Daniel 11 - Ma Zhiklè

¹ Aman bi Darius, ndo Mede, a ngu bi te mvi nshèlèkuraʼa, i nza a sam na aman i takaha a i nza na a deɓa.

² Antanta i da ngra ka ma nzuraʼa. Na haha te Perse bihi makar ta da gi bi dai. Mafadaʼa skwi mèshèlè na a zhè kumba a fena ngiɗè tèlèba. Aman skwi mèshèlè nengaʼa a mva na wuɗi ma, a da gi var a kokwar-bi Javan.

³ A bi ngulaʼa a shkè, a gi bi wuɗai, a gi ara man ndav nengaʼa a woyaʼa.

⁴ Aman a ntsoko gèɗ na auda ma, kokwar-bi nengaʼa a nhus na ma, nksaraʼa a gèɗ herkeda te civèɗ kozlar faɗ. A ndohi te verzi nengaʼa ta ngècè asaɓai. Ta ngècè wuɗi ara nengaʼa azɓai, kokwar-bi nengaʼa ngedas na, a ndohi ngiɗè ta da ngècèʼa.

⁵ Bai te civèɗ kozlar iyam a da ngècè wuɗai, a bi sojè nengaʼa staɗ a Sala na va a gèɗ, a da gi a bi mbiaʼa a fena nengaʼa.

⁶ Te deɓ mvi kètè, ta da derzlè ma, a dem bi te civèɗ kozlar iyam a dè a sam bi te civèɗ kozlar mazlam, aman ta tsi gumai. Aman gumi tengaʼa ta menda hi ɓai, a nzi azɓai, a ndohi var nengaʼa ta slaha ta zlècè a sam ngiɗè ɓai, a ta mendko skwi ta a deɓa a ndohi man ta daʼa, a dam ha.

⁷ A pats nasa, zluzlor skwai a tsai, a slèmbèɗè te diaʼa, a de a da gi var a ndohi bi te civèɗ kozlar mazlam, a duma gi bi nengaʼa, a dumdaussa a wuɗai.

⁸ Zhiklèhi tengaʼa ba, a skwi man ta vüdo a kolongwi guro a verzhègenè tengaʼa mbelaʼa, a da heldama a kokwar Egypte. Mvi a zhe, a njè-keda bi te civèɗ kozlar mazlam a pa kata.

⁹ A nengaʼa a dè a sam kokwar-bi te civèɗ kozlar iyam. Te deɓaʼa a minè a deɓa a kokwar na.

¹⁰ Wudahi nengaʼa ta da til ma var, a ta ɓic ta ndohi var kumba. Ngidè staɗ a da shkè a hi ara woyam man a hi auda a dzah, a tawaɗaha, a minè a deɓa. Ta gi var a ta shkè, ha ndè a ma gi bai.

¹¹ A ndav a dza na bi te civèɗ kozlar iyam tungrungrungaʼa; a nda gi var a bi te civèɗ kozlar mazlam. A da ɓica ndohi var nengaʼa kumba, a ndosso ta ma a pa.

¹² Ndohi var mɓicaʼa ta ze ta, a nengaʼa a fi va, a da bazl ta ndohi kumba, aman a gi ngulaʼa azɓai.

¹³ Bi te civèɗ kozlar mazlam a da shkè a deɓa a ɓic ta ndohi var kumba a fena nshèlèkuraʼa. Te deɓ mvi kètè a da shkè a deɓa zaʼa a ndohi var kumba a kolongwi var a va kumba.

¹⁴ Te ndev nasa, ndohi kumba ta da slambaɗa na va a bai te civèɗ kozlar iyam. Ndohi wuɗai ta da slèmbèdè, ko te va ndohi ngaya, aman a gi ara ma man ta hodkoɗai, a ta kèlèhai.

