Ecclésiaste 2 - Ma Zhiklè

Mwuffe, skwi ambalai

¹ I huro: Yowa, i tèr mwuffe di mènè; wuffa, wol va! Aman ko aranta ba, skwi nfi va ambalai.

² Ngwèshè, i baha na skwi nrzlaʼa. A géɗ mwuffe i gaɗa: kala mè?

³ I hur te gèɗ ga, i ngézhè va a zom, a i ndhè gèɗ a maya, a i gshè va ga a nrzlè; te deɓaʼa i da shin skwi man ambaha va ndohai a pats nshèffè ta a géɗ herkeda tèlèba.

Mwèl va, skwi ambalai

⁴ I gau skwi mbiaʼa; i rom gihi ga; i gau gi-dauhi ga;

⁵ I gau gi-lakhi ga; i gau gi-wofhai, a i ngeda wofhi man ta yi géɗ skwi tsaɗ tsaɗ.

⁶ I kol thal, aman i géjè a wof man na rèwè dai.

⁷ I sum golahi a dalahi a ɓèlèlihi ga, a i haya ndohi mizlinè ga. I ngots zlèhi a tambakihi a fena ndohi man ta ngots te Jérusalem, ga iyè.

⁸ I hoyo Suli a guro, a skwi mèshèlè bihi a kokwar-bihai. I ngots ndohi dimèsh a dalahi ngècè, a skwi man ndohi ta wuffè holholaʼa a gèɗèʼa.

⁹ Aranta i ga a ndo mbiaʼa, a fena ndohi ngiɗè tèlèba man ta zhè te Jérusalem, ga iyè. Maya ga ba a zhè.

¹⁰ Skwi mèmè man di ga a woy a nrkaʼa, i ngra na. Mwuffè mèmè man ndav ga a woyaʼa, i va na, te man ndav ga a wuffè a géɗ mizlinè ga tèlèba. Nasa skwi ntul mizlinè ga man i ngotso.

¹¹ Aman te deɓaʼa i rka mizlinè tèlèba man ri ga a ngau, a i rka ntulè man a kedyè te pa, – na haha skwi ambali tèlèba, nara nhi a gerzi kozlar. A géɗ herkeda, skwi man nga ngècè te pa, azɓai.

Maya a nrzlè, skwi ambalai

¹² A i do a i lèmdè maya a nrzlè a madaɗau. Ndo ndzadzarda bai a da gi mè te deɓaʼa? Sèi skwi man ta ga hala ma.

¹³ A i rkaʼa, dara maya a nrzlè, lèmèlèmè ara skwi nhél sam dara nengaʼa a ruva.

¹⁴ Ndo maya di na a zhè a gèɗ. Ndo nrzla a dè te ruva. Aman cew ha a yaka ta a maʼa.

¹⁵ A i huro: Skwi man a ga na ndo nrzlaʼa, a gayè lèmèlèmè. I za nzi a maya ba èhèmè?

¹⁶ Ndo maya ba a pca ta a gèɗ a ndohai. Ndo nrzla ba a pca ta a gèɗ a ndohai. Pats ngiɗè a di tèlèba ta pca ta a gèɗ a ndohai. Ndo maya a metsi na lèmèlèmè ara ndo nrzlaʼa.

¹⁷ Te deɓaʼa nshèffè ga a nʼndarayè. A skwi tèlèba man ta gi a gèɗ herkeda ambahay ɓai. Tèlèba skwi ambalai, nara nhi a gerzi kozlar.

¹⁸ Mizlinè tèlèba man i ngeza va a vna a gèɗ herkeda a nʼndarayè, te man a pats ngiɗè sèi i da jèka na a ri a ndo ngiɗè te deɓ ga ndèzl.

Wobau

¹⁹ Nda shinè wa, ndo maya dè, ndo nrzla dè? Aman nengaʼa a dè kwèr skwi man i gau tèlèba a maya a géɗ herkeda. Ko skwi haha ba, skwi ambalai.

²⁰ Gar haha ndav ga a mʼmbeɗ na a géɗ mizlinè tèlèba man i ngeza a vna a géɗ herkeda.

²¹ Na haha ndo ngiɗè a gi mizlinè kumba, a maya, a mizlinè nengaʼa a gi amba. Te deɓaʼa sèi a jèka na a ri ndo ngiɗè man a nʼnga mizlinè a pa ɓai. Ko skwi haha, skwi ambalai, skwi ambaɓiaʼa a vata ba.

²² Ndo a nʼngots mè te mizlinè nengaʼa man a ngeza te pa, a nshindè maya a géɗ herkeda?

²³ Pats nshèffè tèlèba sèi matakwan, sèi nlèyè, ko a vaɗ ndav nengaʼa a mènèhi azɓai. Ko skwi haha, skwi ambalai.

²⁴ Gar haha ndo da ndau skwai, da sau skwai, da wuffa a sam mizlinè na man wuɗitpa, di man ndara nengaʼa a nta asaɓai. Aman ko skwi haha, i rkaʼa, a shkè te ri Zhiklè.

²⁵ Nslaha a nʼndi skwai, nslaha a mwuffe, man nengaʼa a va na ɓi, wa?

²⁶ Zhiklè a va na maya, a nshin skwai, a mwuffe, a ndo man ambaha. Aman ndo malai, sèi a ɓicè skwai, a hèyè skwai, te deɓaʼa Zhiklè a cèma na, a va na ndo man ambaha. Ko skwi haha, skwi ambalai, nara nhi a gerzi kozlar.