Daniel 4 - Ma Zhiklè

Ma bai

¹ A bi Nebucadnetsar a nzlündo ma a sam ndohi tʼherkeda tèlèba, ndohi a nèʼèn tsaɗ tsaɗ tèlèba: Zhiklè da va kinè gumi a ma ma!

² Ambahayè, aman i njè kinè skwi man Zhiklè mbiaʼa te géɗèʼa a ngreda auda a nrkedi man a ngu a sam ga.

³ Skwi man a ngreda auda mbiaʼa, a nrkedi nengaʼa wuɗitpa! Kokwar-bi nengaʼa, kokwar-bi a mèdèp, ngi-bi nengaʼa a dè a ma ma, te verzi wud wuda.

Skwi cèw man a nrka na di a Nebucadnetsar

⁴ Iyè Nebucadnetsar, i nza te gi ga, i hér skwi ngiɗè asaɓai, i wuffè te gi bi ga.

⁵ A nshunè a nkedyè, a mpray zlau a va. I mana tʼhai a sam mʼmènè ga, i hér gèɗ zlau. I rka skwi ngiɗè te nshunè a di ga, a mpay zlau a gèɗ.

⁶ I gaɗa, aman ta baha ta ndohi maya te Babylone tèlèba a sam ga, a ta ngray verzi nshunè.

⁷ A ndohi mʼmbèh skwai a ndohi kilèa a ndohi Chaldée a ndohi ndèl bantai ta shkè. I njè ta nshun ga; aman ta slaha ta ngray verzia ɓai.

⁸ Te deɓaʼa Daniel a mshkè a sam ga, man ta baha na Beltshatsar, ara nzlembaɗ zhiklè ga, mèzhèɓ zhiklèhi nkezlaʼa a zhè te ndav na. A i njè na nshun ga.

⁹ Beltshatsar, bi ndohi nsun skwai. Skwi nʼnghedaʼa ngiɗè azɓai man a fa ka borom a ma. Tsena skwi man i rka te nshunè, ngray verziaʼa.

¹⁰ Skwi man i rka a sam mʼmènè ga, na anta: I pu dai, a wof a nzlatsa te ndev herkeda, gurèʼa a vata.

¹¹ A wof a grè a ngi dazlaʼa, géɗèʼa a lama na giɗfèk. Ndohi te verzi herkeda tèlèba ta rkaʼa.

¹² Vah nengaʼa mbikaɓai, a yi wuda ngutsuɓaʼa. Tèlèba ta ngots skwi nʼndi te wof sa. Skwi dakhi ta nza a verziaʼa. Ɗiakihai tʼhwaɗ giɗfèk ta gu gi a wofaʼa. Skwi man a zhè a nshèffè tèlèba ta ndau nyiaʼa.

¹³ A i rka te nshun ga, a sam mʼmènè ga, ara gol Zhiklè nkezlaʼa a mshkè te zhiklè.

¹⁴ A mboho a wuɗai: Va-ngela wof, va-slidè riaʼa, va-berzla vahaʼa, vaslevda nyi nengaʼa aussa! Skwi nte verziaʼa a ɗiakihai tʼhwaɗaʼa da hu ta!

¹⁵ Godozlomaʼa da nza a pa, mʼmana a teɓa züdo, a teɓa zi pats, te va skwi mɓayaʼa. Da ngots minmèn te zhiklè, da ngots skwi nʼndai ara skwi dak a sam mandi tʼherkeda.

¹⁶ Ndav ndo nengaʼa, da humbaɗda a ndav skwi dak ngiɗè. Da nza arsa mvi tsaraɗ!

¹⁷ Golahi Zhiklè ta goɗ arsa, a ta goɗ ara man ndohi nkezlaʼa ta huro. A ndohi tèlèba man ta zhè a nshèffè ta da suna, Zhiklè te zhiklè te géɗèʼa a nʼngots wuɗai a géɗ kokwar-bi ndohai, a va na a ndo man a woyaʼa, ko mbelaw ndo a slaha a nfi a géɗ sam nʼnzi bai.

Daniel a ngreda verziaʼa

¹⁸ Nasa nshunè man a nkedyè, iyè bi Nebucadnetsar. Ka, Beltshatsar, ngray verziaʼa! Ndohi maya tèlèba te kokwar-bi ga ta slaha ta ngray verziaʼa ɓai. Ka, ka slaha, te man Mèzhèɓ zhiklèhi nkezlaʼa a zhè te ndav ngaya.

¹⁹ A Daniel, man ta baha na Beltshatsar, a mpu di kurzlaʼa, a skwi man a hérèʼa, a mpra na zlau a va. Bai a ngaɗa: Beltshatsar, ka gu zlau nshunè a verzi nengaʼa ɓai! A Beltshatsar a nhüno a ngaɗa: Bi ga, da gu a sam mayamhi ngaya ara nshun ngaya; da gu a sam ndohi shèwa ngaya!

