Ecclésiaste 9 - Ma Zhiklè

Ndo man amba a ndo man ambaɓai

¹ Halau, skwi haha tèlèba i huro, a i wor tèlèba. Ndohi nzuraʼa a ndohi maya a skwi man ta giaʼa, tèlèba a zhè nte ri Zhiklè. Gar mwoy-ndo, gar shèwa, ndohi ta sun te va ɓai; skwi tèlèba man a zhè a sam ta, skwi ambalai.

² Skwi nʼnga ta ndohi tèlèba lèmèlèmè, ko ndohi nzuraʼa, ko ndohi malai, ko ndo man amba, ko ndo man ambaɓai; ko ndo a ndav mpana, ko ndo a ndav mpanɓiaʼa; ko ndo man a vi skwi a Zhiklè, ko ndo man a vi skwi a Zhiklè azɓai; ko ndo man amba, ko ndo malai; ko ndo man a mbèɗè, ko ndo man a gi zlau mʼmbèɗè.

³ Nasa skwi mwuɗitpa a géɗ herkeda, aman skwi a ga ta ndohi tèlèba lèmèlèmè. Ndav ndohi nʼndha a shèwa. Ndav ta nrzla, a pats nshèffè ta tèlèba. Te deɓ nengaʼa ta dè a va ndohi mʼmetsaʼa.

⁴ Ndo man a zhè te va ndohi man ta shèf-fè dai, a zhèr skwi dai. Kda man a zhè a nshèffè a fena marizhèlè mʼmetsaʼa.

⁵ Ndohi man ta zhè a nshèffè ta suna, sèi ta da metsi ta ndèzl; aman ndohi mʼmetsaʼa ta sun skwa ɓai. Skwi ntul ta asaɓai, ndo a hér ta asaɓai.

⁶ Mwoy-ndo tengaʼa, shèwa tengaʼa, srak tengaʼa kala a deɓa ma, skwi man a gi a géɗ herkeda, ma ta a te pa ɓai.

Sam a zhè man ndohi ta kèlè a géɗéʼa

⁷ Do, ndu movar ngaya te mwuffe genè, su zom ngaya a dimèsh a ma genè, te man skwi man ka giaʼa ambaha Zhiklè mènè!

⁸ Feda maslaka nslekadaʼa a va pèc pècèk, faɗda mbar a gèɗ pèc pècèk.

⁹ Wuffa langlangaʼa a nda ngwoz man ka woya a ndav ngaya, a pats nshèffè ngaya man skwi nfi va ambali a géɗ herkeda. Nasa skwi nshèffè man ka ngotso, a géɗ mizlinè ngaya man ka ngeza a vna a géɗ herkeda.

¹⁰ Mizlinè tèlèba man ka ngotso, gu dè te di wuɗi ngaya. A sam mʼmetsai, man ka da dè a pa, mizlinè azɓai, nhér skwi azɓai. Ta sun skwa ɓai, maya ngiɗè azɓai.

¹¹ I rka zaʼa a géɗ herkeda: ndohi man ta ngècè gèɗ ta, ndohi mwosla genè ka ɓai; ndohi man ta fen ta a var, ngul ndohi genè ka ɓai. Ndohi ta ngècè movar a géɗ maya genè ka ɓai. Skwi mèshèlè a géɗ man ta sun skwi te gèɗ ka ɓai. Ndo a ngècè nuba a géɗ kilèa ka ɓai. Aman ndohi tèlèba, sam a zhè man ta kèlè a gédèʼa.

¹² Ndo a sun man tiɗè sam skwi a ma ɓai; lèmèlèmè ara klèf man jir a gshèʼa, ɗiak man votok a gshèʼa, aranta ndohi herkeda ba, pats staɗ matakwan a gs ta. Man a nkala ta va, ta sun ɓai.

Maya a fena wuɗai

¹³ Maya haha ba i rka a géɗ herkeda: a i hur skwi haha skwi mbiaʼa:

¹⁴ Te kokwar hüɗökoʼa, ndo a te pa a vata ɓai, a bi mbiaʼa a shkè aman a gi var a nda ta, a ngalda pa a zlazlar mbiaʼa.

¹⁵ Ndo ntawassa ngiɗè a zhè te pa, man maya na zhè, man a mbel kokwar a maya na. Aman ndo ngiɗè a hér ndo ntawassa matsa azɓai.

¹⁶ A i gaɗa: maya a fena wuɗai. Aman maya ndo ntawassaʼa ta kwolaʼa, ta fi gèɗ a ma nengaʼa azɓai.

¹⁷ Ma man ndohi maya ta gèdè zhèhèd zhèhèdèa, a fena nhèzlèwè bi ndohi nrzlaʼa.

¹⁸ Maya a fena skwi var. Ndo staɗ man a gi malai a gedèsh skwi man amba kumba.