Ecclésiaste 3 - Ma Zhiklè

Skwi mèmè a gi tiɗè sam ngi na

¹ A géɗ herkeda, skwi mèmè a gi tiɗè sam ngi na, tiɗè sam ngi na. Skwi tèlèba a geda a di na a di na.

² Man tiɗè sam nyi kra ma, ta yiaʼa; man tiɗè sam mʼmetsi ma, ta metsai. Man tiɗè sam ngi skwi ma, ta ngiaʼa; man tiɗè sam pce skwi ma, ta pceʼa.

³ Man tiɗè sam mbèzl skwi ma, ta bèzlèʼa; man tiɗè sam mʼmbel skwi ma, ta mbélèʼa. Man tiɗè sam nʼngél skwi ma, ta ngélèʼa; man tiɗè sam nrèm skwi ma, ta rèmèʼa.

⁴ Man tiɗè man nkudi ma, ta kuɗai; man tiɗè sam nʼngwèshè ma, ta ngwèshè. Man tiɗè sam nlèyè ma, ta lèyè; man tiɗè sam ngècè ma, ta gècè.

⁵ Man tiɗè sam nkèldè kwa ma, ta kèldèʼa; man tiɗè sam mpèr kwa ma, ta pèrèʼa. Man tiɗè sam nkélèw ri a daʼai ma, ta kelèwèʼa; man tiɗè sam nʼngél va ma, ta ngél va.

⁶ Man tiɗè sam nhèsh skwi ma, ta hèshèʼa; man tiɗè sam nzhidè skwi ma, ta zhidèʼa. Man tiɗè sam mɓer skwi ma, ta ɓerèʼa; man tiɗè sam nkèldè skwi ma, ta kèldèʼa.

⁷ Man tiɗè sam nkurècè skwi ma, ta kurècèʼa; man tiɗè sam nɗèha a pa ma, ta ɗèha a pa. Man tiɗè sam nʼnzi tètè ma, ta nzi tètèʼa; man tiɗè sam ngèdè ma, ta gèdèʼa.

⁸ Man tiɗè sam mwoy-ndo ma, ta woy ndo; man tiɗè sam ngi shèwa ma, ta gi shèwa. Man tiɗè sam ngi var ma, ta gi var; man tiɗè sam gumi ma, ta tsi gumai.

⁹ Te skwi mèmè man ndo a giaʼa, a ngècè te pa mè?

¹⁰ I rkaʼa, Zhiklè a mva ta mizlinè mwuɗitpa a ri a ndohai, a ta si matakwan te pa.

¹¹ Skwi tèlèba a ngau tiɗè samaʼa, tiɗè samaʼa, a ngra ta man tiɗè samaʼa; aman skwi man Zhiklè a ngau tʼhinèkaɗ na, ha ndikèma skwai, ndo a slaha a nshin tèlè ɓai.

¹² A i rkaʼa sèi mwuffè, sèi mwèl va, di man ndara nengaʼa a nta asaɓai.

¹³ Aman ndo a slaha nʼndi skwai, a nsi skwai, a wuffè te mizlinè man a ngeza na; skwi haha ba Zhiklè a mva na.

¹⁴ I rkaʼa, skwi mèmè man Zhiklè a giaʼa, a nzi a mèdèp. Ndo a pi skwi a vaʼa azɓai, a helaha azɓai. Zhiklè a ngau, a woy man ndohi ta gi zlauaʼa.

¹⁵ Skwi man a patsna a zhè, a skwi man a di a zhè, hala ba a zhè ma. Skwi man kal na a deɓa, Zhiklè a mendokoɗa deɓa.

Ndohai tʼara skwi dak

¹⁶ I rka skwi ngiɗè zaʼa a géɗ herkeda: Nʼngwèdè ndo a zhè a sam kita. Malai te di ngi-zuraʼa.

¹⁷ A i huro: Zhiklè a da ɗèlè ta kita a ndohi nzuraʼa a ndohi malihai, te man skwi tèlèba, mizlinè stad staɗ tèlèba, tiɗè sam ngi na a zhè.

¹⁸ A i huro: A géɗ ndohai, Zhiklè a ngau arsa, aman a jkede ta, a ta suna, ta fena skwi dak azɓai.

¹⁹ Ndohai, tʼara skwi dak, tèlèba, nyaka ta maʼa staɗgenè. Ngiɗè a metsi na, ngiɗè a metsi na, tèlèba ta shèffè tʼhtsan. Ndo a fena skwi dak azɓai. Tèlèba skwi ambalai.

²⁰ Tèlèba ta ndikè a sam staɗ: ta shkè te va mberfenèk, tèlè ta da minè a deɓa a va mberfenèk.

²¹ Nsun wa, gar nshèffè ndo a dè a gédèʼa, gar nshèffè skwi dak a dè a godok.

²² A i rkaʼa: dara ndo da wuffa a sam mizlinè na, nasa skwi man a ngotso. Nda ngra na mwuffe man a da gi te deɓ nengaʼa wa?