Daniel 7 - Ma Zhiklè

Skwi ngiɗè a nrka na di a Daniel

¹ Aman Belshatsar, bi Babylone, te mvi nshèlèkuraʼa, nshunè a nkeda Daniel, skwi ngiɗè a nrka na di te nshunè, a sam mʼmènè na. A mwindeda nshunè nengaʼa a ɗèlèwèr.

² Daniel a ngaɗa: I rka te nshunè a vaɗ, ara man kozlar te zhiklè, te tsagi faɗ, a ngeda iyam te woyam mbiaʼa.

³ Skwi dak mbibihiaʼa faɗ ta shkè auda te woyam, ta az lèmèlèmè ɓai.

⁴ Nshèlèkuraʼa ara marizhèlè, a kelpasl mangayak a va. I pu dai, a nasa nasa ta ptso ma na kelpasl auda a va. A nslambaɗa tʼherkeda, a nzlatsa a sak ara ndo, a nʼngots maya ara ndo.

⁵ Skwi dak ngiɗè a mshkè, macecèwaʼa, lèmèlèmè ara kokoya, civèɗ va nengaʼa ngiɗè tʼhai, civèɗ va nengaʼa ngiɗè nzlatsa. Zlèʼèn mbibihia makar te ma, ta shkè auda te ndev zlèʼèn ngiɗè.

⁶ Ta gaɗa na: Slambaɗa, ndau zluèɗ kumba! A i pu dai, a i rka skwi dak ngiɗè lèmèlèmè ara nvalaval, kelpasl faɗ a va ara ɗiak. Gèɗ, a va skwi dak faɗ, a nʼngots wuɗai.

⁷ A i rka te nshunè a vaɗ, skwi dak mafadaʼa, mbiaʼa, a pi zlau a gèɗ a ndo, wuɗi na zhè a vata. Zlèʼèn züdo te ma. A nʼndau skwai, a mpeɗau skwai, njèkèɗiaʼa a mbatsaha a sak. Az lèmèlèmè ara skwi dakhi nshèlèkurhiaʼa ɓai. Drom te gèɗ kula.

⁸ I wor drom; na haha drom ngiɗè nkèshèa a nftska te pa, a dromhi ngiɗè makar ta proslkoɗauda te pa a samaʼa. Di nengaʼa a zhè, ara di ndo; ma nengaʼa man a gèɗè ma mbiaʼa.

⁹ A ta feda sam nʼnzi bihi a pa, a ndo man nhala hurnjüfnjüfaʼa nʼnza a pa, maslaka nengaʼa nslekadaʼa ara gogumai, gwots gèɗ nengaʼa nslekaɗaʼa ara gwots tambak. Sam nʼnzi bi nengaʼa, nèʼèn vogwa, sak a sam nʼnzi bi nengaʼa ba, vogwa mvatsa.

¹⁰ Nèʼèn vogwa a nhakaɗauda te pa, ndohi gozhèm gozhèm kumba ta gi mizlinè nengaʼa. Ndohi gozhèm gozhèm gozhèm a vaʼa man ta zlècè a sam na. A ta ga kita, a ta winè ɗèlèwèr.

¹¹ A i pu dai, a gèɗ nhèzlèwè mbiaʼa man drom a ngoɗ ma nengaʼa. I pu dai, ha ta keɗa skwi dak, a ta gedassa va nengaʼa, a ta kalda a vogwa mvatsaʼa.

¹² A skwi dakhi ngiɗè ta cèmá ta wuɗi ta, a ta ngela kuma nshèffè ta.

¹³ A i rka te nshun ga a vaɗ: Ndo ngiɗè a mshkè te zhiklè, te va vanai, lèmèlèmè ara kra ndo. A mshkè a sam ndo nhala sa, a ta da a sam nengaʼa.

¹⁴ A ta va na wuɗai a nʼnjèlè a wuɗi bai, a ndohi herkeda te verzi tsaɗ tsaɗ a nèʼèn tsaɗ tsaɗ tèlèba ta gu mizlinè nengaʼa. Wuɗi nengaʼa, wuɗi man a nzi a mèdèp, man a ndev azɓai, kokwar-bi nengaʼa a gédèshè azɓai.

Verzi nshunè

¹⁵ Iyè, Daniel, i kuɗi te ndav ga a géɗ skwi haha, a i gi zlau skwi man di ga a rkaʼa.

¹⁶ I herda na va a ndo ngiɗè man a zlatsa a pa, a i dzhoɗo a sam na a géɗ skwi haha tèlèba.

¹⁷ Nengaʼa a ngray verzi skwi haha tèlèba. Skwihi dak faɗ haha, ta bihi faɗ man ta da gi bi a géɗ herkeda.

¹⁸ Ndohi Zhiklè nkezlaʼa ta da ngècè kokwar bai, a nzi te ri tengaʼa a ma ma a mèdèp.

¹⁹ Te deɓaʼa i woy a i suna a géɗ skwi mafaɗaʼa man az lèmèlèmè ara ngiɗè ɓai, a pi zlau a gèɗ a ndo a vata, a zlèʼèn züdo te ma, a gi ndzhan zi pats, man a ndau skwai, a mpeɗau skwai, a mbatsaha njèkèdiaʼa a sak.

²⁰ A i woy a i suna a géɗ dromhi nengaʼa te gèɗ kula, a drom ngiɗè man a nftska te pa a sam dromhi ngiɗè makar, a ngèɗè ma mbiaʼa, skwi mbiaʼa man a fena njèkèɗia ngiɗè.

²¹ I pu dai, a drom matsa a ngu var a ndohi nkezlaʼa, a nfen ta,

²² ha ndo nhala sa a mshkè a mbèzlè kita, a ndohi Zhiklè nkezlaʼa ta ngots wuɗai, ha tiɗè sam man ndohi nkezlaʼa ta co kokwar-bai.

²³ A ngoɗ ar haha: Skwi dak mafaɗaʼa, nengaʼa kokwar-bi mafaɗaʼa, man a zhè a géɗ herkeda, az lèmèlèmè ara kokwar-bihi ngiɗè ɓai. A da ndevda herkeda tèlèba, a ngatseda pa, a mbatsaha sak.

²⁴ Dromhi kula, bihi kula man ta da shkè auda te kokwar-bi sa. Ngidè a da shkè te deɓ tengaʼa, az lèmèlèmè ara nshèlèkurhia ɓai, a da kèldè bihi makar auda.

²⁵ A da ga na ma a va Zhiklè te géɗèʼa kumba, a da ga ta matakwan a ndohi Zhiklè nkezlaʼa, a woya a humbèɗè patshai, a humbèɗè ma kita. Zhiklè a da pe ta a ri nengaʼa nʼnzi a zhè, za nʼnzi a zhè zaʼa, za nʼnzi a zhè a rètaʼa zaʼa.

²⁶ Te deɓaʼa kita a zhè, a ta cèma na wuɗi auda a bi matsa, a ta gedassaʼa, a ta zeda a mèdèp.

²⁷ Wuɗai, a wuɗi-bai, a nʼnjèlè kokwar-bihi tʼhwaɗ giɗfèk tèlèba ta da va ta ndohi Zhiklè nkezlaʼa. Wuɗi-bi tengaʼa a nzi a mèdèp, a kokwar-bihi tèlèba ta da gi a ɓèl ta, a ta fi gèɗ a ma tengaʼa.

²⁸ A haha ma nshunè man a Windo, klèng. Iyè Daniel, nshunè a ngsamay gèɗ, a i gu zlau henzalalaʼa, a i ngheda ma te ndav ga.