Ecclésiaste 10 - Ma Zhiklè

Bai a ɓèlè

¹ Aman dzuwi mʼmetsa a mbar, a ngedassa mbar ndo ncèkèslè mbar. Lèmèlèmè skwi nrzla kèshkata man a kala a va maya, a gedassa maya tèlèba.

² Ndo maya, maya na zhè te gèɗ na. Ndo nrzlaʼa, maya na te dengai.

³ Ko ndo nrzla man a dè a civèɗ, maya na azɓai. Ko wawa a gada: nasa ndo nrzlaʼa.

⁴ Aman bai a gi ndav a géɗ ngaya, nze ngaya nda-wazlangzlangaʼa, ka kèlè a mali mbiaʼa azɓai.

⁵ I rka skwi man ambaɓi ngiɗè a géɗ herkeda, ara skwi man a yakeda bai:

⁶ ta va na ndo mbiaʼa a ri a ndo nrzlaʼa. Aman ndohi mèshèlè ta pe ta a hai.

⁷ I rka ɓèlèlihi a deɓ plèsh, a wud bihi ta de a sak ara ɓèlèlihai.

⁸ Ndo man a ri vèvèɗ, a de kèlè a pa. Ndo man a mbéɗ zlazlar, zhüzhok a jè te pa.

⁹ Ndo man a bèzl kwa, a tsama na skwaʼa. Ndo man a cizl shèg-wa, a ngècè skwi mwuɗitpa.

¹⁰ Aman dzana ndosso ma, a ta tèslè azɓai, sèi ta ngélè a wuɗi a va. Dara ka tila skwi a maya.

¹¹ Aman zhüzhok a jè ndo, ga a mbèh skwi a vna, a ngècè a vna mè?

¹² Ma man a shkè auda te ma ndo maya, a va na pombai. Aman ma ndo nrzlaʼa a zeda va na.

¹³ A hinè ngèɗè a nrzlè kètè kètè, a rzlè a ma ma.

¹⁴ Ndo nrzla a njè ma a vaʼa a vaʼa, ko ndo a sun skwi man a di a shkè ɓai. Nda ngra na skwi man a da gi te deɓ nengaʼa wa?

¹⁵ Ndo nrzla a ngézhè te ri mizlinè na, ko civèɗ ndè daverzi a sun ɓai.

¹⁶ Wobau a géɗ kokwar, man bi nengaʼa wudahai, man wud bihi nengaʼa ta ndi skwi daga prèk langa.

¹⁷ Mwuffe a sam kokwar, man bi nengaʼa wuɗi na zhè, man wud bihi nengaʼa ta ndi skwi tiɗè sam nʼndi skwi ta, ta cückwe wuɗi ta, ta jèjèr zom azɓai.

¹⁸ A sam ndo wudar, géɗ gi nengaʼa mbakatemmaʼa; iyam a tkwè a pa.

¹⁹ Ndohi man ta woy a ta wuffè, ta ti skwi nʼndai. Zom a wuffèdè ndohai. A Suli ka ngècè skwi tèlèba.

²⁰ Ko ka a pa staɗ a géɗ ngaya genè, ka durɗo bi ɓai. A sam mʼmènè ngaya ba, ka durɗo ndo mèshèlè ɓai; aman kozlar a skwi ngiɗè man kelpasl a va, a da hada na ma ngaya a zlembaɗ.