¹⁵ A bai te civèɗ kozlar mazlam a shkè a ɗizlè zlazlar a ta nzi a diaʼa, a duma kokwar nʼngalaʼa. Ndohi var te civèɗ kozlar iyam ta slaha nenga ɓai, ko ndohi var nengaʼa mparaʼa.

¹⁶ A ndo ngi var a vna, a da gi ara man ndav nengaʼa a woyaʼa, ndo a slaha a nzlècè a sam nengaʼa azɓai. A da nzi te kokwar nkezlaʼa, skwi ngedassaʼa te ri nengaʼa tèlèba.

¹⁷ Gèɗ na a woya a nkwèr kokwar-bi nengaʼa tèlèba, a tsi gumi a nengaʼa. A da va na dam a ngwoz, a nda gédèshèʼa. Aman gumi ntsa ɓai, a slaha ɓai.

¹⁸ Gèɗ na a woya kokwar nte ndev iyam mbiaʼa, a da dum ta kumba; aman bi ngiɗè a da ndosso ta ma a pa, a tengaʼa man ta ngwossaha.

¹⁹ Te deɓaʼa gèɗ na a woya a ngèlè kokwar nengaʼa a pa. A da gédèsh na, a kèlè auda te bai, a ta ngècè te deɓaʼa asaɓai.

²⁰ Ngidè a slèmbèdè te di man a nengaʼa, a da zlindè ndo sak a kokwar-bi nengaʼa tèlèba, mʼmèn kètè genè ta kolkoɗauda te bai, a ndzoan ka ɓai, a var ka ɓai.

²¹ Ngidè a slèmbèdè te di man a nengaʼa, ndo ambalai, verzi bi ka ɓai. Nengaʼa a da shkè a ngwèdè ndo, a cè kokwar bai.

²² Ndohi var a kerzh ta aussa, a ntseda nderzlè-ma a hai.

²³ Ta gi mandala a vna, te deɓaʼa a ngwod ta, a shkè, a ngècè wuɗai, ko ndohi nengaʼa ta az a vata ɓai.

²⁴ A maya may a a shkè a parda sam mbelaʼa a ma, a gi skwi man babhi nengaʼa a bababhi nengaʼa ta ga ɓai. A da kezla skwi man a nhul a metsar, a skwi ndumè, a kolongwi tèlèba a va tengaʼa, a woya a ngi var a kokwarhi nʼngalaʼa; aman nʼnzi kètè genè.

²⁵ A da haya wuɗi na, a mʼmana ndav na, a mɓic ta ndohi var nengaʼa, a nda gi var a bi te civèɗ kozlar iyam, a bi te civèɗ kozlar iyam a da ɓica ndohi var nengaʼa mbíaʼa, ma wuɗita zhè, aman a slaha a nzlècè a sam na azɓai, a gèɗ man ta vheko na ma a gèɗ.

²⁶ Ndohi nengaʼa man ta ndau skwi a sam staɗ a vna, tengaʼa ta da gedassaʼa. Ndohi var nengaʼa ta ze ta rè, ndohi ta bazl ta kumba.

²⁷ Bihi cèw, skwi ambaɓiaʼa te ndav, ta ndi skwi a sam staɗ. Ngidè a ngela na ma a va ngiɗè, ngiɗè a ngela na ma a va ngiɗè, aman ta slaha va ɓai, a gèɗ man ndikèma skwi a mshkè di ɓai.

²⁸ A nengaʼa a dè a minè a deɓa a kokwar na, a skwi mèshèlè kumba. Aman ndav nengaʼa a woya a ngedassa nderzlè-ma nkezlaʼa. A da gédèshèʼa, a minè a deɓa a kokwar na.

²⁹ A pats ngiɗè staɗ a dè a ngi var a bi te civèɗ kozlar iyam. Aman a da gi ara nshèlèkuraʼa azɓai.

³⁰ Wuromhi Kittim ta shkè a ta da gi var a vna, a mbeɗama na ndav. A ngi gèɗ a nderzlè-ma nkezlaʼa, a da zhèr ndohi man ta jèkeda nderzlè-ma nkezlaʼa.

