Deutéronome 9 - Ma Zhiklè

Mpèsl ri Zhiklè

¹ Israel, tsenaʼa! A patsna ka da tèwèɗè woyam Jourdain, a ka da fen ta ndohi herkeda, mba tengaʼa, wuɗi tengaʼa zhèa fena man a ngaya, kokwarhi mbiaʼa, nʼngala te pa, ngurèʼa a vata.

² Ndohi mbibihiaʼa, ngur-gurhiaʼa, te verzi Anak, man ka sen ta, a ka tsena labar ma tengaʼa. A nslaha ta ndohi Anak wa?

³ A patsna ka suna, Ndo nzi pèc pècèk, Zhiklè ngaya, a dè a ma ngaya a ri na, ara vogwa man a ndi skwai; nengaʼa a da zede ta, nengaʼa a da wushede ta hai, a ka da dzam ta, a ka gedas ta tsam tsam, ara man Ndo nzi pèc pècèk a mpasla ka ri a pa.

⁴ Aman Ndo nzi pèc pècèk, Zhiklè ngaya, a dzam ta auda a ma ngaya ma, ka da hur te ndav ngaya ɓai: Ndo nzi pèc pècèk a dyè a haha, aman i kwèr kokwar haha, te man i ga zuraʼa. Ndo nzi pèc pècèk a ndzam ta auda a ma ngaya, a gèɗ mali tengaʼa man a ndev ɓai.

⁵ A géɗ nlèɓèslè ngaya ka ɓai, a gèɗ ndav ngaya man nzuraʼa ka ɓai, a gèɗ ngi-zuraʼa ngaya ka ɓai, man Ndo nzi pèc pècèk, Zhiklè ngaya, a ndzam ta ndohi herkeda haha; aman ka da dum kokwar tengaʼa, a géɗ man mali ta a ndev ɓai. A ma nengaʼa man a mbaɗa ta a Abraham, Isaac a Jacob, babhi ngaya, a ndikeda.

Ndzoan man ta gu a der za Horeb

⁶ A ka da suna. Ndo nzi pèc pècèk, Zhiklè ngaya, a mva ka kokwar mbelaʼa haha, aman ka kwèrèʼa, a gèɗ nlèɓèslè ngaya ka ɓai. Aman kinè ndohi mèdègèɗ.

⁷ Huro, ara man ka poko na gèɗ ndav auda a Ndo nzi pèc pècèk, Zhiklè ngaya, tʼhèshèkèɗ; da pca ka a gèɗ ɓai! Ka gu mèdègèɗ a sam Ndo nzi pèc pècèk a hünko te pats man kin shkè auda te kokwar Egypte, ha mshkè kinè a sam haha.

⁸ A der za Horeb ba kin poko na gèɗ ndav auda a Ndo nzi pèc pècèk; a nengaʼa a woya a nzede kinè a ndav.

⁹ Aman i do a géɗ za, a i ngècè kwa, kwa nderzlè-ma Ndo nzi pèc pècèk, man a nderzla va a nda kinè, i nza a géɗ za mʼmèn 40, a pats a vad; i nda movar ɓai, i sa iyam ɓai.

¹⁰ A Ndo nzi pèc pècèk a mvay kwa cèw, man a Windo skwi a pa a ri na, ma tèlèba man Ndo nzi pèc pècèk a ngaɗa kinè a géɗ za, te va vogwa, a pats mɓicè-va.

¹¹ Te deɓ mʼmèn 40, a pats a vaɗ. Ndo nzi pèc pècèk a mpay kwa cèw, kwa nderzlè-ma.

¹² A ngadayè: Slambaɗa, sulomahi tsam tsam; ndohi ngaya man ka helka ta auda te kokwar Egypte, ta gi malai. Tsam tsam ta jèkeda civèɗ man i ngra ta. Ta gau marai a ta tsu ri a nengaʼa.

