Ecclésiaste 5 - Ma Zhiklè

Nslébèrdè Zhiklè

¹ Ka vassa ngèdè tsam tsam ɓai! Ndav ngaya da hur skwi dai, ga ka gada na Zhiklè. A géɗ man Zhiklè a zhè te zhiklè te géɗèʼa, a ka, ka zhè tʼherkeda. Ka ndurh ma ɓai!

² Aman mizlinè a zhè kumba, nshunè a cko na gèɗ a ndo. Lè-mèlèmè a sam nʼnjè ma kumba, ma nrzlè a shkè na va.

³ Aman ka gadda ma a hi a sam Zhiklè, gau ara man ka gaɗdahi tsam tsam! Aman ndohi nrzla ta ambaha Zhiklè ɓai. Ma man ka da gaɗdahi, gau!

⁴ Dara man ka gadda ma a hi ɓi fèt, a géɗ man ka goɗ staɗ, a ka gi azɓai.

⁵ Ma ngaya da kalde ka a mali ɓai! Ka gada na ndo sak Zhiklè: i goɗ kata genè, ɓai! Man ɓai Zhiklè a gi ndav a géɗ ngaya, a mizlinè ri ngaya a gi amba azɓai.

⁶ A sam man nshunè kumba, njè ma kumba, skwi ambali kumba. Sèi ka gi zlau Zhiklè!

Nterɗè kita

⁷ Aman ka rkaʼa ara man ta ga na wuɗi a mbelaw ndo, ara man ta terɗa ma kita te kokwar-bai, ka rzl ngaya ɓai! Aman ndo nfena ngiɗè a zhe, ndo nfena ngiɗè a zhè.

⁸ Ndohi tèlèba ta nda skwi gi dau, ko bai.

Mwèl va, skwi mwuɗitpa

⁹ Ndo man Suli ambaha, Suli a ngeza na azɓai. Ndo man skwi mèshèlè ambaha, skwi man a mɓicaʼa a ngeza na azɓai. Ko skwi haha, skwi ambalai.

¹⁰ A sam ndo man skwi na a zhè a vata, ndohi nʼndi skwi ta ndiv ɓai. Babgiaʼa a ngècè te pa mè? Sei mpi di a pa.

¹¹ Ndo man a gi mizlinè, nzhun zhummaʼa a ndav na. Ko skwi nʼndi na a zhè a vata, ko az a vata ɓai. Aman ndo mèshèlè man skwi na a zhè a vata, a ndiv ɓai, a tèr nzhun azɓai.

¹² I rka skwi man ambaɓi holholaʼa a géɗ herkeda: Ndo mèshèlè man a ɓer skwi mèshèlè na, man a da zi na pats staɗ.

¹³ Skwi mèshèlè nengaʼa a ndiv na te ngédèshè; kra nguraʼa man a myau a ngècè skwi te ri bab na azɓai.

¹⁴ Ara man a shkè auda tʼhwaɗ mam na, adai, a minè a deɓa a vèvèɗ, adai. Skwi man a ngots te mizlinè nengaʼa, ko staɗ ba, azɓai, aman a cè a rai.

¹⁵ Skwi haha ba skwi ambaɓi holholaʼa: ndo a jèkeda herkeda lèmèlè-mè ara man a shkè a pa. A za ngatsa mè? A keɗa ndhtsan a gèɗ ambalai.

¹⁶ A vaʼa, pats nshèffè na tèlèba, a nzi te ruva, te nlèyè, te matakwan, a dzakaɓama na ndav.

¹⁷ Skwi man i rkaʼa: amba aman ndo a ndi skwai, a si skwai, a wèlè te mizlinè nengaʼa tèlèba man a gu a géɗ herkeda; a pats nshèffè na tèlèba man Zhiklè a va na. Nasa skwi man a ngotso.

¹⁸ Aman Zhiklè a va na skwi mèshèlè a ndo, a va na skwi mwèl va, a wuffè te mizlinè na, nasa skwi man a ngots te ri Zhiklè.

¹⁹ Ndo arsa a lèyè skwi ngiɗè azɓai a pats nshèffè na, te man Zhiklè a va na mwuffè a ndav.