Daniel 6 - Ma Zhiklè

Srak a géɗ Daniel

¹ Ambaha bi Darius, aman a peda bihi kokwarhi 120 a kokwar-bi nengaʼa tèlèba.

² A gèɗ tengaʼa, mbibihiaʼa makar; Daniel staɗ te vaʼa. Ta menda ta ma a bihi kokwarhai, aman ta ngwèdè bi azɓai.

³ Daniel matsa a nfen ta mbibihiaʼa a bihi kokwarhi ngiɗè tèlèba, a géɗ man mèzhèɓ maya a zhè te ndav nengaʼa. Bai a nhuro, a nfi a géɗ kokwar-bi nengaʼa tèlèba.

⁴ Te deɓaʼa bihi kokwarhai ta woy a ta ngècè malai a sam Daniel te mizlinè man a ga na bai. Aman ta ngatsa skwa ɓai, ta ngatsa mali ɓai, te man nengaʼa nlèɓèslèʼa, a nhera na gèɗ a va miztinè pèc pècèk. Ta ngatsa skwa a sam na ɓai.

⁵ Ndohi matsa ta gada: Nga da ngècè skwi a sam Daniel haha asaɓai, a nga pinèʼa a géɗèʼa, sèi man nga pinèʼa a géɗ njèjèr civèɗ Zhiklè nengaʼa.

⁶ A ndohi mbibihiaʼa matsa a bihi kokwarhai ta ɓica va a sam bai, a ta gada na: Bi Darius, nshèffê ngaya do do a ma ma a mèdèp!

⁷ Ndohi mbibihiaʼa te kokwar-bi ngaya tèlèba, a nda ngomnahai, a nda bihi kokwarhai, a nda ndohi ncèmma, a nda bihi sojè, ta humda ma ta, bai da vau ma bi nengaʼa ngiɗè staɗ: Ko wawa man tʼhwaɗ mʼmèn 30 a tsi ri a sam zhiklè ngiɗè, a sam ndo ngiɗè, a sam ngaya, bai, staɗgenè ka ɓai, sèi ta da kalda a gi marizhèlè.

⁸ Anai, bai, goɗo aranta a ma wuɗi ngaya, windeda a ɗèlèwèr, aman ta min-dè a deɓa azɓai, ara man ma kita Medes a Perses a gada: ndo a slaha a mʼmindè ma bi a deɓa azɓai.

⁹ Te deɓ nengaʼa bi Darius a mwindo ɗèlèwèr a ma bi nengaʼa.

Daniel te gi marizhèlè

¹⁰ Daniel, aman a ntsena ma ɗèlèwèr man bi a Windo, a ndo a gi na. Te gi nte géɗèʼa, nvakavar a zhè, mwinèʼa te civèɗ man a Jérusalem. A ngurɓahi sak makar a páts a pats, a ntsu ri a nslébèrdè Zhiklè nengaʼa, ara man a gu pèc pècèk.

¹¹ A ndohi matsa ta hakaɗai a ta ngots Daniel a tsi rai a gi mbuh mbuh a sam Zhiklè nengaʼa.

¹² To do a sam bai a ta gada na a géɗ ma bi nengaʼa: Ka Windo ma bi ngaya ka bi dè? Ko wawa man a tsi ri a sam zhiklè ngiɗè, a sam ndo ngiɗè tʼhwaɗ mʼmèn 30, a sam ngaya, bai, staɗgenè ka ɓai, sèi ta da kalda a gi marizhèlè. Bai a ngaɗa ta: I goɗ arsa a vava, ara ma kita Medes a Perses man a mindè a deɓa azɓai.

¹³ A ta hüno a ta gada na bai: Daniel, man ta ckoɗa va ndohi ɗèlè te Juda te va nasa, a hér ka azɓai, bi nga, a hér ma bi ngaya man ka Windo, azɓai. Sak makar a pats a pats a tsi ri a Zhiklè.

