Daniel 10 - Ma Zhiklè

Daniel a ma woyam Hiddékel

¹ Aman bi Cyrus, te Perse, a ngu bi te mvi mamakaraʼa, Zhiklè a nʼngra na ma a Daniel, man ta baha na Beltshatsar. Ma haha, ma nzuraʼa, ma matakwan mbiaʼa. A nengaʼa a nfa na gèɗ, a nʼngots maya a nsun verzi skwi man a nrkaʼa.

² Te ndev nasa iyè Daniel i nza te nlèyè luma makar.

³ I fa na gèɗ a skwi nʼndi ɓai, ko barassa i tara ɓai, ko zluèɗ, i faɗa mbar a va ɓai, ha a ndikè luma makar.

⁴ A ki nshèlèkuraʼa, te mʼmèn 24, i nza a ma woyam mbiaʼa, woyam Hiddékel.

⁵ I pu dai, a i rkaʼa: Na haha, ndo ngiɗè a zhè a maslaka ntsentsai a va, deɓ ndzawaʼa a teɓa guro Uphaz.

⁶ Va nengaʼa nara chrysolithe, kwa mbelaʼa, medi nengaʼa a si dai ara ndidiyam, di nengaʼa a vècè ara vogwa, ri a sak nengaʼa ta si dai ara zi pats mpezaʼa; aman a gèɗè, daʼai nengaʼa a slhè ara nhèzlèwè ndohi rèdè-dèʼa.

⁷ I Daniel staɗgenè man i rkaʼa. Ndohi man ta zhè a tsagi ga, ta rka ɓai. Aman zlau a ndza ta kumba, a ta hu ta, a ta ngheda vata.

⁸ Ta jèkyè a pa a gèɗ ga, a i rka skwi mbiaʼa haha, a ntiyè a hai, i pu di kurzlaʼa,

⁹ a ntiyè a hai raɓ-raɓaʼa. I tsena daʼai nengaʼa. Ncin na, i ɓerzl ga, a i kalda medi a herkeda.

¹⁰ Na haha ri ngiɗè a nlamayè, a nslambaddyè a gurmbèzh a i gudzi a pa kworkworaʼa, a ri ba a sak ba.

¹¹ A ngaɗayè: Daniel, Zhiklè a woy ka kumba, hur ma ga man i gaɗa ka, slambaɗa a ka zlatsa a sak! Aman Zhiklè a nzlindekayè a sam ngaya. Aman a gaɗayè ma haha, i slambaɗa, a i zlatsa, a i gudzi kworkworaʼa.

¹² Te deɓaʼa a ngadayè: Daniel, ka gu zlau ɓai, te nhin pats nshèlèkuraʼa man ndav ngaya a woy a nsun verziaʼa, a ka manda gèɗ a hi a sam Zhiklè ngaya, Zhiklè a ntsena ma ngaya, a i shkè a gèɗ nengaʼa.

¹³ Bigol kokwar Perse a nslambaɗkay a va mʼmèn 21. Micael, tsuvomaʼa te va golahi Zhiklè, a mshkè a ntakahayè, a i jèkeda a pa a sam bihi Perse.

¹⁴ A i shkè, aman i da ngra ka skwi man a da gi a ndohi ngaya, a pats ngiɗè man a ma. Skwi haha ba a goɗ a gèɗ ndikè-ma skwai.

Ngredè verziaʼa

¹⁵ Aman a ngadayè ar haha, i pu di a herkeda, i slaha a i gède ɓai.

¹⁶ A skwi ngiɗè nara ndo a nlama na tapiɗaf ma ga, a i slaha a i winè ma ga, a i gèɗè zaʼa; a i gaɗa na ndo man a zhè a ma ga: Bi ga, a gèɗ skwi man ka ngrayè a haha, a dzay te va, a ntiyè a hai.

¹⁷ Ɓèl bai ara man a ga, a slaha man a ngaɗa na bi mbiaʼa ɗè? Zlau a keɗyè a hai, a cèmay nshèffè auda te ma.

¹⁸ Nengaʼa man ara ndo sa, a nlamay zaʼa, a mvay wuɗai.

¹⁹ A ngadayè: Ka gu zlau ɓai, Zhiklè a woy ka kumba; gumi dá zhè a nda ka! Nzala va ngaya! Aman a ngadayè, i ngots wuɗai, a i gada: Bi ga, goɗ ma ngaya, ka vay wuɗi ma!

²⁰ A nengaʼa a ngaɗa: I shkè a sam ngaya èhèmè, ka sun dè? Antanta i dè deɓa a i gi var a bigol Perse. Aman i da goko var ma, bi Javan a hinèʼa.

²¹ Aman i da ngra ka skwi man mwindèʼa te ɗèlèwèr ma nzuraʼa: Ndo mvay wuɗi ngiɗè azɓai, sèi Micael, bigol Zhiklè kinè, kla.