Daniel 5 - Ma Zhiklè

Ngolala Belshatsar

¹ Bi Belshatsar a ngau ngolala mbiaʼa a nda ndohi nengaʼa mbibihiaʼa 1.000. A sam ndohi ngolala 1.000 aranta, a nsau zom.

² Aman zom a nkeɗaʼa, Belshatsar a ndzhoɗo kokwi guro a verzhè-genè, man Nebucadnetsar, bab nengaʼa, a nhulko te gi Zhiklè te Jérusalem. Bai a ndohi nengaʼa mbibihiaʼa a ngwozi na a ngwozi kalak na, ta woy a ta sia a vna.

³ A ta hulkoda kokwi guro, man ta ngots te gi Zhiklè te Jérusalem. A bai a ndohi nengaʼa mbibihiaʼa a ngwozi na a ngwozi kalak na ta sau a vna.

⁴ Ta sau zom, a ta slubordo zhiklèhi guro, verzhègenè, a zi pats, a züdo, a wof, a kwa.

⁵ A nasa nasa a nrka ri ngiɗè a dergi bai, man slalia a pa, zuraʼa a ma skwi nfi vogwa, a windèʼa. Bai a nrka ara man a windèʼa.

⁶ A bai a ngu zlau henzalalaʼa, a hér gèɗ zlau, vatasl deɓ nengaʼa a nverzl na, a nruɓa na vatasl a va kurɓ kurɓaʼa.

⁷ Bai a mboho a wuɗai, aman ta helka ta ndohi mʼmbèh skwai a ndohi maya te Babylone, a ngaɗa ta: Ko wawa man a da jèngè ma haha, a ngray verziaʼa, i da va na maslaka vèvèzh a va, a skwi daʼai guro a daʼai, a i fi a ndo mbiaʼa mamakaraʼa te kokwar-bi ga.

⁸ Te deɓaʼa ndohi maya bai tèlèba ta shkè, aman ta slaha ta jèngè ɓai, a ta ngra na verziaʼa a bi ɓai.

⁹ A bi Belshatsar a ngu zlau a vata, henzalalaʼa; a gèɗ ndohi nengaʼa mbibihiaʼa, ndzakaɓa.

Daniel a ngredè verziaʼa

¹⁰ A géɗ mbèhè bai a ndohi nengaʼa mbibihiaʼa, mam bai a mshkè a gi man ta gi ngolala te pa. A nhüno a ngaɗa: Bai, nshèffè ngaya da nza a ma ma! Ka hur gèɗ zlau ɓai!

¹¹ Da pa ka zlau a gèɗ ɓai! Ndo ngiɗè a zhè te kokwar-bi ngaya, man mèzhèɓ zhiklèhi nkezlaʼa te ndav na. A sun skwai, a skwi man nʼngheda; a nʼngra na maya a bab ngaya, ara maya zhiklèhai. Nebucadnetsar, bab ngaya, a mfeda a bi ndohi maya a ndohi mʼmbèh skwai a ndohi Chaldée a ndohi nɗèl bantai tèlèba.

¹² Te man mèzhèɓ mbiaʼa a zhè te ndav na, a sun skwai, a sun maya, a ngredè verzi nshunè, a sun skwi man ta jkeda a vna, a til skwi mwuɗitpa. Ta ngots skwi haha tèlèba a sam Daniel, man bai a mbaha na Beltshatsar. Séi ta baha na Daniel, a nengaʼa a da ngra ka verziaʼa.

¹³ A ta ckoɗi Daniel a sam bai. A bai a nhüno a ngaɗa na Daniel: Ka Daniel te va ndohi ɓèlè Juda man bai, bab ga, a nhelka ta auda te Juda ɗè? I tsena ara man mèzhèɓ zhiklèhai a zhè te ndav ngaya,

¹⁴ a ka sun skwi nʼnghedaʼa, ka sun skwai, ka sun maya kumba.