¹³ Ndo nzi pèc pècèk a ngaɗayè: I rkaʼa, ndohi haha ta tsena gèɗ ɓai.

¹⁴ Antanta i woy a i gi ndav a vata a géɗ tengaʼa, a i gedas ta. Te deɓaʼa i woy a i ge ka a verzi ndohi mbiaʼa, man wuɗi na zhè, a fena ndohi haha.

¹⁵ A i ngwoda va ga, a i shkèhi te za man vogwa te pa, kwa man nderzlè-ma a pa, te rai.

¹⁶ A i pu dai, a i rkaʼa, kin gu malai a sam Ndo nzi pèc pècèk, Zhiklè kinè. Kin gu marai. Tsam tsam kin jèkeda civèɗ man Ndo nzi pèc pècèk a ngra kinè.

¹⁷ A i hul kwa cèw, i wushedahi a ri cèw, a kwa mpasla a sam di kinè.

¹⁸ A i kalahi a deɓ sak Ndo nzi pèc pècèk lèmèlèmè ara nshèlèkuraʼa, mʼmèn 40, a pats a vaɗ, i nda skwa ɓai, i sa skwa ɓai, a géɗ mali tèlèba man kin gau, man kin gu skwi man ambaha Ndo nzi pèc pècèk ɓai, a kin poko na gèɗ ndav auda a vna.

¹⁹ Aman i gu zlau a sam ndzoan Ndo nzi pèc pècèk man a gu ndav a géɗ kinè, ha a woya a gedas kinè. Aman Ndo nzi pèc pècèk a ntsena ntsi ri ga a va zaʼa.

²⁰ Zhiklè a ngu ndav kumba a géɗ Aaron ba, a woya a nzeda; a i tsu rai a géɗ Aaron ba a pats sa.

²¹ A marai man kin gau, a kin gu mali a vna, i co a i fa na vogwa i batsedaussa, a i kerɗaʼa ara mberfenèk, a i wusheda a woyam man a shkèhai te za.

²² Te Tabeéra, te Massa, te Kibroth-Hattaava ba, kin poko na gèɗ ndav auda a Ndo nzi pèc pècèk.

²³ Aman Ndo nzi pèc pècèk a nzlinde kinè a Kades-Barnéa, a ngaɗa kinè: Vo-do, va-duma kokwar man i va kinè! Kin gu mèdègèd a sam ma Ndo nzi pèc pècèk, Zhiklè kinè, kin ca a ndav ɓai, kin tsena ma nengaʼa ɓai.

²⁴ Aman daga man i sen kinè, kinè gi mèdègèd genè!

²⁵ A i mana a sam Ndo nzi pèc pècèk mʼmèn 40, a pats a vaɗ, a géɗ man Ndo nzi pèc pècèk a gaɗa, a woya a nzede kinè.

²⁶ A i tsu ri a Ndo nzi pèc pècèk, a i gaɗa: Ndo nzi pèc pècèk, Zhiklè nga, ka gedassa ndohi ngaya, skwi nʼndi gi ngaya ɓai, man ka preka ta auda a wuɗi ngaya mbiaʼa, man ka helka ta auda te Egypte a ri man wuɗi na zhè!

²⁷ Hur Abraham, Isaac a Jacob, ɓèlèlihi ngaya! Ka hur a géɗ mèdègèd a shèwa a mali ndohi haha ɓai!

²⁸ Man ɓai ndohi man ka helka nga auda te kokwar ta, ta da gaɗa: A géɗ man Ndo nzi pèc pècèk a slaha a nde ta a kokwar man a mpasla ta a ri ɓai, a géɗ man ndo mayam ta, a nhelka ta auda, a nzede ta tʼhèshèkèɗ.

²⁹ Aman tengaʼa ndohi ngaya, skwi nʼndi gi ngaya man ka helka ta auda a wuɗi ngaya mbiaʼa, a ri ngaya man ngeda.