Daniel 3 - Ma Zhiklè

Skwi guro

¹ Bi Nebucadnetsar a nrom skwi ara ndo a guro, ngurè nengaʼa a tsi ri 60, nguzlohaʼa a tsi ri 6. A nzlatseda a dal Dura, te Babylone.

² Bi a mɓic ta ndohi sak, a ndohi mbibihiaʼa a ndohi mɓer kokwar, a bihi sojè, a ndohi mɓer sulai, a ndohi mbèzl kita, a ndohi kita, a bihi kokwar tèlèba, aman ta dè a ta gi ngolala skwi man bi Nebucadnetsar a Zlatseda ara ndo.

³ A ndohi sak, a ndohi mbibihiaʼa, a ndohi mɓer kokwar, a bihi sojè, a ndohi mɓer sulai, a ndohi mbèzl kita, a ndohi kita, a bihi kokwar tèlèba ta ɓicko va, a ta gi ngolala skwi man bi Nebucadnetsar a roma. A ta zlatsa zuraʼa a ma skwi man bi Nebucadnetsar a Zlatseda.

⁴ A ndo mbèhè a mboho a wuɗai: Kinè, ndohai, te verzi tsaɗ tsaɗ, a nèʼèn tsaɗ tsaɗ, bai a njè kinè ma a gèɗ ar haha:

⁵ Aman kin da tsena tolom, a tèzlèzlèu, a ganga, a ganzavar, a dasal, a shingelèk, a skwi man ta vèdè tsaɗ tsaɗ tèlèba, kin da kèlèhai a deɓ sak skwi guro man bi Nebucadnetsar a nzlatseda, a kin tsi ri a nengaʼa.

⁶ Ndo man a da gurɓèhi azɓai, a tsi riaʼa azɓai, ta da kalda a vogwa vovar a nasa nasa.

⁷ Te deɓaʼa, aman ta tsena tolom, a tèzlèzlèu, a ganga, a ganzavar, a dasal, a shingelèk, a skwi man ta vèɗè tsaɗ tsaɗ tèlèba, ta kalahi a deɓ sak skwi guro man bi Nebucadnetsar a nzlatseda, a ta tsu riaʼa.

Ndohi Juif makar ta tsi ri a skwi guro azɓai

⁸ A pats nasa, ndohi Chaldée ta shke a ta pin ta ndohi Juif.

⁹ Ta hüno a ta gaɗa na bi Nebucadnetsar: Bai, Zhiklè da va ka nshèffè a ma ma!

¹⁰ Ka bai, ka njè nga ma bi ngaya: Ko wawa man a tsena tolom, a tèzlèzlèu, a ganga, a ganzavar, a dasal, a shingelèk, a skwi man ta vèɗè tsaɗ tsaɗ tèlèba, da kalahi a deɓ sak skwi guro, da tsu riaʼa.

¹¹ Ndo man a da kèlèhi a deɓ sak nengaʼa azɓai, a da tsi riaʼa azɓai, ta da kalda a vogwa vovar.

¹² Anai ndohi Juif ta zhè man ka pe ta a ndohi mɓer kokwar Babylone: Shadrac, Méshac a Abed-Nego. Ndohi haha ta fi gèɗ a ma ngaya azɓai a bi ga. Ta slébèrdè zhiklè ngaya azɓai, a ta tsi ri a skwi guro man ka Zlatseda, azɓai.

¹³ A ndza na a ndav a bi worworaʼa, a nengaʼa a mbaha ta Shadrac, Méshac a Abed-Nego. A ta helka ta ndohi haha a sam bai.

¹⁴ Bi Nebucadnetsar a ndzhaɗ ta: Mè? Kinè nda Shadrac, a Méshac, a Abed-Nego, kin slébèrdè zhiklè ga a kin tsi ri a skwi guro man i Zlatseda azɓi ɗè?

¹⁵ Tsam-tsam! Aman kin da tsena tolom, a tèzlè-zlèu, a ganga, a ganzavar, a dasal, a shingelèk, a skwi man ta vèɗè tsaɗ tsaɗ tèlèba, sèi kin da kèlèhi a deɓ sak skwi man i roma, a kin tsi ri a nengaʼa. Kin woya ɗè, kè? Aman kin da tsi ri a nengaʼa azɓai, ta da wushede kinè a vogwa vovar antanta. Zhiklè man a da mbel kinè te ri ga tema?

