Ephésiens 2 - Ma Zhiklè

Te mʼmetsai a sam nshèffè

¹ Kinè halaʼa ndohi mʼmetsaʼa a géɗ maharam a malai.

² Kin dzadzara skwi herkeda, kin fe gèɗ a madzagai, man a gi bai tʼhwaɗ giɗfèk, man a gi mizlinè na antanta te ndav ndohi man ta gi mèdègèɗ a sam Zhiklè.

³ Nga ba, nga gu arsa zlèzlèʼa, nga dzadzara ntétékè te va nga. A nga gu skwi man va nga, a nhér gèɗ nga a woyaʼa. Nga ndohi man ndzoan Zhiklè a gèɗ, te nyakaɗ nga, lèmèlèmè ara ndohi ngiɗè.

⁴ Aman Zhiklè, man ndo a sia te va kumba, a géɗ mwoy-ndo nengaʼa mbiaʼa, man a woy nga a vna,

⁵ – nga ba ndohi mʼmetsaʼa a géɗ, malai — a mva nga nshèffè ba a nda Kristi (a pombai kin mbel kinè),

⁶ a nslambaɗkaɗ nga auda a nda nengaʼa, a mva nga sam nʼnzi te zhiklè a nda nengaʼa te Yèsu Kristi.

⁷ Pombi nengaʼa mbiaʼa arsa a ngreda nga te mwoy-ndo nengaʼa a sam nga te Kristi Yèsu.

⁸ Aman a pombai kin mbel kinè, a ncè-a-ndav; a ri kinè ka ɓai; Zhiklè a mva kinè;

⁹ a mizlinè kinè ka ɓai, aman ndo da dzugor va ɓai.

¹⁰ Aman nga skwi ri na, nʼngaʼa te Yèsu Kristi, aman nga gi mizlinè man amba, man Zhiklè a ntila nshèlèkuraʼa, a woya a nga giaʼa.

Tèlèba staɗ te Kristi

¹¹ Gar haha va-huro, kinè man zlèzlèa ndohi nte deɓa, man ndohi nʼngela ngwon (man ri ndo a ngau) ta baha kinè ndohi man ngwon nʼngel ɓai:

¹² Te ndev nasa Kristi az a sam kinè ɓai, kinè ndohi Israel ka ɓai, kin sun nderzlè-ma Zhiklè man a mpasla nga ri ɓai. Gar haha kin zhera skwa ɓai, kin sun Zhiklè ɓai.

¹³ Aman antanta te Kristi Yèsu, kinè man zlèzlèʼa dra, kinè ndul ndul ma te Pombaz Kristi.

¹⁴ Aman nengaʼa gumi nga. A ngu te skwi cèw, skwi staɗ. A mʼmbeɗa zlazlar man a zhè te ndevaʼa (zlazlar nara mayam), te va na.

¹⁵ A nco ma kita a ma nkwèrè man a fa nga a gèɗ, aman te va nengaʼa a nderzla cèw a ta gi a ndo mɓuaʼa staɗ, a ntsu gumi arsa,

¹⁶ a mʼmenda gumi a hai a Zhiklè, te va staɗ, a sam wof ngèzlèlè; a samaʼa a ngedasa skwi mayam.

¹⁷ Nengaʼa a mshkè, a njè kinè ma gumai te ma mbelaʼa, a kinè man kinè dra, a tengaʼa man ta ndul ndul.

¹⁸ Aman te Kristi, nga cèw ba, nga ngots civèɗ a sam Bab nga te Mèzhèɓ staɗ.

¹⁹ Gar haha kinè ndohi mbrokihai a ndohi nshèwèlè ambali asakaɓai. Kinè wud ngwihi ma, te va ndohi Zhiklè, man ta slébèrdè Zhiklè pèc pècèk, wud ngwi Zhiklè,

²⁰ man ta ɗizl ta a géɗ ndohi sak a ndohi nhadka ma te verziaʼa. Yèsu Kristi, kwa verzi gai a ri na.

²¹ A géɗ nengaʼa gi tèlèba a grè a ma ma. Nengaʼa a gshèʼa, aman a gi a gi Zhiklè nkezlaʼa te Bai Yèsu.

²² Te nengaʼa kinè ba ta ɗizl kinè ara gi Zhiklè te Mèzhèɓ.