Colossiens 2 - Ma Zhiklè

¹ I woya aman kin sun var ga man i gi a géɗ kinè, a géɗ ndohi Laodicée tèlèba, a géɗ ndohi ngiɗè kumba man ta rkayè a di di ɓai.

² A va ta wuɗi a ndav ta, a ta hümdè te mwoy-ndo a ta shin skwi mbelaʼa tèlèba te Kristi.

³ A ta shin skwi Zhiklè, Bab Kristi, nʼnghedaʼa. Skwi mèshèlè te nshin maya, te nshin skwi tèlèba, nʼngheda te nengaʼa.

⁴ I gaɗa kinè ma haha, aman ndo da pe kinè a wi ɓai, da slafaɗ kinè hi a ma ɓai.

⁵ Ko iyè a sam kinè ɓai, nga humda a nda kinè te Mezhèɓ. A i wuffè aman i rka maya kinè, a ncè-a-ndav kinè te Kristi, man a nza taraʼa.

⁶ Ara man kin co Bai Yèsu Kristi, vo-do a ma ma te nengaʼa!

⁷ Ncè-a-ndav kinè da ga ara zluzlor gedeng-gedengaʼa, a kin dè a ma ma, a kin nzi dai te pa, ara man ta njè kinè. Va-shüd gèɗ a géɗ nengaʼa kumba!

Nshèffè te Kristi

⁸ Va-gu maya, aman ndo ngiɗè a ngwode kinè azɓai a nshindè maya nengaʼa, man a pe kinè a wi a ncèkèlma ambalai, a maya nzakaɗ ndohai. Verzi nengaʼa njè-ma ndohai, a géɗ skwi herkeda, Kristi ka ɓai.

⁹ Aman te Kristi skwi Zhiklè tèlèba a zhè a vava.

¹⁰ Te nengaʼa kin ngots skwi tèlèba. Nengaʼa a géɗ kokwar-bihi, a géɗ wuɗihi tèlèba.

¹¹ Te nengaʼa kinè ndohai man ndav kinè ntila, ntétékè az a sam kinè asaɓai. Kin co Kristi te di man a ngél ngwon.

¹² Ta re kinè a nda nengaʼa te baptême, kin slambaɗkaɗauda a nda nengaʼa te ncè-a-ndav, man Zhiklè a giaʼa, nengaʼa man a slambaɗda te ndev ndohi mʼmetsaʼa.

¹³ A va kinè nshèffè a nda nengaʼa, kinè man halaʼa kinè ndohi mʼmetsa te ri malai, man ndav kinè ntil ɓai, a mpra nga malai te pombi na.

¹⁴ A ngedassa ɗèlèwèr kita man a pin nga, man a fa nga ma a gèɗ. A nco auda te ndev nga, a ndizlda wof ngézlèl na.

¹⁵ A nsuɗama ta wuɗi auda a va kokwar-bihai, a wuɗihai, a nʼngreda ta a sam di ndo tèlè, a ntsa ta sabai a gèɗ.

Va-woy skwi te géɗèʼa!

¹⁶ Gar haha ndo ngiɗè da bazla kinè mali a gèɗ ɓai, a géɗ skwi nʼndai, a géɗ skwi nsai, a géɗ pats ngolala, mvèng kia, pats nshèk va.

¹⁷ Skwi haha tèlèba sèi mèzhèɓ skwi man a ma, te Kristi.

¹⁸ Va-gu maya, ndo da bezlamda kinè skwi ntul kinè ɓai, – ndo man a ga va ara man a manda gèɗ na a hai, a slébèrdè golahi Zhiklè, a jégèr va ambalai te nhér ntétékè va na, a fi va a géɗ skwi man a rka na dai.

¹⁹ Nengaʼa a gsa va a Kristi, man gèɗ, ka ɓai. A géɗ Kristi, va ngsa zuraʼa, a nderzlè gèɗ vatasl a marhi ba, a va a ngrè amba amba, ara man Zhiklè a woyaʼa.

²⁰ Aman antanta kin mets kinè a sam skwi herkeda ma, te Kristi, a kin va ta civèɗ, aman ta fa kinè ma kita a gèɗ, ara man kinè a herkeda dai:

²¹ Ka lama na skwi haha ɓai – ka tor skwi haha ɓai – ka geda ri a pa ɓai – ar ta.

²² Skwi haha tèlèba a di a gédèsh na ara ma nkwèr ndohai, a njè-ma ndohai man ta gaɗa.

²³ Skwi man ta gu a deɓaʼa ara ma maya, ara mwoy Zhiklè; ko ta manda gèɗ ta a hai a ta ɓurto va ta, a géɗ man ta ga zlau Zhiklè ka ɓai, aman a géɗ man ta slaha ta jèjèr ntétékè va ta.