a maya ambaɓiaʼa man ta pe nga a wi a vna, a wutèma nga gèɗ azɓai.

¹⁵ Ngo-goɗokoy ma nzuraʼa te mwoy-ndo, ngo-grokoya te skwi tèlèba a sam Kristi, nengaʼa gèɗèʼa.

¹⁶ Nengaʼa a gshè va tèlèba, a nfèfènva staɗ a nkèlè ma a nfèfènva ngiɗè, a dérzlè gèɗ vatasl, a nfè-fènva staɗ staɗ tèlèba ta tèkè a va, ara man ta slaha, a va a grè a ma ma, a ɗizlè va na a ri na, te mwoy-ndo.

Nshèffè mɓuaʼa te Kristi

¹⁷ Gar haha i gaɗa kinè, a i ngreda te Bai Yèsu, anai kin nza ara ndohi nte deɓa ɓai, man ta hér skwa ambalai.

¹⁸ Maya ta te ruva, ta dra a sam Zhiklè, a gèɗ man ta sun skwa ɓai, ndav ta ngwora,

¹⁹ ndav ta nsassaya, a ta vi va ta a mphömè, a ta gi skwi nlizhèʼa tèlè a ntétékè kumba.

²⁰ Aman nga senda kinè Kristi arsa ɓai,

²¹ kin tsena te nengaʼa tsaɗ, a kin slebau tsaɗ, ara ma Yèsu nzuraʼa a vava.

²² Va-suɗda skwi nhalaʼa a hai, a maya nshèffè kinè nhalaʼa, man a gedas na a ri na, a ntétékè ncèkèlma.

²³ Aman ara ndo mɓuaʼa te nhér gèɗ kinè,

²⁴ va-feda skwi mɓuaʼa a va, man nʼngaʼa ara Zhiklè man a woyaʼa, a ndo nzuraʼa, amba, nkezlaʼa.

²⁵ Gar haha va-jèkedá ncèkèlma, vo-goɗ ma nzuraʼa, staɗ staɗ a sam ko wa wa, te man nga tèlèba nfèfènvahai.

²⁶ Aman kin gi ndav, mali da kala a pa ɓai, va-gu aman pats da kala na gèɗ a ndzoan kinè ɓai.

²⁷ Kin va na civèɗ a bi madzagi ɓai!

²⁸ Ndo man a ngu metsar, da gu metsar te deɓaʼa asaɓai, aman da gu mizlinè, da gu skwi man amba a ri na, aman a ngècè skwai, a va ta ndohi ntawassaʼa.

²⁹ Va-gu aman ma ambaɓiaʼa da shkè auda te ma kinè ɓai, sèi ma mbelaw, man a gi aman kin grè a ma ma a vna. Vo-goɗ ma, aman a takaha ta ndohi man ta cinèʼa.

³⁰ Kin ɗawarama na ndav Mèzhèɓ Zhiklè nkezlaʼa ɓai, aman nengaʼa nʼndèa te kinè, ha pats mpil gèɗ kinè.

³¹ Kin gu ndav worwora ɓai, kin gu shèwa ɓai, kin gu ndzoan ɓai, kin ngur ndo ɓai, kin durɗo ndo ɓai!

³² Aman va-gu skwi a ndav amba, nlèɓèslè, ngiɗè a ngiɗè, va-pra mali ngiɗè a ngiɗè, lèmèlèmè ara Zhiklè a pra kinè malai te Kristi.