¹⁴ Aman bai a ntsena ma haha, a kuɗi te ndav na, a nhur maya aman a mbela Daniel. Ha pats nkala, a hèsh maya aman a ntakaha, a mbelaʼa.

¹⁵ Aman ndohi matsa ta hakaɗi a sam bai a ta gada na: ɓai, sèi ka suna, ma kita Medes a Perses a gada, ma bi mèmè ndo a slaha a mʼmindè a deɓa azɓai.

¹⁶ Te deɓaʼa bai a ngaɗa ta aman ta cko Daniel a ta kalda a gi marizhèlè. Bai a nhüno a ngaɗa na Daniel: Zhiklè ngaya man ka gi mizlinè nengaʼa pèc pècèk, da mbel ka a ri na!

¹⁷ A ta cko kwa a ta pizlè na ma a vèvèɗ a pa. A bai a ndè na ma a pa a tèslri nengaʼa, a tèslri ndohi nengaʼa mbibihiaʼa, aman ta slaha ta gi maya ngiɗè a géɗ Daniel azɓai.

Bigol Zhiklè a mbela Daniel

¹⁸ Te deɓaʼa bi a ndo a gi bai, a nʼnza a vaɗ, a njèkeda skwi nʼndai. A woy a mʼmènè a ngwoz ɓai, nzhunè a ngshè di nengaʼa azɓai.

¹⁹ A prèk te gai, bai a nslambaɗa, aman pats a nshkè auda téshèʼa, a mhu a ma gi marizhèlè.

²⁰ Aman a nherda va, a mbaha na Daniel a daʼai kuɗa. Bai a nhüno a ngaɗa na Daniel: Wa Daniel, ɓèl Zhiklè man a zhè a nshèffè! Zhiklè ngaya man ka gi mizlinè nengaʼa pèc pècèk a slaha a mbel ka te ri marizhèlèhi dè?

²¹ Daniel a mʼmbeɗka na a ma bai: Zhiklè da va na nshèffè a bi a ma ma!

²² Zhiklè ga a nzlündko gol nengaʼa, a mpizlèma ta ma a marizhèlèhai, a ta gay skwa ɓai, te man mali ga az a sam di nengaʼa ɓai. Ko a sam ngaya ba, bi ga, i ga ka skwi man ambaɓia ɓai.

²³ A bai a wuffè holholaʼa, a ngoɗa aman ta ckoɗi Daniel auda te vèvèɗ. A ta ckoɗi Daniel auda te vèvèɗ, mblè az a va ɓai, a géɗ man a mpu ndav a Zhiklè na.

²⁴ A bai a ngoɗa, aman ta hulko ndohi matsa, a nda ngwozi ta a wud ta, man ta pün Daniel, a ta wushede ta a gi marizhèlè. Ga ta ndikè a hwaɗaʼa, marizhèlèhi ta gs ta ma, a ta peɗ ta a ma a vatasla tèlèba.

Ma bi Darius

²⁵ Te deɓaʼa bi Darius a nzlündo ɗèlèwèr a sam ndohi tèlèba, te verzi tsaɗ tsaɗ, a nèʼèn tsaɗ tsaɗ a géɗ herkeda tèlèba:

²⁶ Gumi da zhè a nda kinè kumba! I goɗ a ma bi ga, aman te kokwar-bi ga tèlèba, va-gu zlau, va-gurɓahi a sam Zhiklè Daniel, te man nengaʼa Zhiklè man a zhè a nshèffè, a nzi a mèdèp. Kokwar-bi nengaʼa a gédèshè azɓai, ngi-bi nengaʼa a nèfè asaɓai.

²⁷ Nengaʼa a mbél ndo, a preko ndo auda, a ngreda skwi auda, a gi nrkedai te zhiklè te géɗèʼa, tʼherkeda ba. Nengaʼa man a mbelko Daniel auda te ma marizhèlè.

²⁸ Daniel haha a grè a ma ma, te va man Darius bai, ha Cyrus, ndo Perse, bai.