Colossiens 4 - Ma Zhiklè

¹ Kinè bihai, skwi man a ɓèlèlihi kinè, va-va ta! Kin suna, bi kinè ba a zhè te zhiklè te géɗèʼa.

² Va-tsu ri pèc pècèk, va-nza a dai te nengaʼa, a nshid gèɗ.

³ Va-tsu ri lèmèlèmè a géɗ nga ba, aman Zhiklè da wina nga civèɗ a ma Zhiklè, aman nga ngréɗè skwi Kristi man nʼnghedaʼa, a géɗ nengaʼa man i dzawaʼa.

⁴ Va-tsu rai, aman i ngurdkoɗauda tsarayaʼa.

⁵ Va-nza a maya a sam di ndohi nte deɓa, va-hera na gèɗ a va mizlinè pèc pècèk!

⁶ Va-goɗ te pombi pèc pècèk, wotataʼa ara boma, a kin sun ma man kin mbeɗi a pa a ndo staɗ staɗ tèlèba.

Mbali man a deɓa

⁷ Skwi man i giaʼa, Tychique, kramam ga man i woyaʼa, ndo ntakahayè nlèɓèslèa, ndo man nga mbi a mizlinè a vna,

⁸ man i zlinda kinè, da ngreda kinè, da bid kinè.

⁹ A nda Onesime, kramam ga man i woyaʼa, ndo nlèɓèslèʼa, gwoli kinè. Skwi tèlèba, ara man nga nza, ta da ngreda kinè.

¹⁰ Aristarque, nga te dangai a vna, a ga kinè mbalai, a Marc, kra demam Barnabas ba (a géɗ nengaʼa i gaɗa kinè ma: man a da dè a sam kinè, vo-co).

¹¹ A Yèsu, man ta baha na Justus, te ndev ndohi Juif. Tengaʼa man ta takahayè a géɗ kokwar-Bi Zhiklè, tengaʼa a mbidyè.

¹² Epaphras a ga kinè mbalai, gwoli kinè, ɓèl Yèsu Kristi, man a tsi ri a géɗ kinè pèc pècèk, a vazaza a va, a géɗ man kin zlatsa jèlèlèʼa, a kin shin skwi tèlèba man Zhiklè a woyaʼa, a vava.

¹³ I gi malwuɗi a géɗ nengaʼa: a nʼngeza kumba a géɗ kinè, a géɗ ndohi Laodicée a Hiérapolis.

¹⁴ Luc, ndo madzaf, ndo man i woyaʼa, a ga kinè mbalai, a Demas ba.

¹⁵ Va-ga ta mbalai a kramamhi nga te Laodicée, a Nymphas ba, a ndohi Zhiklè man ta ɓiceda va a gi na.

¹⁶ Aman kin da jènga ɗèlèwèr haha a sam kinè ma, va-gu maya, aman mpi ndohi Zhiklè te Laodicée ba ta jèngèʼa; a kinè, kin jèngè man a Laodicée.

¹⁷ A kin gaɗa na Archippe: Gu maya aman ka gi mizlinè man ka ngots te ri Bai Yèsu, a ka gau!

¹⁸ Na haha mbali ga a ri ga, Paul. Va-heryè, i ndo dangai. Pombai da zhè a nda kinè!