Deutéronome 4 - Ma Zhiklè

Moise a bid ta ndohai

¹ Anai Israel, va-tsena ma nkwèrè a ma kita man i njè kinè, a kin jèjèrèʼa, a kin nzi a nshèffè, a kin dè a kokwar man Ndo nzi pèc pècèk, Zhiklè babhi kinè, a va kinè, a kin kwèrèʼa.

² Ma man i njè kinè, kin pu a vaʼa ɓai, kin helaha ɓai! Va-dzodzor ma nkwèr Ndo nzi pèc pècèk, Zhiklè kinè, man i njè kinè!

³ Kin rka a di kinè skwi man Ndo nzi pèc pècèk a gu te Baal-Peor, man Ndo nzi pèc pècèk, Zhiklè kinè, a gedas ta ndohi tèlèba man ta dzodzor Baal-Peor, te ndev kinè.

⁴ Aman kinè man kin gso va a Ndo nzi pèc pècèk, Zhiklè kinè, a patsna ba kin nzi a nshèffè.

⁵ Na haha, i njè kinè ma nkwèrè a ma kita, man Ndo nzi pèc pècèk, Zhiklè ga, a njèy a gèɗ. Va-dzodzora, va-gu arsa, te kokwar man kin da de a pa, a kin kwèrèʼa.

⁶ Kin da jèjèrèʼa, a kin da gi arsa. Aman ndohi ta da rka maya kinè a zhè, kin sun skwai, aman ta da tsena ma nkwèr haha tèlèba, a ta gaɗa: Verzi ndohi mhur haha, ndohi maya, ndohi man ta sun skwai.

⁷ Ndohi herkeda mbia ngiɗè tema, man Zhiklè tengaʼa a zhè ndul ndul a sam ta, ara Ndo nzi pèc pècèk, Zhiklè nga, pèc pècèk man nga tsi ri a nengaʼa?

⁸ Kokwar-bi mbiaʼa tema, man ta ngots ma nkwèr a ma kita zuraʼa ara ma kita haha tèièba man i va kinè a patsna?

⁹ Aman vo-huro, va-gu maya, a gèɗ nshèffè kinè! Skwi man kin rkaʼa, da pca kinè a gèɗ ɓai, da shkè auda te gèɗ kinè ɓai, a pats nshèffè kinè tèièba. Kin njè ta wudahi kinè, a wud wudahi kinè.

¹⁰ Va-huro pats man kin zlatsa a sam di Ndo nzi pèc pècèk, Zhiklè kinè, a der za Horeb, aman Ndo nzi pèc pècèk a gaɗayè: ɓic ta ndohai, a i njè ta ma ga, a ta slebi ngi zlau ga a pats nshèffè ta tʼherkeda tèièba, a ta slebda ta wudahi ta.

¹¹ A kin herda na va a za, a kin zlatsa a der za. Za mvatsa ara vogwa, a zlècèdè va a ndè a giɗfèk, te va sam téɗéɗikaʼa.

¹² Te deɓaʼa Ndo nzi pèc pècèk a ngaɗka kinè te va vogwa. Kin tsena daʼai nengaʼa, aman kin rka nengaʼa ɓai. Sei ngèɗè nengaʼa genè!

¹³ A ngreda kinè nderzlè-ma nengaʼa, a njè kinè aman kin jèjèrèʼa, ma kula sa, a mwindeda deɓ kwa cèw.

¹⁴ Te ndev nasa, Ndo nzi pèc pècèk a njèy a gèɗ, aman i slebda kinè ma nkwèr a ma kita a kin da jèjèrèʼa te kokwar man kin dè dè a pa a kin kwèrèʼa.

¹⁵ Va-gu maya a gèɗ nshèffè kinè! Kin rka ndo ɓai, kin tsena man a gaɗka kinè genè, a pats man Ndo nzi pèc pècèk a ngaɗa kinè a der za Horeb, te va vogwa.

¹⁶ Kin da gu mali ɓai, a kin gu skwi ngidè a kin lèmdèʼa a Zhiklè ɓai, ko ara nguraʼa, ko ara ngwozaʼa,

¹⁷ a kin lèmdèʼa a skwi ndzham a gèɗ herkeda, a ɗiak man a hi te giɗfèk ɓai!

