Ecclésiaste 4 - Ma Zhiklè

Skwi nzura ka ɓai

¹ A i rka a géɗ herkeda zaʼa, ara man ndo mbiaʼa a ga na matakwan a ndo nkèshèʼa. I rka kuɗa a di mbelawahai, ndo mbid ta azɓai. Ndo nʼnga ta matakwan a gi a wuɗai, ndo mbid ta azɓai.

² A i gada: Mwuffè a sam ndohi man ta mets ta ma! Dara tengaʼa a géɗ ndohi man ta zhè a nshèffè dai!

³ Mwuffè holholaʼa a sam ndo man nya di ɓai, man nrka skwi man ambaɓai man ta gi a géɗ herkeda di ɓai.

⁴ A i rka mizlinè tèlèba man ndo a geda matakwan a va a vna; skwi tèlèba, sèi srak genè, ngiɗè a gi srak a géɗ ngiɗè, ngiɗè a gi srak a géɗ ngiɗè. Ko skwi haha, skwi ambalai, nara nhi a gerzi kozlar.

⁵ Ndo nrzlaʼa a nza ɓlussaʼa, a gedassa va na a ri na.

⁶ Dara ndo man a gi mizlinè kètè a maya maya, a géɗ ndo mvassa mizlinè man a ngècè skwi te deɓaʼa azɓai.

Ndo mèshèlè, na géɗ na

⁷ A i rka skwi ambali ngiɗè zaʼa a géɗ herkeda:

⁸ Ndo ngiɗè a nza a géɗ na, gwoli na azɓai, kra na azɓai, kramam na azɓai. A gi mizlinè pèc pècèk, ndikèmaʼa azɓai. Skwi mèshèlè a shilè na ɓai. I gi mizlinè a i si matakwan a géɗ ngè? Ko skwi haha, skwi ambalai, mizlinè mwuɗitpa.

⁹ Dara ndohi cèw a géɗ ndo staɗ. Mba skwi ntul mizlinè ta.

¹⁰ Aman ngiɗè a kèlèhai, ngiɗè a slambaɗda. Wobau a géɗ ndo man a nzi a géɗ na; aman a nkal na hai, ndo nslambaɗda azɓai.

¹¹ Aman ta cèw ta mana a sam staɗ, mtasl a keɗ ta azɓai. Aman ndo a géɗ na, nʼnga na shukaʼa mè?

¹² Mba wuɗi ndohi cèw a géɗ ndo staɗ; ta cèw ta mbi a pa. Teɓa ndzerngazla makar a ngéslè tsam tsam azɓai.

Ndo mbiaʼa, skwi ambalai

¹³ Dara gola ntawassaʼa man maya na zhè, a géɗ bi man nhalaʼa, nrzla, man a ngècè maya asaɓai.

¹⁴ Ndo dangai ambalai a slaha a ndi a bai; aman kra bai a slaha a ndi a ndo ntawassaʼa.

¹⁵ I rka ndohi a géɗ herkeda tèlèba, a verzi gola man a nco sam nʼnzi bi na.

¹⁶ Ndohi man ta dzodzora, ta ndiv ɓai. Aman ndohi nte verzi nengaʼa ta da wuffè a géɗ nengaʼa azɓai. Ko skwi haha ba, skwi ambalai, nara nhi a gerzi kozlar.

¹⁷ Gu maya, aman ka dè a gi Zhiklè! Dara ka herda va a ka fi zlembaɗ; a fena skwi man ndohi nrzlaʼa ta zla na Zhiklè. Ta sun a ta gada nga gi skwi ambaɓiaʼa ɓai.