Daniel 2 - Ma Zhiklè

Nshunè Nebucadnetsar

¹ Aman bi Nebucadnetsar a ngau bai, te mvi macecèwaʼa, nshunè a nkeɗaʼa, a mʼmbeɗama na ndav, nzhunè a gsama na di azɓai.

² Bai a mbaha ta ndohi maya a ndohi mʼmbèh skwai a ndohi kilèa a ndohi Chaldée, aman ta ngra na nshunè.

³ A ta shkè a ta zlatsa a sam bai. Bai a ngaɗa ta: Nshunè a nkedyè, a mbeɗamay ndav, i woy a i sun nshunè.

⁴ Ndohi Chaldée ta gada na bai, a daʼai aramée: Bai, Zhiklè da va ka nshèffè a ma ma! Njè nga nshunè ngaya, nga ɓèlèlihi ngaya, a nga da ngra ka verziaʼa.

⁵ Bai a mʼmbeɗa ta a ma ndohi Chaldée: I hur ma; i mindè ma ga a deɓa azɓai: Aman kin slaha kin ngray nshunè a verzia ɓai, i wots kinè a i gi sam gi kinè a mongoɓa.

⁶ Aman kin ngray nshunè a verziaʼa, kin ngècè skwi mbalai a skwi ntul kinè a sam ga, a i slébèrdè kinè kumba. Ani haha va-ngray nshunè a verziaʼa!

⁷ A ta mbeɗa na a ma macecèwaʼa; a ta gada na: Bai da njè nga nshunè, nga ɓèlèlihi ngaya, a nga da ngra ka verziaʼa.

⁸ Bai a mʼmbeɗa ta a ma: I sun a vava, kin hèsh maya a kin pceday gèɗ a hai, te man kin suna, i mindè ma ga a deɓa azɓai.

⁹ Aman kin da ngray nshunè azɓai, kita a da gs kinè. Kin humda ma kinè a kin ngwodyè, a kin ngél ma a sam ga, ha pats nlèyè kinè kala a deɓa. Gar haha, va-ngray nshunè, a i suna, kin slaha kin ngray verzi nengaʼa ba.

¹⁰ A ndohi Chaldée ta mbeda na a ma bai, a ta gada na: Ndo azɓai a géɗ herkeda man a slaha a ngra na skwi a bai ara man a jhèɗèʼa. A géɗ nengaʼa, bi ngiɗè azɓai, ko mbiaʼa, ko wuɗi na zhè, man a jhèɗè skwi aranta a sam ndo mʼmbèh skwai, a sam ndo kilèa, a sam ndo Chaldée.

¹¹ Skwi man bi a jhèɗèʼa, bav a pa, ndo ngiɗè a slaha a ngreda na bi azɓai, sèi zhiklèhai; aman tengaʼa ta az a sam ndohi tʼherkeda ɓai.

¹² A ndza na a ndav bai, a ngu ndav a vata. A ngoɗa, aman ta bazl ta ndohi maya te Babylone tèlèba.

¹³ A géɗ ma bai, aman ta da bazl ta ndohi maya, ta hoss Daniel a mandalahi na, a ta woy a ta bazl ta a vaʼa.

Daniel a sam bai

¹⁴ Daniel a ngaɗa na Arjoc, bi golahi bai man a mshkè a da bazl ta ndohi maya te Babylone, a maya maya.

¹⁵ A nhün a ngaɗa na Arjoc, bigol bai: Bai a goɗ ma mwuɗitpa aranta èhèmè? Arjoc a nʼngra na ma a Daniel.

¹⁶ A Daniel a ndzhoɗo bai, da ngra na pats man a da dè a sam na, aman a da ngra na verzi nshunè.

¹⁷ Te deɓaʼa Daniel a ndo ngwai, a ngra ta ma haha, a Hanania, Mishael a Azaria, mandalahi nengaʼa, a ta tsu ri a Zhiklè te zhi-klè te géɗèʼa,

¹⁸ aman ta sia te va, a géɗ skwi man a nʼnghedaʼa a haha, a ta slaha ta bazla nda Daniel a mandalahi na a ndohi maya te Babylone ɓai.

