Deutéronome 1 - Ma Zhiklè

Moise a ngredè ma kita

¹ Na haha ma man Moise a gaɗa ta ndohi Israel tèlèba, tʼuna te wud woyam Jourdain, tʼhèshèkèɗ, a vara, zuraʼa a kokwar Suph, te ndev Paran a Tophel, Laban, Hatséroth a Di-Zahab.

² Aman ka jèkeda za Horeb a deɓa, ka mènè a civèɗ staɗ, ga ka ndikè a Kades-Barnea, a civèd za Seir.

³ A Moise a ngaɗa ta ma man Ndo nzi pèc pècèk a njè na a gèɗ, te mvi 40, a ki 11, a pats nshèlèkuraʼa.

⁴ Te deɓ man a nkeɗa Sihon, bi Amor te Hesbon, a Og, bi Basan, te Ashtaroth a Edrei.

⁵ Tʼuna te wud woyam Jourdain, te kokwar Moab, Moise a hüno a njè ta ma kita haha, a nagaɗa:

⁶ Ndo nzi pèc pècèk, Zhiklè nga, a ngaɗa nga a der za Horeb: Kin nza a der za haha kumba.

⁷ Va-ngalda ma kinè a civèd ngidè, va-slambaɗa a sam na haha, vo-do a za ndohi Amor, a sam nslamagihi ta tèlèba, a vara, te za, tʼhèshèkèɗ, te Négeb, a ma woyam mbiaʼa, a kokwar ndohi Canaan a Liban, ha ndè a ma woyam mbiaʼa, woyam Euphrate.

⁸ Na haha, i va kinè kokwaraʼa, vo-do, va-duma kokwar man Ndo nzi pèc pècèk a mpasla ta ri a babhi kinè a mbèdè, a gaɗa i da va ta a Abraham, Isaac, a Jacob, a ndohi te verzi ta.

⁹ Te va nasa i gaɗa kinè: I slaha kinè a géɗ ga azɓai.

¹⁰ Ndo nzi pèc pècèk, Zhiklè babhi kinè, a gu a kin mènè a vata, a patsna kinè kumba kumba ara bantihai te giɗfèk.

¹¹ Ndo nzi pèc pècèk, Zhiklè babhi kinè, da gu a kin mènè a vaʼa a vata, gozhèm gozhèm kumba, da pshè kinè ma, ara man a goɗo.

¹² Iyè a géɗ ga, i slaha kinè ɗè, kin nzalayè va a gèɗ, kin gay wuɗai, kin bèzl va!

¹³ Va-hulko ngurhi man maya ta zhe, man ta sun maya, man ta slebau skwai, te verzi staɗ staɗ tèlèba, a i ge ta a ndohi ncè kinè ma.

¹⁴ A kin mbeɗay a ma a kin gaɗayè: Skwi man ka woy a ka giaʼa, amba.

¹⁵ A i hul tsuvom ndohi te verzi kinè, ndohi man maya ta zhè, man ta slebau skwai, a i ge ta a ndohi ncè kinè ma, bihi a géɗ ndohi gozhèm gozhèm, bihi a géɗ 100, 100, bihi a géɗ 50, 50, bihi a géɗ 10, 10, a ndohi mwindè ɗèlèwèr, ara verzi kinè ara verzi kinè, tèlèba kin ngotso.

¹⁶ Te ndev nasa i njè ta ma a gèɗ a ndohi kita kinè, a i gada ta: Va-fu zlembaɗ a ma kramamhi kinè, va-gu kita tengaʼa zuraʼa, man ma a zhè te ndev ndo ngidè a kramam nengaʼa, te ndev nengaʼa a ndo mbrok te gi na.

¹⁷ Kin por ndo mpèrè a sam kita ɓai! Va-fu zlembaɗ a ma mbelaw ndohi lèmèlèmè ara ma ndohi mbibihiaʼa. Kin gu zlau ndo ɓai; aman ma kita a Zhiklè. Kita man a fena wuɗi kinè, va-ckoɗa a sam ga, a i tsnaʼa.

¹⁸ Te ndev nasa i njè kinè skwi haha tèlèba man kin da giaʼa.

Ndohi nzebi kokwar

¹⁹ A nga slambaɗa a sam za Horeb, a ngo do a nga beza a ndev hèshèkèɗ mbiaʼa, wuɗitpa, ara man kin rka a di kinè, a civèd nda a za ndohi Amor, ara man Ndo nzi pèc pècèk, Zhiklè nga, a gaɗa nga. A nga ndikè a kokwar Kades-Barnea.

²⁰ Te deɓaʼa i gaɗa kinè: Kin ndika a sam za ndohi Amor, man Ndo nzi pèc pècèk; Zhiklè nga, a mva nga.

²¹ Wora, Ndo nzi pèc pècèk, Zhiklè ngaya, a va ka kokwar na a ma ngaya. Co, ka dumaʼa, ara man Ndo nzi pèc pècèk, Zhiklè babhi ngaya a gada ka. Ka gu zlau ɓai, ka gudzu ɓai!

