Daniel 12 - Ma Zhiklè

¹ Te ndev nasa, Micael, bigol Zhiklè mbiaʼa, a da slèmbèɗè, aman a takaha ta ndohi te verzi man a ngaya. A gi a pats matakwan mbiaʼa, ntar sa azɓai daga nhinkaɗ ndohai, ha pats sa. A pats nasa ndohi ngaya ta da mbel ta, ta tèlèba man nzlembaɗ tengaʼa mwindèa te ɗèlèwèr nshèffè.

² Ta kumba man ta te vèvèɗ, ta da piɗèkwe ta, ngiɗè a nshèffè a mèdèp, ngiɗè a hori a skwi mphomdaʼa a mèdèp.

³ Ndohi man maya ta zhè, ta da hel sam ara pats a giɗfèk; a ndohi man ta de ta ndohi kumba a sam ngi-zuraʼa, ta da hel sam ara bantihai, a ma ma a mèdèp.

⁴ Ka Daniel, ngheda ma haha, pizleda ɗèlèwèr a pa, ha pats nʼndikèma skwai. Ta kumba ta da wuzhèʼa, a ta ngècè maya te pa.

Ma Daniel klèng

⁵ A iyè, Daniel, i pu dai, a i rka ndohi ngiɗè cèw, ngiɗè te wud woyam ngiɗè, ngiɗè te wud woyam ngiɗè.

⁶ Ngidè a ngaɗa na nengaʼa man a nzlatsa a ma woyam, a maslaka ntsentsai a va: Ndikèma skwi mbelaʼa haha a shkè a ngèmè?

⁷ A i tsena ma ndo man maslaka ntsentsai a va, te wud woyam ngiɗè, man a mpeda ri na cèw a zhiklè. A mʼmbaɗa a nzlembaɗ Zhiklè man a nzi a nshèffê a mèdèp: Te deɓ nʼnzi a zhè, za nʼnzi a zhè zaʼa, za nʼnzi a zhè a rètaʼa zaʼa. Aman wuɗi ndo ngedassa ndohi nkezlaʼa a ndev na ma, skwi haha tèlèba a gai.

⁸ A i tsena maʼa, aman i sun verzia ɓai. I gaɗa:

⁹ Bi ga, ndikèma skwi mè? A ngaɗa: Daniel, do aman ma haha nʼnghedaʼa, mpizlè te pa, ha nʼndikèmaʼa.

¹⁰ Ta kumba Zhiklè a jkede ta, a ɗèl ta, a pan ta. Ndohi nderɗe Zhiklè, ta gi skwi man ambaha Zhiklè ɓai. Ndo man a derɗe Zhiklè a sun ɓai, aman ndohi man maya ta zhè, ta suna.

¹¹ A hinè a pats man ta jèkeda mvi skwi a Zhiklè lèk lèk, ha pats ngédèshè skwai a maya man a ndèr a ndo, mʼmèn 1.290 nte ndevaʼa.

¹² Mwuffè a sam ndo man a zhèr skwi a ma ma, mʼmèn 1.335.

¹³ Aman ka, do, sok va ngaya! A pats nʼndikèma skwai ka da slèmbèdè a ka da ngècè man a ngaya.