Colossiens 1 - Ma Zhiklè

Mbalai

¹ Paul, ndo sak Kristi Yèsu, ara Zhi-klè man a woyaʼa, a Timothée, kramam nga,

² a sam ndohi Zhiklè nkezlaʼa te Colosses, a sam kramamhi nga nlèɓèslèʼa te Kristi: Pombai a gumai a nda kinè, te Zhiklè, Bab nga!

Ntsi ri Paul a géɗ ndohi Zhiklè te Colosses

³ Nga shid gèɗ a Zhiklè, Bab Bi nga Yèsu Kristi, pèc pècèk, aman nga tsi ri a géɗ kinè,

⁴ te man nga tsenaʼa, ara man kin co Yèsu Kristi a ndav, ara man kin woy ta ndohi Zhiklè tèlèba,

⁵ a géɗ skwi man kin zhèrè te ndav, man ntila tʼhai te zhiklè te géɗèʼa, man kin tsena nshèlèkuraʼa te ma nzuraʼa, ma mbelaʼa.

⁶ Na zhè a sam kinè, na zhè tʼherkeda tèlèba, a yi wuda ngutsuɓaʼa, a grè a ma ma lèmèlèmè ara man a sam kinè, a hüno a pats man kin tsena nshèlèkuraʼa, a kin sun pombi Zhiklè te ma nzura ma.

⁷ Kin sundo arsa a sam Epaphras, man nga woya a ndav nga, man nga mbi a mizlinè a vna. Nengaʼa ndo mizlinè Kristi nlèɓèslèʼa a sam nga,

⁸ man a ngra nga mwoy-ndo a ndav kinè te Mèzhèɓ Zhiklè.

⁹ Gar haha nga ba, a pats man nga tsenaʼa, nga jèka ɓai, aman nga tsi ri a Zhiklè pèc pècèk a géɗ kinè: ndav kinè da ndha te nshin skwi man Zhiklè a woyaʼa, a maya, a nshin skwi te Mèzhèɓ Zhiklè tsaɗ tsaɗ,

¹⁰ a kin nzi ara man Bai Yèsu a woyaʼa, ara man ambaha, pèc pècèk, a skwi man amba staɗ staɗ tèlèba, a shkè auda te mizlinè kine, a kin grè a ma ma te nshin Zhiklè;

¹¹ kin nzala, a wuɗai, ara wuɗi nʼnjèl nengaʼa tèlèba, aman kin dè a ma ma te nzhèr skwi a dai, a mwuffe.

¹² Gar haha va shüd gèɗ a Bab nga, man a til kinè, aman kin slaha a kin ngècè skwi Zhiklè a nda ndohi Zhiklè a sam nhelaʼa.

¹³ A mpreka nga auda te ri wuɗi ruva, a mpe nga a kokwar-Bi kra nengaʼa, man a woya a ndav na,

¹⁴ te nengaʼa gèɗ nga mpela, mali nga mpraʼa.

Skwi man Zhiklè a va nga tèlèba

¹⁵ Nengaʼa lèmèlèmè ara Zhiklè man ndo a nrka a di ɓai, tsuvom skwi tèlèba man Zhiklè a gau.

¹⁶ Aman skwi tèlèba nʼnga a nengaʼa, skwi te giɗfèk, skwi a géɗ herkeda, skwi man di ndo a rkaʼa, skwi man ndo a nrka di ɓai, sam nʼnzi bihai, bihai, kokwar-bihai, a wuɗihai. Skwi tèlèba nʼnga te nengaʼa, a géɗ nengaʼa.

¹⁷ Nengaʼa a zhè nshèlèkuraʼa, a gshè skwi tèlèba, aman a nzi dai.

¹⁸ Nengaʼa gèɗ va, gèɗ mpi ndohi Zhiklè; nengaʼa nhinkaɗ skwi tèlèba, nshèlèkuraʼa man a slambaɗkaɗauda te ndev ndohi mʼmetsaʼa. Te skwi tèlèba tsuvomaʼa.

¹⁹ Ambaha Zhiklè, aman skwi na tèlèba a zhè te nengaʼa.

²⁰ Te nengaʼa Zhiklè a mʼmenda gumai a hai a gèɗ skwi tèlèba, ko a géɗ herkeda, ko te zhiklè te géɗèʼa, te man a tsu gumi a Pombaz nengaʼa a deɓ wof ngézlèl na.

²¹ Kinè ba, man kin halaʼa dra a sam na, mayamhi na te skwi man kin hérèʼa, a kin giaʼa man ambaɓai,

²² Zhiklè a mʼmenda gumi a hai a nda kinè te kra nengaʼa man a vau va nengaʼa a mʼmetsai. A nda zlatsede kinè ndohi nkezlaʼa, mali az a sam kinè ɓai, ma az a gèɗ kinè ɓai a sam di na.

²³ Aman sèi kin nzi taraʼa te ncè-a-ndav, a kin dè a ma ma, a kin gidè va azɓai, a kin jèkeda nzhèr ma mbelaʼa te ndav azɓai, man kin tsenaʼa, a ta njèʼa a géɗ herkeda tèlèba. Iyè Paul, i gaʼa a ndo mizlinè nengaʼa.

Mizlinè Zhiklè Paul a sam mpi ndohi Zhiklè

²⁴ Anai i wuffè te matakwan man i si a géɗ kinè. A matakwan Kristi, man az tèlè di ɓai, i rufa te va ga, a géɗ mpi ndohi Zhiklè, va nengaʼa.

²⁵ I gaʼa a ndo mizlinè tengaʼa, ara Zhiklè man a huro, a mvay a rai, a géɗ kinè, aman i ngreda ma Zhiklè tèlèba.

²⁶ Nasa man nʼngheda daga halaʼa a sam gerzi ndohi tèlèba, aman antanta nʼngreda auda a sam ndohi nengaʼa;

²⁷ tengaʼa man Zhiklè a woya a ngreda ta skwi mèshèlè a nʼnjèlè te skwi man nʼngheda a sam ndohi nte deɓa: nasa Kristi te kinè, nʼnjèlè man nga zhèrè te ndav.

²⁸ Nga njè nengaʼa, a nga bid ta ndohi tèlèba, a nga senda ta ndohi tèlèba, a maya tèlèba, aman nga slaha nga Zlatseda ndo staɗ staɗ jèlèlèʼa te Kristi.

²⁹ A i gi mizlinè a géɗèʼa, a i gi mizlinè sa a vazaza a va, a wuɗi Kristi man a zhè te ndav ga.