Colossiens 3 - Ma Zhiklè

¹ Aman kin slambaɗkaɗauda a nda Yèsu Kristi, va-woy skwi nte géɗèʼa, man Yèsu Kristi a zhè, a nza a pa te civèɗ ri mandi Zhiklè!

² Va-hur skwi nte géɗèʼa, skwi herkeda ka ɓai.

³ Aman kin mets kinè ma, nshèffè kinè nʼngheda te Kristi, te Bi Zhiklè.

⁴ Aman Kristi, nshèffè nga; aman a da gudko va a dai, kinè ba kin da gudko va a dai a nda nengaʼa, a nʼnjèlè.

Nshèffè mʼmovaʼa a nshèffè mɓuaʼa

⁵ Gar haha va-keɗa na gèɗ a hai a skwi herkeda haha: mphömè, skwi nlizhèʼa, mi skwi ambaɓiaʼa, ntétékè, ndo man a wèr va na genè (nara mʼmbèh skwai);

⁶ a géɗ skwi sa, ndzoan Zhiklè a shkè a géɗ ndohi mèdègèɗ.

⁷ Kine ba kin gu arsa, aman kin nza te mali halaʼa dai.

⁸ Aman antanta va-jèkeda skwi haha: ngi ndav, ndzoan, shèwa, ndérɗe ndo, ngèɗè ma horai.

⁹ Kin tsokol ma a va kinè ɓai! Aman kin suɗko skwi halaʼa a mizlinè nengaʼa auda a va ma.

¹⁰ A kin feda ndo mɓuaʼa a va, man a nʼnge kinè a ndo mɓuaʼa, man a sun skwi Zhiklè tèlèba.

¹¹ Gar haha ndo Grec, ndo Juif, ndo man ngwon nʼngela, ndo man ngwon nʼngel ɓai, ndo barbare, ndo Scythe, ɓèlè, kra ngwi ka ɓai, – aman Kristi, tèlèba, te ndohi tèlèba.

¹² Gar haha kin ndohi man Zhiklè a mpar ta, ndohi nkezlaʼa, ndohi man a woy ta, va-feda skwi haha a va: nsi ndo te va, ndav nlüɓekwaʼa, mʼmèndè gèɗ a hai, ndav amba, nzhèr skwia dai.

¹³ Va-lèɓèslè a va kinè, ngiɗè a sam ngiɗè, va-pra malai, ngiɗè a ngiɗè, man ma a zhè te ndev kinè. Lèmèlèmè ara Bi Zhiklè a mpra kinè malai, va-gu lèmèlèmè.

¹⁴ A géɗ skwi tèlèba, va-feda mwòy-ndo a va, nengaʼa a humdè kinè a njèlèlèʼa.

¹⁵ Gumi Kristi da gu bi te ndav kinè; Zhiklè a mbaha kinè a pa, te va staɗ. Va-shüd gèɗ!

¹⁶ Va-gu aman ma Kristi da zhè te ndav kinè a vata. Va-slebau a va kinè, va-büdo va kinè, a maya tsaɗ tsaɗ, a Psaumes a dimèsh, a dimèsh Mèzhèɓ, a nshid gèɗ a Zhiklè.

¹⁷ Skwi tèlèba man kin giaʼa, ko a ma, ko a mizlinè, va-gu tèlèba a nzlembaɗ Bai Yèsu Kristi. Va-shüd gèɗ a Bab Zhiklè te nengaʼa!

Maya nshèffè mɓuaʼa a sam ndohi tʼhwaɗ gai

¹⁸ Kinè ngwozai, va-fu gèɗ a ma bakihi kinè, ara man ambaha Bi Zhiklè!

¹⁹ Kinè ngurhai, va-woy ngwozi kinè a ndav kinè, kin gu ndav tengtengaʼa a géɗ ta ɓai!

²⁰ Kinè wudahai, va-tsena ma bab a mam kinè te skwi tèlèba; aman kin gi arsa, ambaha Bi Zhiklè.

²¹ Kinè babhai, kin poko ta gèɗ auda a wudahi ɓai, kin mbeɗama ta ndav ɓai!

²² Kinè ɓèlèlihai, va-tsena ma babgihi kinè te skwi tèlèba. Va-gu mizlinè a ndav amba, a sam di ndo genè ka ɓai, va-gu te zlau Bi Zhiklè, ara man ambaha ta ndohi genè ka ɓai.

²³ Skwi tèlèba man kin giaʼa, va-gau a ndav tèlèba, ara man a Bi Zhiklè, a ndohi genè ka ɓai.

²⁴ Va-suna, kin ngècè skwi ntulè a sam Bi Zhiklè, ara skwi nʼndi gai. Va-gu mizlinè Bi Yèsu Kristi!

²⁵ Ndo man a gi zuraʼa azɓai, a ngècè skwi lèmèlèmè ara man a gau. Zhiklè a pèr ndo mpèrè azɓai.