Daniel 8 - Ma Zhiklè

Drok a mazawal

¹ Aman bi Belshatsar a ngu bi te mvi mamakaraʼa, iyè Daniel, i rka skwi ngiɗè te nshunè zaʼa, ara te va nasa.

² I rkaʼa ara man i te Suse, kokwar mbiaʼa, te herkeda Elam.

³ I rkaʼa ara man iyè a ma woyam Ulai. I pu dai a i ngul dai, a i rka drok, zuraʼa a ma woyam. Drom drok cèw, drom ngur-gurèʼa, ngiɗè a fena ngiɗè. Nengaʼa man a fena ngiɗè a greka te deɓaʼa.

⁴ I rka drok a kèl gèɗ te civèɗ nkèl pats, te civèɗ man a tsagi a tsagai. Ko skwi dak mèmè a slaha a nzlècè a sam na ɓai. Ndo a mbelè auda te ri wuɗi nengaʼa azɓai. A gu ara man a woyaʼa, a nʼnga a mbiaʼa.

⁵ A i woy a i sun verziaʼa, na haha: mazawal a mshkè te civèɗ nkèl pats, a gèɗ herkeda tèlèba, a mbècè sak na a herkeda azɓai. Mazawal sa a drom mbiaʼa a medi nengaʼa.

⁶ A ndo a sam drok, man drom cèw man i rka a nzlatsa zuraʼa a ma woyam. A nhau a ta kol gèɗ a wuɗi a vata.

⁷ I rka a ndikè a sam drok, ndav a ndza na a géɗ nengaʼa. A nkol drok, a mpaslama na drom cèw, wuɗi drok azɓai, a slaha a nzlècè a sam na azɓai. A ntseda drok a herkeda, a mbatsaha a sak, ndo a slaha a mbela drok te ri na ɓai.

⁸ Mazawal nʼnga a mbiaʼa a vata. Aman wuɗi na a zhè holholaʼa ma, drom mbiaʼa a mpasl na. Dromhi mbiaʼa faɗ ngiɗè ta ftskaɗa a samaʼa, te civèɗ kozlar faɗ.

⁹ Drom nkèshèʼa ngiɗè a mshkè auda te va drom ngiɗè staɗ, nʼnga a mbiaʼa a vata te civèɗ man a tsagai, te civèɗ mvèng pats, te civèɗ kokwar nkezlaʼa.

¹⁰ A ngraʼa, a ndikè a giɗfèk a sam skwihi zhiklè, a wusheda skwihi a bantihi kètè a hai a herkeda, a mbatsaha ta a sak.

¹¹ A ngraʼa, a ndikè a sam bi skwihi te zhiklè, a ta va na skwi asaɓai ara man ta va na pèc pècèk a nciɗ sam a nciɗ sam. Sam nengaʼa nkezlaʼa ta ksardaussa.

¹² Te di skwi man ta va na pèc pècèk, ta feda skwi a pa man ta derɗa a vna. A ntseda ma nzuraʼa a hi a herkeda, a gi aranta a mbiaʼa, a skwi man a hüno a ngiaʼa, a slaha a nrufaʼa.

¹³ I tsena gol Zhiklè ngiɗè man a gaɗa na ngiɗè: Skwi nshunè a ndikè ta ahngwa? Ta va na skwi a nciɗ sam a nciɗ sam azɓai, ta feda skwi man ta derdè a vna te diaʼa, a ta gedassa sam nkezlaʼa, a ndikè ta ahngwa?

¹⁴ A ngaha na: Mʼmèn 2.300, vaɗ a pats. Te deɓaʼa ta da til sam nkezla zaʼa.

Ngrédè verziaʼa

¹⁵ Iyè Daniel i rka nshunè, a i hur a géɗèʼa, i woy a i sun verziaʼa. Na haha ndo ngiɗè a nzlatsa a pa, nguraʼa.

¹⁶ I tsena ngèɗè ndo a géɗ woyam Ulai. A mboho a ngaɗa:

¹⁷ Gabriel, ngra na verzi nshunè a ndo sa! A nengaʼa a mshkè a sam man i zlatsa a pa. Aman a mshkè, i gu zlau, i kalahi a herkeda, a medi tʼhai. A ngaɗayè: Tsena, ka ndo, nshunè a goɗ a géɗ ndikè-ma skwai.

¹⁸ Aman a ngadayè, i ɓerzl ga, a medi tʼhai. Nengaʼa a nlamayè, a nzlatsedyè a samaʼa.

¹⁹ Te deɓaʼa a ngaɗa: Na haha I ngra ka skwi man a di a gai a pats ndzoan te deɓaʼa. Nshunè a goɗ a géɗ ndikè-ma skwai.

²⁰ Drok a dromhi cèw man ka rkaʼa, nasa bihi Medes a Perses.

²¹ Mazawal, nasa bi Javan. Drom mbiaʼa a medi na, nasa bi nshèlèkuraʼa.

²² Aman a mpasla dromhi ngiɗè faɗ man ta shkè auda a samaʼa, nasa kokwar-bihi faɗ man ta shkè auda te kokwar-bi nengaʼa. Aman mbi tengaʼa ara man a nengaʼa ka ɓai.

²³ A pats nʼndikè-ma: bi tengaʼa, aman ndohi malihai ta ndikeda mali ta, bi ngiɗè a shkè, a pi di shèwa, a sun maya nʼngwèdè ndo.

²⁴ Wuɗi nengaʼa a gi a mbiaʼa, aman te wuɗi nengaʼa ka ɓai. A da gi matakwan mbiaʼa, te skwi tèlèba man a giaʼa, a gi a ngulaʼa, a da zede ndohi mbibihiaʼa.

²⁵ A maya nʼngwèdè ndo nengaʼa a da gedassa ndohi nkezlaʼa, a slaha a ngwode ta a maya na. A ngrè gèɗ kumba. Tsam-tsam a gedas ta ndohi kumba. A slambaɗa na va a bi a géɗ bihai, aman ta da tsedahai, ri ndo a ngia ka ɓai.

²⁶ Ma nshunè a géɗ vaɗhai a patshai a ngoɗ zuraʼa a vava. Aman ka, ngheda ma nshunè te man a goɗ a géɗ pats ngiɗè man a ma dra.

²⁷ Iyè Daniel, mʼmèn a zhè, i mbelakaɓai, wuɗi ga azɓai. Te deɓaʼa i slambaɗa zaʼa, a i gu mizlinè bai. I ba i rzl ga a géɗ nshunè, a i sun verzia ɓai.