Daniel 1 - Ma Zhiklè

Ndohi Juif te Babylone

¹ Aman Jojakim, bi Juda, a ngu bi mvi makar, Nebucadnetsar, bi Babylone, a mshkè a kokwar Jérusalem, a nʼnza ta a ma.

² A Bi Zhiklè a mva na Jojakim, bi Juda, a ri a Nebucadnetsar, a kolongwi gi Zhiklè mba man a helda ma. A nengaʼa a ndaʼa a kokwar Shinear, a mpeda kolongwi a gi mèshèlè zhiklè na.

³ Bai a ngaɗa na Ashpenaz, tsuvom ntokotasl-bihai, aman a nhelka ta golahi te va ndohi Israel,

⁴ te verzi bai a ndohi mbibihiaʼa, a gi bai; man va tengaʼa daɓaraʼa, va tengaʼa nsuɗa nekeɗaʼa, maya ta zhè, ta wosla a ta slebau maya, aman aranta ta slaha ta gi mizlinè te gi bai, a ta da shin ɗèlèwèr a daʼai Chaldée.

⁵ Bai a va ta skwi nʼndai pèc pècèk te va skwi nʼndi nengaʼa, te va zom man a siaʼa; a woya man a senda ta mvi makar, a ta da gi mizlinè bai te deɓaʼa.

Golahi faɗ ta woy skwi nʼndi bi ɓai

⁶ Te va tengaʼa, wudahi Juda: Daniel, Hanania, Mishael a Azaria.

⁷ Tsuvom ntokotasl-bihai a mva ta nzlembaɗ mɓuaʼa. Daniel, a baha na Beltshatsar; Hanania a baha na Shadrac; Mishael a baha na Méshac; Azaria a baha na Abed-Nego.

⁸ Daniel a mbasla gèɗ na, a woya a nlizhè ndav na a skwi nʼndi bai a zom man bai a siaʼa, asaɓai. A ndzhoɗo a sam tsuvom ntokotasl-bai, da va na civèɗ, aman a da lizhè ndav na arsa asaɓai.

⁹ A Zhiklè a ngu aman Daniel a nʼngots pombai, a si tsuvom ntokotasl-bai te va.

¹⁰ Aman tsuvom ntokotasl-bai a ngaɗa na Daniel: I gi zlau bai, bi ga, aman a da va kinè skwi nʼndi kinè a skwi nsi kinè a hai. Aman pats ngiɗè a da ngats kinè, va kinè amba ara man a slalhi kinè ɓai, te deɓaʼa a da gay ndzoan a gèɗ kinè.

¹¹ Daniel a ngaɗa na ndo mɓer ta, man tsuvom ntokotasl-bai a mva ta Daniel a Hanania a Mishael a Azaria:

¹² Jkede ta ɓèlèlihi ngaya mʼmèn kula: nga da ndi lak vah, a nga da si iyam.

¹³ Te deɓaʼa ka da wèr va nga, a ka da lèmde nga a va golahi man ta ndau skwi nʼndi bai. Te deɓaʼa ka da gi a sam bèlèlihi ngaya ara man ka rkaʼa.

¹⁴ A nengaʼa a mco ma tengaʼa, a njkede ta mʼmèn kula.

¹⁵ Te deɓ mʼmèn kula, va tengaʼa amba, nsuɗaʼa, a fen ta golahi ngiɗè tèlèba man ta ndau skwi nʼndi bai.

¹⁶ A ma ma, ndo mɓer ta a feda skwi nʼndai a zom man a nʼngotso a ta siaʼa, a hai, a mva ta lak vah.

Golahi faɗ a sam bai

¹⁷ A golahi nfaɗa sa, Zhiklè a mva ta maya nshin ɗèlèwèr tèlèba, a maya tsaɗ tsaɗ. Daniel a slaha a ngredè skwi man a di a shkè, a ngredè verzi nshunè tsaɗ tsaɗ tèlèba.

¹⁸ Tidè samaʼa man ta zlècè a sam bai, tsuvom ntokotasl bai a nde ta a sam Nebucadnetsar.

¹⁹ A bai a ntsau tsaval a nda tengaʼa. Daniel, Hanania, Mishael a Azaria ta fen ta gwolakia ngiɗè tèlèba. A ta hüno mizlinè te gi bai.

²⁰ A gèɗ ma tèlèba man a jhèɗè maya a nshin skwai, bai a baha ta. A nrkaʼa, ta fen ta ndohi kilèa a ndohi maya te kokwar bi nengaʼa tèlèba, a gi sak ngam ngam ba.

²¹ Daniel a nʼnza te gi bai, ha nhin bi Cyrus, te mvi nshèlèkuraʼa.