¹⁹ Daniel a nslubordo Zhiklè te zhiklè te géɗèʼa.

²⁰ A nhüno a ngaɗa: Ngo-shüdokoy gèɗ a Zhiklè a ma ma a mèdèp! Aman maya a wuɗi tèlèba a nengaʼa.

²¹ Nengaʼa man a veni pats a vaɗ, a sam prèk a sam dakwaɗ, a cko ndo auda te bai, a fi ndo a bai, a va ta maya a ndohi maya a nshin skwai a ndohi man ta sun skwai.

²² Skwi nʼnghedaʼa tʼhwaɗaʼa, nengaʼa a ngredauda, a sun skwi te ruva, skwi nhél sam a zhè a sam na.

²³ I shida ka gèɗ, Zhiklè bababhi ga, a i slébèrdè ka, a géɗ man ka ngray maya a ka vay wuɗai. Ka ngray skwi man nga dzhoɗo a sam ngaya, ka ngra nga skwi man bai a dzhoɗo.

²⁴ Te deɓaʼa Daniel a ndo a sam Arjoc man bi a ngaɗa na da bazl ta ndohi maya te Babylone: Ka bazl ta ndohi maya te Babylone ɓai! Diyè a sam bai, i da ngra na verzi nshunè a bai.

²⁵ A Arjoc a nda Daniel a sam bi tsam-tsam, a ngaɗa na: I ngots staɗ te va ndohi Juda man ta helka ta a ɓèlè te va nasa, man a da ngra na verzi nshunè a bai.

²⁶ A bai a ngaɗa na Daniel, man ta baha na Beltshatsar: Ka slaha ka ngray nshun ga a verziaʼa dè?

²⁷ Daniel a nhüno a ngaɗa na bai: Skwi nʼnghedaʼa man bai a woya a sun verziaʼa, ndohi maya, a ndohi mʼmbèh skwai, a ndohi nɗèl bantai ka ɓai, man ta slaha ta ngra na bai.

²⁸ Aman Zhiklè te zhiklè te géɗèʼa a zhè, man a sun skwi nʼnghedaʼa, a ngra na bi Nebucadnetsar skwi man a da gi a ma. Nshun ngaya, a skwi man a nrka ka a dai a sam mʼmènè ngaya, na haha:

²⁹ Ka bai, ka hur man ka mana tʼhai a sam mʼmènè ngaya, a ka huro: skwi man a da shkè a ma ma, mè? A nengaʼa man a sun skwi nʼnghedaʼa haha a ngra ka skwi man a da gi a ma.

³⁰ Aman a ngray skwi nʼnghedaʼa haha a iyè, a ngray a géɗ maya ga ka ɓai; i fena ndohi ngiɗè ɓai. Aman a woya a ngra na verziaʼa a bai, a ka sun skwi man ka hur a géɗèʼa.

Daniel a ngredè verzi nshunè

³¹ Bai, nshunè a nked ka, a ka rka skwi man a nzlatsa, skwi mbiaʼa a vata, a si dai holholaʼa, a nzlatsa a ma ngaya, a ka rkaʼa, wuɗitpa.

³² Gèd skwi sa, guro ndaɓalaʼa, ndav na a ri na, verzhègenè.

³³ Hwaɗ na a deɓ na, zi pats. Ɗos na, züdo.

³⁴ Sak na, rèta züdo, rèta rɓasl. A ka pu dai, a ka rka kwa man a gudumbolko va te za, ndo a ngudumbolko ka ɓai, a mbeza a sak skwi sa man nda züdo a rɓasl, a mbatsedaussa.