¹⁸ Kin lèmdèʼa a skwi nda-a-hwaɗ, a klèf te woyam ɓai! Va-gu maya a gèɗ nshèffè kinè!

¹⁹ Skwi te giɗfèk tèièba, ara pats, kia, bantihai, skwi a giɗfèk tèièba, da pe kinè a wi ɓai, kin tsu ri a tengaʼa ɓai, kin gurɓahi a sam ta ɓai! Ndo nzi pèc pècèk Zhiklè kinè a ngeda a giɗfèk a gèɗ ndohi herkeda tèlèba.

²⁰ Aman kinè, Ndo nzi pèc pècèk a mpar kinè auda, a nhel kinè auda te gezla, te kokwar Egypte, a kin ndi a skwi na, ara man kin giaʼa a patsna.

²¹ Te deɓaʼa Ndo nzi pèc pècèk a ngu ndav a géɗ ga, a géɗ ma kinè, a ngoɗ a mbèɗè, aman i tèwèɗè woyam Jourdain azɓai, a i dè a kokwar mbelaʼa man Ndo nzi pèc pècèk, Zhiklè kinè, a va kinè a skwi kinè, azɓai.

²² Sèi i metsi a haha, i dè tèwèdè woyam Jourdain azɓai. Aman kinè, kin dè tèwèɗèʼa, a kin da ngècè kokwar mbelaʼa sa!

²³ Va-gu maya nderzlè-ma Ndo nzi pèc pècèk, Zhiklè kinè, man a derzla ma a nda kinè, da pca kinè a gèɗ ɓai! Kin gu skwi ngidè ara Zhiklè ɓai, kin gu mèzhèɓ skwi ɓai, man Ndo nzi pèc pècèk, Zhiklè kinè, a ngaɗa kinè: kin da gu ɓai!

²⁴ Aman Ndo nzi pèc pècèk, Zhiklè kinè, vogwa man a ndi skwai, Zhiklè srak!

²⁵ Aman kin ngeda verzi kinè a kokwar ma, a kin gi malai a kin gi skwi ngidè man kin lèmdèʼa a Zhiklè, mèzhèɓ skwi mèmè, a kin gi skwi man ambaha Ndo nzi pèc pècèk, Zhiklè kinè ɓai, a kin poko na gèɗ ndav auda a vna,

²⁶ a patsna i bèhè giɗfèk a herkeda a malwuɗi a géɗ kinè — kin da zi kinè tʼherkeda man kin tawaɗa woyam Jourdain a pa, a kin nzi a pa azɓai, kin da gedas kinè.

²⁷ Ndo nzi pèc pècèk a da ksar kinè a va ndohi herkeda, njèkè kinè kètè genè te va ndohi herkeda man Ndo nzi pèc pècèk a de kinè a pa.

²⁸ Te pa kin da jèjèr zhiklè mbèh skwai, skwi man ri ndo a ngau, ko wof ko kwa, man ta rka di ɓai, man ta tsena zlembaɗ ɓai, man ta ndi skwa azɓai, man skwa a zhkèha ta azɓai.

²⁹ Te pa kin da hèsh Ndo nzi pèc pècèk, Zhiklè kinè zaʼa. Aman kin da woyaʼa a ndav kinè tèièba, a nshèffè kinè tèièba, kin da ngècèʼa.

³⁰ Aman kinè te matakwan, a fena wuɗi kinè, a skwi man a gi te ndikè-ma skwai a ga kinè tèièba, kin da ngwodko ndav kinè a sam Ndo nzi pèc pècèk, Zhiklè kinè, a kin da tsena daʼai nengaʼa,

³¹ te man Ndo nzi pèc pècèk, Zhiklè kinè, Zhiklè man ndo a sia te va, a da jèke kinè a pa azɓai, a da zede kinè azɓai, nderzlè-ma nengaʼa man a nderzlaʼa a nda babhi kinè a mʼmbèɗè, a pca na a gèɗ azɓai.

