Ecclésiaste 8 - Ma Zhiklè

Ndo a sun skwi man a di a shke dai

¹ Nlèmèlèmè ara ndo maya wa, nsun ngredè verzi skwi auda wa? Maya ndo a hela te dai, shèwa nengaʼa a ngwoda.

² I gaɗa ka: Fu gèɗ a ma bai! Aman ka mbada a sam di Zhiklè tsam tsam ɓai!

³ Ka hu auda a sam di nengaʼa ɓai, ka nza a ndev skwi man ambaha ɓi ɓai! Aman skwi man a woya a ngiaʼa, a da giaʼa.

⁴ Wuɗi ma bai a zhè. Ka ge mè, a slaha a i ngaɗa na wa?

⁵ Ndo man a fi gèɗ a ma nkwèr nengaʼa, skwi ambaɓiaʼa a ga na azɓai. A ndo maya a zhèr pats kita ndohi ambaɓihiaʼa.

⁶ Skwi tèlèba a vava, a di tiɗè sama ma, a di tiɗè kita na ma. Ndo man a gi skwi man ambaɓai, a da gi wuɗitpa a sam na.

⁷ A sun skwi man a di a shkè ɓai. Da gu kè kè, nda ngra na wa?

⁸ Ndo a slaha a nʼnga na ma a deɓa a kozlar azɓai, ndo a slaha a mpér kozlar azɓai. Ndo ngi wuɗi a mʼmetsi azɓai. A ma var ta purko ndohi a ngwi azɓai. Ndo malai a slaha a nhi auda a sam kita azɓai.

⁹ Skwi haha tèlèba i rkaʼa, aman i pu dai, skwi tèlèba man ndohi ta gu a géɗ herkeda. Tidè sama ma, ngiɗè a gi bi a géɗ ngiɗè, a woya a ga na skwi ambaɓiaʼa.

¹⁰ A i rkaʼa, ara man ta rda ndohi ambaɓihiaʼa a vèvèɗ. Te deɓ man ndohi ta ngwoda deɓa ma, skwi ambaɓiaʼa tèlèba man a ngau a mpca ta a gèɗ a ndohai. Ko skwi haha skwi ambalai.

¹¹ A géɗ man kita a shkè tsam tsam azɓai a géɗ skwi ambaɓiaʼa, ndohi ta gi zlau ngi skwi ambaɓiaʼa azɓai.

¹² Ndo malai a gi mali kumba kumba, a nzi a nshèffè genè. Aman i suna, tengaʼa man ta gi zlau Zhiklè ta da nzi amba, a géɗ man ta gi zlauaʼa.

¹³ Ndo man ambaɓai a nzi amba azɓai, patshi nshèffè nengaʼa ta ndev ta, ta ara mèzhèɓ wof, a géɗ man a gi zlau Zhiklè azɓai.

¹⁴ Skwi ambali ngiɗè a zhè a géɗ herkeda: Ndohi nzuraʼa ta zhè, a ta ngècè skwi ntul ta ara ndohi malihai. A ndohi malihi ta zhè, ta ngècè skwi ntul ta ara ndohi nzuraʼa. A i gaɗa: Ko skwi haha, skwi ambalai.

¹⁵ Gar haha mwuffe a wuffèday gèɗ. Skwi ngiɗè man ambaha va ndo a géɗ herkeda, azɓai, sèi man a ndi skwai, a si skwai, a wuffè. Da ngotso te va mizlinè man a ngeza na a pats nshèffè na tèlèba man Zhiklè a mva na a géɗ herkeda.

¹⁶ Aman i huro i woy a i ngècè maya, a i wor skwi man a gi a géɗ herkeda, ko man a nzi a dai a pats ba a vaɗ ba, ko a tèr nzhun azɓai, i rka ndo a slaha a nshin verzi skwi man Zhiklè a giaʼa azɓai; skwi tèlèba man a gi a géɗ herkeda.

¹⁷ Ko ndo mwoslaʼa, a woyaʼa, a slaha a nʼngècè azɓai. Ko ndo maya a hur a ngotso, a slaha a ngècè azɓai.