Ephésiens 1 - Ma Zhiklè

Mbalai

¹ Paul, ndo sak Yèsu Kristi, ara man Zhiklè a woyaʼa, a sam ndohi Zhiklè te kokwar Ephèse, a ndohi man ta co Yèsu Kristi a ndav.

² Pombai a gumai da, zhè a nda kinè te Zhiklè, Bab nga, te Bi Yèsu Kristi.

Pombai te Mèzhèɓ Kristi

³ Nga shid gèɗ a Zhiklè, Bab Bi nga Yèsu Kristi, aman a pshè nga ma te Kristi, a va nga skwi Mèzhèɓ man a Zhiklè tsaɗ tsaɗ.

⁴ Aman te Yèsu, a mpar nga mpèrè, man herkeda nʼnge di ɓai, aman nga gi a ndohi nkezlaʼa, mali nga azɓai a sam di na, te mwoy-ndo nengaʼa,

⁵ a mpu saha nga, aman a ge nga a wudahi nengaʼa te Yèsu Kristi, ara man ambaha, ara man a woyaʼa,

⁶ a nga ndi a skwi nslébèrdè nʼnjèl nengaʼa, man a mva nga te kra nengaʼa man a woya a ndav na.

⁷ Yèsu a mpela gèɗ nga a Pombaz na, a mpra nga malai te pombi nengaʼa mbiaʼa,

⁸ man Zhiklè a mva nga kumba, a vata ba, a nga shin skwi tsaɗ tsaɗ, a maya tsaɗ tsaɗ.

⁹ Te nengaʼa a nʼngra nga skwi man Zhiklè a woyaʼa, nʼnghedaʼa, ara man ambaha.

¹⁰ A da rufaʼa, aman a mɓica tèlèba te Kristi, ko skwi te zhiklè te géɗèʼa, ko skwi a géɗ herkeda.

¹¹ Te nengaʼa nga da ngècè skwi Zhiklè, nga man a mpu saba nga, ara man a huro a géɗ skwi tèlèba man a woya a ngiaʼa.

¹² A nga gi a skwi nslébèrdè nʼnjèl nengaʼa, nga man nga zhor Kristi te ndav nʼnzi a zhè.

¹³ Te nengaʼa kinè ba, man kin tsena ma nzuraʼa, nengaʼa ma mbelaʼa, a kin co a ndav, Mèzhèɓ Zhiklè nkezlaʼa nʼndè te ndav kinè, man a pasla nga ri a pa.

¹⁴ Nengaʼa skwi man a va nga hai a géɗ skwi man nga da ngècè te Zhiklè, ha a mpela gèɗ nga, nʼngaʼa a skwi nslébèrdè nʼnjèl nengaʼa.

Ntsi rai a géɗ maya, a géɗ nshin skwai

¹⁵ Gar haha iyè ba, te deɓaʼa man i tsena labar ma kinè, ara man kin co Bai Yèsu a ndav, ara man kin woy ta ndohi Zhiklè tèlèba,

¹⁶ i jèkè nshid gèɗ a géɗ kinè azɓai, a i hér kinè te ntsi ri ga.

¹⁷ Zhiklè Bi nga Yèsu Kristi, Bab nʼnjèlè, da va kinè Mèzhèɓ nshin maya, da ngreda kine skwi auda, te nshin nengaʼa.

¹⁸ Da wina di kinè, aman kin shin skwi man kin zhèrè te ndav, man a baha kinè a pa, a nʼnjèl skwi Zhiklè mbiaʼa man kin da ngècèʼa man a va ta ndohi nengaʼa.

¹⁹ A kin shin wuɗi mbiaʼa a sam nga, man nga co a ndav, ara wuɗi nʼnjèl na man a sam nga,

²⁰ wuɗi man a gu a sam Kristi ba, man a nslambaɗda te ndev ndohi mʼmetsaʼa, a nʼnzedahi te civèɗ ri mandi nengaʼa te zhiklè te géɗèʼa,

²¹ a géɗ kokwar bihai, wuɗi bihai, wuɗai tsaɗ tsaɗ, nkwèr skwai, a skwi tèlèba man ta slaha ta gèɗèʼa, tʼherkeda haha genè ka ɓai, aman te nengaʼa ba man a di a shkè.

²² Zhiklè a mfeda skwi tèlèba a hwaɗ sak nengaʼa, a mfeda a bi a géɗ mpi ndohi Zhiklè va na.

²³ Yèsu te mpi ndohi Zhiklè, a ndha tèlè ma ba.