²² Te deɓaʼa kin herdekay va tèlèba, a kin gaɗayè: Nga woya nga zlindè ngurhi a ma nga, a ta zeɓi kokwar, a ta shkè a ta ngra nga civèd man nga da bizhè a pa, a ta menda nga ma kokwar man nga da dè a pa.

²³ Ma kinè ambahayè, a i hul ndohi 12 te va kinè, staɗ staɗ te verzi kinè tèlèba.

²⁴ A to do a géɗèʼa, to do za, a ta ndikè a sam dzurv iyam Eshcol, a ta zeɓau.

²⁵ A ta ngulkoɗi nyi wof kokwar, a ta hulkoɗa a sam nga, a ta menda nga: Kokwar man Ndo nzi pèc pècèk, Zhiklè nga, a mva nga, amba.

²⁶ Aman kin woy ndè a pa ɓai. Kin gu mèdègèɗ a géɗ ma Ndo nzi pèc pècèk, Zhiklè kinè.

²⁷ Kin gu ma num-numaʼa te gi kinè, a kin gaɗa: Ndo nzi pèc pècèk a nhelka nga auda te kokwar Egypte a shèwa, aman a va nga a ri a ndohi Amor, aman a nzede nga.

²⁸ Nga dè ma? Kramamhi nga ta pa nga zlau a gèɗ, ta gaɗa nga: Ndohi ngata ta fen nga, ndohi mbibihiaʼa. Kokwar tengaʼa mbiaʼa, nʼngala te pa a zlazlar ngurèʼa. Nga rka ndohi te verzi Anak te pa!

²⁹ Te deɓaʼa i gaɗa kinè: Kin gudzu ɓai, kin gu zlau tengaʼa ɓai!

³⁰ Ndo nzi pèc pècèk, Zhiklè kinè, a dè a ma kinè, nengaʼa a da gi var te di man a kinè, ara man a gu halaʼa te kokwar Egypte, a sam di kinè,

³¹ ara man a gu tʼhèshèkèɗ, a wara kinè di a civèɗ tèlèba man kin beza a pa, ara bab kra man a wara na di a kra, ha kin ndikkaɗa haha.

³² Ko ar haha kin pi ndav a Ndo nzi pèc pècèk, Zhiklè kinè, azɓai,

³³ nengaʼa man a do a ma kinè, a nwoya kinè sam man kin mènè a pa; a vad te va vogwa, a kin rka civèd man kin da dè a pa; a pats te va vanai.

Caleb a Josué

³⁴ Ndo nzi pèc pècèk a ntsena ngèdè kinè, a ngu ndav, a mʼmbaɗa:

³⁵ Ko staɗ te va ndohi haha, te verzi ndohi ambaɓihiaʼa haha, da da rka kokwar mbelaʼa man i pasla ta ri a hi a babhi kinè asaɓai.

³⁶ Sèi Caleb, kra Jephunné, nengaʼa da da rkaʼa, a i da va na kokwar a da mbècè sak a pa, a wudahi nengaʼa, a géɗ man a ndzadzarkayè pèc pècèk.

³⁷ Ko a géɗ ga ba. Ndo nzi pèc pècèk a ngu ndav, a géɗ ma kinè, a ngaɗa: Ka ba, ka da ndikè a pa azɓai!

³⁸ Josué, kra Nun, nengaʼa man a zhè a sam ngaya, a da ndikè a pa. Va-na wuɗi a nengaʼa, aman nengaʼa a da va ta kokwar a Israel a skwi nʼndi gi ta.

³⁹ A wud wudahi kinè, man kin gaɗa, ta da zi ta, a wudahi kinè man a patsna ta sun maya nɗèl skwi di ɓai, gar amba, gar ambaɓai, tengaʼa ta dè a pa, tengaʼa ta da ngècèʼa a skwi ta.

⁴⁰ Aman kinè, va-men kinè a deɓa a hèshèkèɗ, a civèd ndè a woyam mbiaʼa.

Ndohi Amor ta dzam ta ndohi Israel

⁴¹ Te deɓaʼa kin gaɗayè: Nga gu malai a sam Ndo nzi pèc pècèk! Nga da dè a nga da gi var, tèlè ara man Ndo nzi pèc pècèk, Zhiklè nga, a njè nga a gèɗ. Te deɓaʼa kin dzawa va kinè a skwi var, a kin hur wuɗi te pa ɓai, a kin dè za.

⁴² Aman Ndo nzi pèc pècèk a ngadayè: Gaɗa ta: Kin do var ɓai, iyè az a sam kinè ɓai! Man ɓai mayamhi kinè ta da bazl kinè!

⁴³ A i gaɗa kinè; aman kin woy a kin tsena ɓai. Kin gu mèdègèɗ a géɗ ma Ndo nzi pèc pècèk, kin gu gèɗ a kin do za.

⁴⁴ A ndohi Amor man ta te za, ta shkè a ta gu var a nda kinè, ta hu a verzi kinè ara vongwom, a ta dzam kinè, ha ndè Seir, ha ndè Horma.

⁴⁵ A kin shkè a deɓa, a kin kuɗai a sam Ndo nzi pèc pècèk; aman Ndo nzi pèc pècèk a nfa zlembaɗa ma kinè asaɓai.

⁴⁶ Te deɓaʼa kin nza te Kades nʼnzi a zhè.