Apocalypse 9 - Ma Zhiklè

¹ A gol Zhiklè mazlamaʼa a ntsu tolom: a i rka bantai a giɗfèk, ta wushka ta hai a géɗ herkeda. A ta va na skwi mwinè vèvèɗ mpèltemtemaʼa.

² A nengaʼa a winè vèvèɗ mpèltemtemaʼa, a vodzok a mshkè auda ara vodzok gezla, a nzede pats, a sam a ngu téɗèɗikɗikaʼa a géɗ vogwa te vèvèɗ.

³ Te va vodzok dzarihai ta shkè auda a géɗ herkeda, a ta ngots wuɗi ara ndalangar a nʼngots wuɗibi a géɗ herkeda.

⁴ A ta gaɗa ta, aman ta gédèshè mandai a kuza tsaɗ tsaɗ tèlèba, a wofhi a géɗ herkeda, azɓai, sèi ndohi genè, man Bi Zhiklè a ntsa ta lamba a medi tengaʼa ɓai.

⁵ A ta ngots civèɗ, aman ta ga ta matakwan ki zlam, a skwa a ndza ta ara ndzi ndalangar man a ɓèr ndo.

⁶ A pats nasa ndohi ta woy a ta metsai, aman ta ngècè azɓai. Ta woy a ta metsai, aman mʼmetsi a hi na auda a sam ta.

⁷ Dzarai lèmèlèmè ara plèshihi man ta tila a var, gèɗ tengaʼa mpaɗaʼa ara guro, di tengaʼa ara di ndo,

⁸ gwots tengaʼa gwots gèɗ ndzuvaʼa, zlèʼèn tengaʼa ara zlèʼèn marizhèlè,

⁹ limbèt ara züdo a ndav, kuɗ kelpaslihi ta ara kuɗ mota plèshi var, man ta hi a sam var.

¹⁰ Hutor tengaʼa ara ndalangar man ta ɓèr ndo a vna. Te hutor tengaʼa wuɗi ta a zhè, aman ta ga ta matakwan a ndohi ki zlam.

¹¹ Bi tengaʼa, gol vèvèɗ mpèltemtemaʼa, nzlembaɗ na a ma hébreu Abaddon, a ma grec Apollyon.

¹² Wobau nshèlèkuraʼa kala auda ma. Na haha, njèkè wobau cèw dai.

¹³ A gol Zhiklè mamokwaʼa a ntsu tolom: A i tsena ngèɗè staɗ a sam zlogomhi sam mvi skwi a Zhiklè guro faɗ, man a zhè a sam di Zhiklè,

¹⁴ man a gaɗa na gol Zhiklè mamokwaʼa, man a ngots tolom: Pre ta golahi faɗ man ta dzawa a ma Euphrate, woyam mbiaʼa.

¹⁵ A ta pre ta golahi Zhiklè faɗ man ta tila a samaʼa, a patsaʼa, a ki sa, a vi sa, aman ta bazl ta ndohi herkeda, man ta kezla makar.

¹⁶ A ndohi a deɓ plèsh ta gi gozhèm gozhèm kumba, i tsena man ta nger ta.

¹⁷ A i rka ara te nshunè, plèshihi var a ndohi a deɓ plèshihi a limbèt mpeplèsh a nkokurikra a va, man vogwa te pa. Gèɗ plèshihai ara gèɗ marizhèlè, te ma tengaʼa vogwa a vodzok a skwi nvècè vogwa a shkè auda.

¹⁸ A skwi ngedassa makar haha, ndohi herkeda man ta kezla makar, ta bazl ta te va vogwa a vodzok a skwi nvècè vogwa, man a shkè auda te ma tengaʼa.

¹⁹ Wuɗi plèshihi te ma tenga ba, te hutor tenga ba. Hutor tengaʼa ara zhüzhokihai, a gèɗhi a ma hutor. Ta gedassa skwi a nda tengaʼa.

²⁰ Njèkèɗi ndohi man ta bazl ta ɓai a skwi ngedassa haha, ta ngwode ndav ta ɓai a ta gu skwi ta genè, a ta jèka ntsi ri a bi mazdagi ɓai; ta tsu ri a zhiklèhi man ta gu a guro, a verzhègenè, a züdo, a kwa, a wof, man ta rka di ɓi genè, man ta tsena zlembaɗ ɓai, ta dè a sak azɓai.

²¹ A ta ngwodko ndav ta ɓai te nkéɗ ndo, mʼmbèh skwai, mphömè ta, a metsar ta.