Ephésiens 3 - Ma Zhiklè

Mizlinè Zhiklè Paul a sam ndohi nte deɓa

¹ Gar haha iyè Paul, i ndo dangai Kristi Yèsu a géɗ kinè, ndohi nte deɓa.

² Kin tsena ma pombi Zhiklè, man i ngotso a i va kinè.

³ Ara man i winda kinè ma kèshkata a matsa ma, skwi nʼngheda haha a ngudkoɗauda a sam ga,

⁴ aman a kin jèngèʼa, a kin slaha kin rka te pa, aman i sun skwi Kristi man nʼngheda.

⁵ Halaʼa a nʼngreda ta skwi nʼngheda haha a ndohi herkeda ɓai; aman antanta a nʼngreda ta ndohi sak nkezlaʼa, a ndohi nhadka ma te Mèzhèɓ.

⁶ Skwi nʼngheda sa a haha: ndohi nte deɓa ba ta ngècè skwi Zhiklè a nda tengaʼa, ta humda a va staɗ, ndohi man ta mba a mpèsl ri Kristi Yèsu te ma mbelaʼa.

⁷ I ndo mizlinè nengaʼa, a géɗ pombi Zhiklè man a vayè, a géɗ wuɗi nengaʼa mbiaʼa.

⁸ A mvay skwi haha a iyè, ntabaw ndohi Zhiklè tèlèba, aman i njè ta mèshèlè Kristi, man a ndev ɓai, a ndohi nte deɓa,

⁹ a i winè ta dai, aman ta rka skwi man Zhiklè a huro a ngiaʼa, man nʼngheda te nhinkaɗ herkeda te Bi Zhiklè, man a ngu skwi tèlèba.

¹⁰ Antanta te mpi ndohi Zhiklè, maya Zhiklè tsaɗ tsaɗ nʼngreda auda a sam wuɗihai, a bihi tʼhwaɗ giɗfèk.

¹¹ Skwi haha Zhiklè a nhur daga halaʼa, a nrufaʼa te Kristi Yèsu, Bi nga.

¹² Te nengaʼa nga ngots civèɗ te ncè-a-ndav, aman nga herda na va a Zhiklè, a nga fi gèɗ a vna a zlau ka ɓai.

¹³ Gar haha i tsa kinè rai, aman ntulè a zlau da keɗa kinè ɓai a géɗ matakwan ga, man i ɗishè a géɗ kinè. Nengaʼa skwi nʼnjèl kinè.

Nshin mwoy-ndo Kristi

¹⁴ Gar haha i gürɓèhi a sam Bab Bi nga Yèsu Kristi,

¹⁵ a nzlembaɗ nengaʼa ta baha ta wudahai, te zhiklè te géɗèʼa, a géɗ herkeda ba, tèlèba.

¹⁶ Da va kinè wuɗai, ara mèshèlè nʼnjèl nengaʼa, aman kin gi a ndohi wuɗai te ndav kinè, te Mèzhèɓ nengaʼa.

¹⁷ Aman Kristi da nza te ndav kinè te ncè-a-ndav, a mwoy-ndo kinè a gi ara zluzlor man a gidè azɓai gedeng-gedengaʼa.

¹⁸ A kin slaha kin suna, a nda ndohi Zhiklè tèlèba, mwoy-ndo man a zhè te Kristi: nguzlöhna, njüv na, ngür na, a nkèl na;

¹⁹ a kin shin mwoy-ndo Kristi, man a fena skwi man ndohi ta slaha a ta shinèʼa – a kin ndhaʼa a skwi man a zhè te Zhiklè tèlèba.

²⁰ Aman a nengaʼa man a slaha a ngi skwi tèlèba, a ndev ɓi sraffaffaʼa, a fena skwi tèlè man nga slaha nga jhèɗèʼa a nga shinèʼa, ara wuɗi man a gi te ndav nga,

²¹ a Zhiklè: nʼnjèlè te mpi ndohi Zhiklè, te Yèsu Kristi, pèc pècèk, a sam ndohi a géɗ herkeda tèlèba, a mvi a mvai, a mèdèp. Amen.