¹⁵ Na haha, ta baha ta ndohi maya a ndohi mʼmbèh skwai a sam ga, aman ta jèngè skwi mwindèʼa, a ta ngray verziaʼa; aman ta slaha ta ngray verzi skwia bai.

¹⁶ I tsena a géɗ ngaya, ara man ka slaha ka ngreda verzi skwai, a ka til skwi mwuɗitpa. Aman ka slaha ka jèngè skwi mwindèʼa a ka ngray verziaʼa, i va ka maslaka vèvèzh a va, a skwi guro a daʼai ngaya, a i ge ka a ndo ga mbiaʼa mamakaraʼa te kokwar-bi ga.

¹⁷ Daniel a nhüno a ngaɗa na bai: Skwi ngaya da nzau! Va-ta skwi mbali ngaya a ndohi ngiɗè! Aman i woy a i jèngè na skwi mwindèʼa a bai, i woy a i ngra na verziaʼa.

¹⁸ Bi ga, Zhiklè te géɗèʼa a nʼnga Nebucadnetsar, bab ngaya, a mbiaʼa, a mva na nʼnjèlè a wuɗi bai.

¹⁹ A sam wuɗi nʼnjèl nengaʼa man a va na, ndohi herkeda te verzi tsaɗ tsaɗ, a nèʼèn tsaɗ tsaɗ, ta gu zlau, ta gudzau a sam nengaʼa. Nengaʼa a nkeda ndo man a woyaʼa, a njèka na nshèffè a ndo man a woyaʼa, a gra na gèɗ a ndo man a woyaʼa, a manda na gèɗ a hi a ndo man a woyaʼa.

²⁰ Aman ndav nengaʼa a fi va, ha gèɗ na a nze na, ta kolkoɗauda te bai. A ta cèma na wuɗi nengaʼa.

²¹ Ndohi herkeda ta kwolaʼa, ndav nengaʼa a ngau lèmèlèmè ara ndav skwi dak, a nʼnza a va skwi dak, a nʼndau mandai ara zlè, minmèn te zhiklè a nfu a iyam nsi nengaʼa, ha a suna, Zhiklè te géɗèʼa a nʼngots wuɗai a gèɗ kokwar-bi ndohai, a nfeda ndo man a woyaʼa a bai.

²² Ka, Belshatsar, kra nengaʼa, ka sun skwi haha tèlèba, aman ka manda gèɗ a hi ɓai. Ka fi va a sam Bi Zhiklè,

²³ ka goɗ aman ta hulko ka kokwi te gi nengaʼa, a kinè a ndohi ngaya mbibihiaʼa a ngwozi ngaya a ngwozi kalak ngaya, kin si zom a vna. Ka slubordo zhiklèhi verzhègenè a guro a zi pats a züdo a wof a kwa, man ta rka di ɓai, man ta tsena zlembaɗ ɓai, man ta sun maya ɓai. Aman Bi Zhiklè man nshèffê ngaya te ri nengaʼa, man civèɗ ngaya tèlèba nte ri nengaʼa, ka slebarda bai.

²⁴ Gar haha nengaʼa a nzlinda ri haha man a mwindo a dergai.

²⁵ Nasa man a mwindo: Mene mene tekel u-pharsin.

²⁶ Na haha verziaʼa: Mene: Zhiklè a nliva kokwar-bi ngaya, a ndivèʼa.

²⁷ Tekel: A liv ka a kilo, ka nzal ɓai.

²⁸ U-pharsin: Kokwar-bi ngaya nʼngela. Ndohi Medes a Perses ta ngotso.

²⁹ Belshatsar a ngoɗa aman ta va na maslaka vèvèzh a va a Daniel, a skwi daʼai guro a daʼai nengaʼa, a ta boho a kokwar-bi nengaʼa tèlèba: Daniel a da gi a ndo mbiaʼa mamakaraʼa te kokwar bai!

³⁰ A vaɗ sa, ta keɗa Belshatsar, bi Chaldée.

³¹ Darius, ndo Mède, mvi nengaʼa 62, a nʼngots kokwar-bai.