²⁰ Wof man ka rkaʼa, man a grè, a ngi dazlaʼa, géɗèʼa a lama na giɗfèk, man herkeda tèlèba a rkaʼa,

²¹ man vah nengaʼa mbikaɓai, a yi wuda ngutsuɓaʼa; tèlèba ta ngots skwi nʼndi te wof sa, skwi dak ta nza a verziaʼa, a ɗiakihai tʼhwaɗ giɗfèk ta geda gi a wofaʼa; wof sa, na ka, bi ga.

²² Ka mbiaʼa, wuɗi ngaya a zhè, ka ga a mbiaʼa, ha ndè a zhiklè, a nʼnjèl bi ngaya a grè a ma ma, ha ndè a verzi herkeda.

²³ Skwi man ka rkaʼa a bi ga: Gol Zhiklè nkezlaʼa a mshkè te zhiklè, a ngaɗa: Va-ngela wof, va-gedassaʼa, godozlomaʼa da nza a pa, mʼmanaʼa a teɓa züdo, a teɓa zi pats, te va skwi mɓayaʼa. Da ngots minmèn te zhiklè, da ngots skwi nʼndai ara skwi dak, ha mvi tsaraɗ klèng.

²⁴ Na haha verziaʼa a bi ga; ma man Zhiklè te zhiklè te géɗèʼa a goɗ a géɗ bai, bi ga.

²⁵ Ndohi ta da kwol ka, a ka da nzi a va skwi dakhai. Ka da ndi mandai ara zlè. Minmèn a gi a iyam ngaya. A ka nzi aranta mvi tsaraɗ, ha ka suna, Zhiklè te zhiklè te géɗèʼa a nʼngots wuɗai a géɗ kokwar-bi ndohai, a va na a ndo man a woyaʼa.

²⁶ Aman a ngaɗa: godozlom wof da nza a pa; kokwar bi ngaya a nzi di genè, ha pats man ka shin wuɗi Zhiklè.

²⁷ Gar haha, bi ga, i woy a i ngra ka maya: tila mali ngaya a ngi skwi nzuraʼa, tila mphömè ngaya, a mbelawahai ta da se ka te va, wa ngiɗè ba a da gi daraʼa.

Gèɗ Nebucadnetsar a nze na

²⁸ Skwi haha tèlèba a ngu a sam bi Nebucadnetsar.

²⁹ Te deb ki 12, a shèwèlè te gi nengaʼa te Babylone.

³⁰ Bai a ngaɗa: Nasa Babylone, kokwar mbiaʼa, man i rom a sam nʼnzi bi ga, a wuɗi ga mbiaʼa, a nʼnjèl wuɗi bi ga!

³¹ Njiɗè ngèɗ te ma, ngèɗè a mshkè te zhiklè: I gaɗa ka a bi Nebucadnetsar!

³² Kokwar-bi ngaya, i cedama te ri ngaya! Ndohi ta kwol ka, ka nzi a va skwi dak, ka ndi mandai ara zlè, ha mvi tsaraɗ klèng, ha ka suna, Zhiklè te géɗèʼa a nʼngots wuɗai a géɗ kokwar-bi ndohai, a va na a ndo man a woyaʼa.

³³ Skwi aranta a ngu a nasa nasa, a sam bi Nebucadnetsar: ndohi ta kwolaʼa, a nʼndau mandi ara zlè, a fi minmèn te zhiklè a iyam nsai, ha gwots gèɗ nengaʼa ndzuva ara gwots mangayak, a gindzhan nengaʼa ara tsazlar wotsak.

Nebucadnetsar mʼmbela

³⁴ Te deɓ mvi tsaraɗ, iyè Nebucadnetsar, i pu di a zhiklè, a maya ga a mʼmenkaɗ na a deɓa. I shüd gèɗ a Zhiklè te géɗèʼa, i slébèrdèʼa, a i nzalaʼa, nengaʼa man a nzi a mèdèp, man kokwar-bi nengaʼa a dè a ma ma te verzi wud wuda.

³⁵ Ndohi a géɗ herkeda tèlèba ara skwi ambalai. A gi ara man a woyaʼa a sam golahi Zhiklè, a sam ndohi tʼherkeda. Ndo a slaha a ngedassa skwi man ri nengaʼa a ngau azɓai, a ngaɗa na: Ka gi a haha mè.

³⁶ A samaʼa, maya ga a mʼmenkaɗ na a pa, a wuɗi bi ga, a nʼnjèl ga, a kokwar-bi ga a vna. A ndohi nʼngray maya, a ndohi ga mbibihiaʼa ta hassyè. Ta fiyè a deɓa a bai, a wuɗi bi ga a ngu mbiaʼa holholaʼa.

³⁷ Anai, i Nebucadnetsar, i shid gèɗ, i slébèrdè, i njèl bi Zhiklè man a gi skwi tèlèba zuraʼa, a civèɗ nengaʼa tèlèba ngi-zuraʼa. A slaha a mʼmanda ta gèɗ a hai a ndohi nfi va.