Ecclésiaste 12 - Ma Zhiklè

Gola

¹ Gola, wuffa te gol ngaya! Gu langlangaʼa man ka gola dai! Gu ara man ndav ngaya a woyaʼa, di ngaya da wuffa a géɗèʼa! Aman sèi ka suna, a géɗ skwi haha tèlèba, Zhiklè a da zlatsede ka a sam kita.

² Ka hos skwi mwuɗitpa ɓai! I gol di kè? Gwots gèɗ ga nslekaɗa di ɓi, kè? Skwi ambali tèlèba!

³ Hur Zhiklè nʼnge ka, aman ka hal di ɓai, ga pats man wuɗitpa a shkè, ga ka ndikè na va mvi man ka gada: ta ambahay ɓai,

⁴ ga pats a skwi nhél sam a kia a bantihai ta nde ta a ruva, a vani a gokoɗi te deɓ iyam zaʼa.

⁵ Aman ndohi mɓer gai ta gudzai, a ndo nslagama a gurɓahai; a ngwozi nshidè ta jèkeda mizlinè, a géɗ man ta az a vata ɓai; a tengaʼa man ta pi di a nvakavar ta rka skwa azɓai;

⁶ a ntamagi ndè auda a civèɗ mpizlè ma; a kwa vova a slhè azɓai; a kuɗ ɗiak a ndev na; a dimèsh ba a ze na;

⁷ a ngi zlau a géɗ skwi man a zhè te géɗèʼa, skwi mpra ka zlau a va a zhè a civèɗ; a wof a wurzhè; a dzari amba nhi ɓai, nfersi a jèn ɓai,

⁸ a ndo a dè a gi na man a nzi a mèdèp, a ndohi man ta kuɗiaʼa ta shèwèlè a civèɗ;

⁹ ga teɓa verzhègenè nʼngesla ma, a kokwi guro a bèzl na, a kokwi mɓèl iyam a pasl na, a wof man a ma thal ngedas na;

¹⁰ ga mberfenèk a minè a deɓa a va mberfenèk, man a shkè te pa, a mèzhèɓ a minè a deɓa a sam Zhiklè, man a mva na.

Ma klèng

¹¹ Ndo ncèmma Zhiklè a gaɗa: Skwi tèlèba ambalai; skwi ambalai tèlèba. Tèlèba, skwi ambalai! Ndo ncèmma Zhiklè, nengaʼa ndo maya. A senda ta maya a ndohai, maya man a ntsenaʼa, a mwuzhèʼa, a ngoɗ a ngèlègèɗ ma kumba.

¹² Ndo ncèmma a hos ma man amba zhummaʼa a ndav, a windo ma zuraʼa tsarayaʼa.

¹³ Ma ndohi maya nara tsakwal. Ngèlègèɗ ma tengaʼa nara sulom. Ndo mɓer ta staɗ a mvau.

¹⁴ A vaʼa: kra ga, sundo maya te skwi haha! Ko mwindè a ɗèlèwèr kumba, a ndiv azɓi genè, nslebi ɗèlèwèr kumba, a ngeza ka va.

¹⁵ Te ndikè ma tip tèlèba: Aman ka tsena tèlèba, gu zlau Zhiklè! Dzodzor ma nkwèr nengaʼa! Aman nasa skwi man sèi ndohi tèlèba ta gia ndèzl.

¹⁶ Aman Zhiklè a da cko skwi staɗ staɗ tèlèba man ndohi ta gau a sam kita; skwi tèlèba man nʼngheda ba, ko amba, ko ambaɓai.