³² Gar haha, vo-dzhoɗo a gèɗ skwi man a gu zlèzlèa, man kinazdi ɓai, a hinè a pats man Bi Zhiklè a ngu ndo a gèɗ herkeda. Te verzi herkeda ngiɗè a ndè a verzi herkeda ngidè, ta rka skwi mbiaʼa ar haha ɗè, ta tsena ma aranta dè?

³³ Ndohi man ta tsena daʼai Zhiklè man a gèdè te va vogwa, ara man kin tsenaʼa, a ta nza a nshèffè, ta zhi dè?

³⁴ Man ɓai, Zhiklè man a shkè a sam ndohi na, a helka ta auda te va ndohi herkeda ngidè, a skwi man a njkede ta, a skwi man a ngreda auda, a nrkedai, a var, a ri nengaʼa man wuɗi na zhè, a ngeda ri na, a ngu skwi mbiaʼa, wuɗitpa, ara man Ndo nzi pèc pècèk, Zhiklè kinè, a gau tèlèba a sam di kinè, a géɗ kinè, te kokwar Egypte, ngidè a zhi dè?

³⁵ Kin rka a di kinè, aman kin suna, Ndo nzi pèc pècèk, nengaʼa Bi Zhiklè stadgenè, ngidè azɓai.

³⁶ A ngaɗka kinè te zhiklè te gédèʼa, aman a senda kinè. A nʼngra kinè vogwa nengaʼa tʼherkeda, a kin tsena ma nengaʼa te va vogwa.

³⁷ A gèɗ man a woy babhi kinè, a mpar ta ndohi te verzi tengaʼa auda, a nhelka kinè auda te kokwar Egypte, nengaʼa a ri na, a wuɗi nengaʼa mbiaʼa.

³⁸ A dzam ta ndohi mbibihiaʼa man wuɗi ta zhè, auda a ma kinè, aman a de kinè a kokwar man a va kinè a skwi kinè, ara man a zhè a patsna.

³⁹ Gar haha a patsna kin suna, a kin hérè te ndav kinè; Ndo nzi pèc pècèk, nengaʼa Bi Zhiklè te giɗfèk, a géɗ herkeda ba, ngidè azɓai.

⁴⁰ Kin da jèjèr ma nkwèr nengaʼa, a ma man a njè kinè a gèɗ, man i gaɗa kine a patsna, a kinè a wudahi kinè kin nzi amba amba, a kin nzi dai tʼherkeda man Ndo nzi pèc pècèk, Zhiklè kinè, a va kinè a mèdèp.

⁴¹ Te deɓaʼa Moise a mpor kokwar makar, te wud woyam Jourdain, te civèɗ mvèng pats,

⁴² aman ndo nkeɗe ndo, man a jkeda nslamagi na, a nʼnga na a rai, a gu ashèwa ka ɓai, a slaha a nhi a pa, ndo matarai, a mbél nshèffè na.

⁴³ Betser, tʼhèshèkèɗ, a vara, a sam ndohi Ruben; Ramoth, te Galaad, a sam ndohi Gad; Golan, te Basan, a sam ndohi Manassé.

Ma kita Zhiklè

⁴⁴ Nta ma kita man Moise a mva ta ndohi Israel.

⁴⁵ Na haha ma nde ta, ma nkwèrè, ma kita man Moise a njè ta ndohi Israel, man ta shkè auda te kokwar Egypte,

⁴⁶ te wud woyam Jourdain, te nkulgodok, zuraʼa a Beth-Peor, te kokwar Sihon, bi ndohi Amor, man a nza te Hesbon, man Moise a ndohi Israel ta keɗaʼa, te deɓ man ta shkè auda te Egypte ma;

⁴⁷ a ta duma kokwar na, a kokwar Og, bi Basan, bihi ndohi Amor cèw, man ta nza te wud woyam Jourdain, te civèɗ mvèng pats,

⁴⁸ a hinè te Aroer, a ma woyam Arnon, ha ndè a za Hermon,

⁴⁹ a vara tèlèba, te wud woyam Jourdain, te civèɗ mvèng pats, ha ndè a ma woyam mbiaʼa a vara, a der za Pisga.