¹⁶ Shadrac a Méshac a Abed-Nego ta hüno a ta gada na bai Nebucadnetsar: Nga slaha nga mbeɗa ka a pa azɓai.

¹⁷ Bi nga, Zhiklè nga, man nga tsi ri a nengaʼa, a slaha man a mbel nga ko te vogwa vovar, a slaha a nda mbel nga ko te ri ngaya ba.

¹⁸ Aman ko a gi azɓi ba, sèi ka suna, bi nga, nga jéjèr zhiklè ngaya azɓai, nga tsi ri a skwi guro man ka Zlatseda, azɓai.

Te vogwa vovar

¹⁹ Bai a ngu ndav holholaʼa, a ngursa ta dai a Shadrac, Méshac a Abed-Nego. A ngaɗa, aman ta vècè vogwa mbiaʼa a vata, a fena mpèc-pècèk, a shègwa dayak, a gi sak tsaraɗ.

²⁰ A ngaɗa ta sojèhi ngiɗè man wuɗi ta a zhè, aman ta dzawa Shadrac, a Méshac a Abed-Nego, a ta wushede ta a vogwa vovar.

²¹ Ta dzaw ta ndohai, a maslaka a va, a dawar a va, skwi mpèɗè gèɗ a skwi a va tèlèba, a ta wushede ta a vogwa vovar.

²² A gèɗ man ma bi mwuɗitpa, a ta vatsa vogwa a vata, ndohi man ta wushede ta Shédrac a Méshac a Abed-Nego a vogwa, vogwa a nde ta ma.

²³ Ndohi ndzawaʼa makar, Shadrac, Méshac, a Abed-Nego, ta kala a ndev vogwa.

²⁴ Bi Nebucadnetsar a nslambaɗa, a ngudzai, a ngaɗa ta golahi nengaʼa: Nga dzawa ndohi makar, ga nga wushede ta a vogwa ka ɓi ɗè? A ta gaɗa na: Halau, bi nga!

²⁵ A nengaʼa a ngaɗa: A – a – a – i rka ndohi faɗ, ta dzawa ɓai, ta shèwèlè te va vogwa; skwa a nʼnga ta ɓai. Mafaâaʼa lèmèlèmè ara gol Zhiklè.

²⁶ Te deɓaʼa bi Nebucadnetsar a mdo a ma vèvèɗ vogwa, a mbaha ta: Shadrac, Méshac, a Abed-Nego, kinè ɓèlèlihi Zhiklè mbiaʼa te géɗèʼa, vo-washkè auda te vogwa! Vo-washkè a sam ga! A Shadrac a Méshac a Abed-Nego ta shkè auda te va vogwa.

²⁷ A ndohi sak, a ndohi mbibihiaʼa, a ndohi mɓer kokwar, a bihi sojè bai, man ta ɓicko va, ta rkaʼa vogwa a mpin ta ndohi sa ɓai, ko gwots-gèɗ tengaʼa, ko maslaka tengaʼa a nʼnda ɓai, ta zhkè azɓai, ara man ta shkè te vogwa.

Nebucadnetsar a slébèrdè Zhiklè

²⁸ Bi Nebucadnetsar a nhüno a ngaɗa: Nga shid gèɗ a Zhiklè Shadrac, Méshac a Abed-Nego, a gèɗ man a nzlündo gol nengaʼa, a mbel ta ɓèlèlihi nengaʼa man ta pu ndav a vna, a ta fa gèɗ a ma bi ɓai. Ta huro: dara nga vi va nga, a nga slébèrdè zhiklè ngiâè azɓai, a nga tsi ri a zhiklè ngiɗè azɓai, sèi Zhiklè nga.

²⁹ Gar haha i njè kinè ma ga a gèɗ: Ko wawa – ndo man verzi na mèmè, tʼherkeda nangwa nangwa, a nèʼèn mèmè – man a derɗa Zhiklè Shadrac a Méshac a Abed-Nego, ta wotsaʼa a ta duma gi nengaʼa, a nde na mongoɓa. Aman Zhiklè ngiɗè azɓai, man a mbel ndo arsa, sèi nengaʼa.

³⁰ Te deɓaʼa bi a mpa ta mizlinè mbiaʼa a ri a nda Shadrac, Méshac a Abed-Nego te Babylone.