³⁵ A mbatsa züdo a rɓasl a zi pats a verzhègenè a guro tèlèba, a kozlar a nheldama ara topok dau te hedak, a ta rka te deɓaʼa ɓi fèt. A kwa mbatsa skwi sa, a ngre na a vata, a ngi a za mbiaʼa, a nʼndha herkeda tèlèba.

³⁶ Nasa nshunè. Anai nga woy a nga ngra na verziaʼa a bai.

³⁷ Ka bai, ka bi a géɗ bi tèlèba. Zhiklè te zhiklè te géɗèʼa a mva ka kokwar-bai, a wuɗai, a wuɗi-bai a nʼnjèlè.

³⁸ A mva ka ndohai a skwi dak a ɗiakihai tʼhwad giɗfèk, a sam tèlèba, a ri a ka, a ge ka a bai a géɗ skwi tèlèba.

³⁹ Gèd guro matsa, na ka. Te deɓ ngaya, kokwar-bi ngiɗè a shkè, az tar man a ngaya ɓai. Te deɓaʼa kokwar-bi mamakaraʼa a shkè, zi pats, a gi bi a géɗ herkeda tèlèba.

⁴⁰ Kokwar-bi mafaɗaʼa a shkè, wuɗi na zhè ara züdo, ara züdo man a batsa skwi tèlèba, a bazla skwi tèlèba. A da bazl ta a gedas ta ara züdo a tsiaʼa.

⁴¹ Skwi man ka rkaʼa: sak a wud sak, rèta rɓasl, rèta züdo, nengaʼa kokwar-bi nʼngela teva. Wuɗi na zhè ara züdo ma ba, aman ndzakaɓa a rɓasl te vaʼa.

⁴² Wud sak nengaʼa rèta züdo, rèta rɓasl, verzi nengaʼa aranta: A sam ngiɗè, wuɗi kokwar-bai a zhè, a sam ngiɗè, wuɗi na azɓai.

⁴³ Aman ka rka züdo ndzakaɓa te va rɓasl, verzi nengaʼa aranta: Ta da cè ngwoz a va, aman ndohi ta derzla va ɓai, lèmèlèmè ara züdo a rɓasl a humdè azɓai.

⁴⁴ Aman bihi matsa ta zhè, Zhiklè te zhiklè te géɗèʼa a da til kokwar-bai, man a nzi a mèdèp, a skwi a gé-dèshè azɓai, ndohi herkeda ta ngècè bi asaɓai. Nengaʼa a da bats ta kokwar-bihi haha tèlèba, a ngedas ta. Aman nengaʼa a nzi a mèdèp.

⁴⁵ Ka rka kwa man a gudumbolko va te za, ndo a ngudumbolko, ka ɓai, a mbatsa rɓasl a züdo a zi pats a verzhègenè a guro. Zhiklè mbiaʼa a ngra na a bai skwi man a di a shkè te deɓa. Nshunè ngaya nzuraʼa a vava, a verzi man i ngra ka, zuraʼa.

Ta slébèrdè Daniel a mandalahi na

⁴⁶ A bi Nebucadnetsar a nkalahai a deɓ sak Daniel, a ntsa na rai, a ngoɗ aman ta va na skwai, a ta ndara na skwai.

⁴⁷ A bai a nhüno a ngaɗa na Daniel: A vava, Zhiklè kinè, Zhiklè a géɗ zhiklèhi tèlèba, bai a géɗ bihi tèlèba, nengaʼa man a sun skwi nʼnghedaʼa, a géɗ man ka slaha ka ngreda verzia haha.

⁴⁸ A bai a nfu Daniel a ndo mbiaʼa, a mva na skwi mbalai kumba a skwi mèshèlè. A nfu a bigol bai te kokwar Babylone tèlèba, a tsuvom mbiaʼa a géɗ ndohi maya te Babylone.

⁴⁹ Daniel a ndzhoɗo aman Shadrac, Méshac a Abed-Nego ta nzi a sam mizline mɓer kokwar Babylone tèlèba. A Daniel a nʼnza a gi bai.