Ecclésiaste 6 - Ma Zhiklè

¹ I rka skwi man ambaɓi ngiɗè a géɗ herkeda, wuɗitpa a vata a sam ndohai.

² Aman Zhiklè a va na Suli a skwi mèshèlè a nʼnjèlè a ndo, a nengaʼa a nʼngots skwi tèlèba ara ndav nengaʼa a woyaʼa, aman Zhiklè a va na civèɗ azɓai aman a ndiaʼa, ndo ngiɗè a nda ndiaʼa. Nasa skwi ambaɓiaʼa, matakwan mwuɗitpa.

³ Ndo man ar agassa da yau wudahi 100, mvu kumba, nhala ma, aman a ngècè mwuffè te pa azɓai, ndo a ri a vèvèɗ azɓai, ta kalda a dala, dara kra mʼmèn-mʼmènè.

⁴ Mʼmènkaɗ na, skwi ambalai, a nzi te ruva, ndo a sun nzlembaɗ na ɓai.

⁵ Pats ba, nrka ɓai, a sun skwi ngiɗè ɓai, ta kuɗiaʼa azɓai. Aman nengaʼa a nʼnza a gumai, a fena ndo matsa.

⁶ Ko man a matsa da vu 2.000, skwi man amba az a sam na ɓai. Cèw ba ta dè a sam staɗ ka bi dè?

Skwi a ndiv na tsam tsam

⁷ Mizlinè tèlèba man ndo a giaʼa, a gi a géɗ hwaɗ na; aman ndav nengaʼa a ngézhè azɓai.

⁸ Ndo maya a fena ndo nrzla te mè? Ndo man a manda gèɗ a hai a fena ndo man a dè ndè bai te mè?

⁹ Dara skwi man ka rka a di ngaya, a géɗ skwi man ka jum te gèɗ. Nengaʼa skwi ambalai, nara nhi a gerzi kozlar.

¹⁰ Skwi mèmè man ta giaʼa, saba mpa ma. Skwi man ndo a da giaʼa, Zhiklè a sun ma. Ndo a slaha a nvir-slè a ndo man a fena nengaʼa azɓai.

¹¹ A sam man ma a zhè kumba, skwi ambali ba a zhè kumba. Ndo a ngècè te pa mè?

¹² Skwi man ambaha nshèffè ndo, nsun wa? Nshèffè nengaʼa a nzi a vata azɓai, skwi ambalai. A da ndiv na ara mèzhèɓ wof. Ngra na ndo skwi man a da gi a géɗ herkeda te deɓ nengaʼa wa?