³¹ Ndohi var nengaʼa ta zhè, ta da derâa sam nkezlaʼa ngedeng-gedengaʼa, ta jèkeda mvi skwi a Zhiklè pèc pècèk, a ta hinè ngédèshè skwai a maya man a ndèrè a ndo.

³² Ndohi man ta derɗa nderzlè-ma, a pe ta a wai, a hada ta ma a hwaɗ. Aman ndohi man ta sun Zhiklè ta, ta da nzala va zuraʼa.

³³ Te va ndohi man maya ta a zhè, ta ngatsa ta maya a ndohi ngiɗè. Aman nʼnzi kètè, matakwan a da ga ta: tsakwal a bazl ta, a vogwa, a ɓèlè, a metsar.

³⁴ Aman ta te matakwan, skwi ntakaha ta a zhe kètè, a ndohi kumba ta da dzadzar ta mberzlazlahaʼa.

³⁵ Te va ndohi man maya ta zhè, matrehiaʼa ta kèlèhai; aman Zhiklè a jkede ta, a nɗèl ta, a mpana ndav ta, ha ndi-kèma skwai a zhè. Samaʼa a zena a shkè.

³⁶ Bai a gi skwi ara man ndav nengaʼa a woyaʼa, a da grè gèɗ, a fi va, a sam zhi-klèhi mèmè, a da fi va a sam Zhiklè a géɗ zhiklèhi tèlèba. A da gèɗè ma nfi va, ha pats nʼndikèma ndzoan Zhiklè, te man skwi man a ngaɗdahai a gai.

³⁷ A hér zhiklèhi babhi na azɓai, a hér zhiklè, man a wuffedè ngwozi, ka ɓai, a fi va a sam ta tèlèba.

³⁸ Aman a slébèrdè Zhiklè kokwar mbiaʼa te diaʼa, zhiklè man babhi nengaʼa ta sun ɓai. A slébèrdèʼa a guro, a verzhègenè, a kwa mbelaʼa, a skwi man gani a pa kumba.

³⁹ A da baha ta ndohi te verzi zhiklè ngiɗè tsaɗ, a ta ɓir kokwar mbiaʼa. Tengaʼa man ta woyaʼa, a slebarde ta kumba. A pa ta ndohi kumba a rai. A kezla ta kokwar a rai te di skwi ntul ta.

⁴⁰ A pats nʼndikèma skwai, bi te civèɗ kozlar iyam ta da zli gèɗ a bi te civèɗ kozlar mazlam, a ta da gi var. A bi te civèɗ kozlar mazlam a da kala na va a kiki var a ndohi plèsh a wuromhai, a kala na va a kokwar, a ndumaʼa, a zumda ta gèɗ.

⁴¹ A shkè a kokwar nkezlaʼa ba, a ndohi kumba ta bazl ta. Aman ndohi haha ta da mbel ta te ri nengaʼa:

⁴² Edom, Moab, a njèkèdi ndohi Ammon. A ndè kèl gèɗ a kokwar ngiɗè, a kokwar Egypte ba.

⁴³ A ngècè wuɗai a géɗ skwi mèshèlè tèlèba, guro a verzhègenè a kolongwi mbelaʼa te Egypte tèlèba. Ndohi Libye a ndohi Ethiopie ta jèjèrèʼa.

⁴⁴ Aman labar ma man a ntsenaʼa te civèɗ mvèng pats, te civèɗ kozlar mazlam a mpa na zlau a gèɗ, a njèkeda kokwar a ndav, a ndè a ngedassa a nzede ta ndohi kumba.

⁴⁵ A da til gi bi nengaʼa mbelaʼa a gèɗ za nkezlaʼa, te ndev Woyamhi mbiaʼa cèw, te pa a da zi na, ndo ntakaha azɓai.