Ecclésiaste 7 - Ma Zhiklè

Nlèmdè maya a nrzlè

¹ Dara labar ma man amba, a géɗ ɓurdi man a zhkè. Dara pats mʼmetsi ngaya, a géɗ pats man ta yeka ka.

² Dara ka dè a gi man ta kuɗi ndo te pa, a géɗ ndè a gi man ta gi ngolala te pa. Aman mʼmetsai, ndikè-ma ndohi tèlèba, a ndohi man ta zhè a nshèffè ta hérèʼa.

³ Dara man ka kuɗai a géɗ man ka ngwèshè. Aman kuɗa a dai, gumi te ndav a zhè genè.

⁴ Ndav ndohi maya a wuffè te gi man ta kuɗi ndo te pa. Ndav ndohi nrzlaʼa a wuffè te gi man ta gècè te pa.

⁵ Dara man ka fi zlembaɗ a ndzoan ndohi maya, a géɗ dimèsh ndohi nrzlaʼa.

⁶ Ngwèshè ndohi nrzlaʼa nara vogwa te va vatak man a ndiaʼa hulaslaslaʼa. Ko skwi haha, skwi nfi va ambalai.

⁷ Aman ta güvèʼa, a haɗama na géɗ a ndo maya; aman ta da rüɓèʼa, a gedassa ndav na.

⁸ Dara ndikè-ma skwai, a géɗ nhin na. Dara ndav ndo man a zhèr skwi a ma, a géɗ ndav ndo nfi va.

⁹ Ka gu ndav tsam tsam ɓai! Aman ndo nrzlaʼa, nengaʼa a gi ndav.

¹⁰ Ka goɗ: dara nhalaʼa a mpatsna — ka goɗ ɓai! Ndo maya a jhèɗè arsa azɓai.

¹¹ Maya amba, lèmèlèmè ara nʼndi gai, a takaha ta ndohi man ta zhè a nshèffè.

¹² Aman ka ngots maya, ka nzi a diaʼa, lèmèlèmè ara man ka ngots sulai. Ndo man a zhè a maya a ngots nshèffè.

¹³ Wor skwi man Zhiklè a giaʼa! Skwi man Zhiklè a hurmaʼa, nslaha a mprokoɗauda Sara wa?

¹⁴ A pats manam, wuffa! A pats man wuɗitpa, huro! Ko nengaʼa ba Zhiklè a ngau, lèmèlèmè ara matsa. Ndo a shin skwi te deɓ mʼmetsi nengaʼa azɓai.

¹⁵ I ba i nzakaɗa a nfi va ambalai; i rka tèlè. Ndo nzuraʼa a zi na te ngi-zura nengaʼa. Ndo shèwa ngiɗè a nzi a ma ma te shèwa nengaʼa.

¹⁶ Ka nda a ndo nzuraʼa holola ɓai! Ka ngots maya holola ɓai! Ka woya ka gedassa nshèffè ngaya èhèmè?

¹⁷ Ka gu shèwa holhola ɓai, ka nda a ndo nrzla ɓai; ka woy mʼmetsi te gola èhèmè?

¹⁸ Ka rzla va holhola ɓai, ka vassa na va a ngi zuraʼa holhola ɓai, hur skwihi haha cèw ba! Ndo man a gi zlau Zhiklè, a mbel na te ri skwi sa tèlèba.

¹⁹ Maya a va na wuɗi a ndo maya, a fena bihi kula te kokwar mbiaʼa.

²⁰ Ndo nzuraʼa azɓai a géɗ herkeda man a gi sèi skwi man amba genè, man a gi mali te pa azɓai.

²¹ Ka fu zlembaɗ a ma tèlè ɓai, man ɓai ka tsena ara man ɓèl ngaya a derɗa ka.

²² Aman ka ba ka sun te ndav ngaya, ka durɗo ndo lèmèlèmè.

²³ I jkede skwi haha tèlèba a maya ga; i hur i woy a i ngècè maya, aman i ngatsa ɓai.

²⁴ Verzi skwai, skwi nthwaɗaʼa, nshinè auda wa?

²⁵ I huro, i woy a i shin skwai, a i wuzhèʼa, a i jèjèr maya te ndav, a maya te gèɗ; a i ngotso: malai, skwi nrzlaʼa, a nrzlè a zedama na gèɗ a ndo.

²⁶ A i slebau: ngwoz wuɗitpa, a fena mʼmetsai. Ndav nengaʼa nara gadda, ndav nengaʼa nara lata, ri nengaʼa nara teɓa. Ndo man ambaha Zhiklè, a mbelkaɗ na auda te ri na! Aman ndo malai, ngwoz sa a ngso!

²⁷ Ndo ncèmma Zhiklè a gaɗa: I ngots skwi haha, i war skwi staɗ staɗ tèlèba, a i ngotsko skwi sa auda.

²⁸ Skwi haha man ndav ga a woya pèc pècèk, a i ngatsa di ɓai. Te va ndohi gozhèm, i ngots nguraʼa staɗ; aman te va ngwozai tèlèba ko staɗ i ngatsa ɓai.

²⁹ Wor skwi man i ngotso: Zhiklè a ngau ndo, a nge ta nzuraʼa; aman ndohi ta woy ndèvèd ma.