Apocalypse 8 - Ma Zhiklè

Skwi mpizlè ntkotsaʼa matsaraɗaʼa

¹ Aman kra tambak a mpelasla skwi mpizlè ntkotsaʼa matsaraɗaʼa, ta nza dibèaʼa te zhiklè, nshin va kètè.

² A i rka golahi Zhiklè tsaraɗ, man ta zlatsa a sam mvi skwi a Zhiklè, a ta pa ta tolomhi tsaraɗ.

³ A gol Zhiklè ngiɗè a mshkè, a nzlatsa a géɗ sam mvi skwi a Zhiklè, a kokwi guro ɓurdi te rai, a ta va na ɓurdi kumba, man a da via a géɗ sam mvi skwi a Zhiklè guro, a sam nʼnzi bai, a nda ntsi ri ndohi Zhiklè tèlèba.

⁴ A vodzok burdi a mdo a géɗèʼa, a nda ntsi ri ndohi Zhiklè te ri gol Zhiklè, a sam di Zhiklè.

⁵ A gol Zhiklè a nco kokwi burdi, a nfa na vogwa a sam mvi skwi a Zhiklè, a mbadahai a herkeda. A iyam a ntsai, a iyam a nʼndi dai, a herkeda a ngudzai.

Tolomhai

⁶ A golahi Zhiklè tsaraɗ, a tolomhi tsaraɗ, ta tila va ta, a ta hüno ntsiaʼa.

⁷ A gol Zhiklè nshèlèkuraʼa a ntsu tolom: a vandzal a vogwa, ndzakaɓa a Pombaz, a nkalahi a herkeda, a vogwa a nʼndaha herkeda, a sam, man ta kezla makar, a nʼndaha staɗ te va wofhi makar a sam wofhi tèlèba, a kuza ba.

⁸ A gol Zhiklè macecèwaʼa a ntsu tolom: a skwi ngiɗè nara za mbiaʼa, man vogwa a ndiaʼa, a mʼmbeɗ na hai a ndev iyam mbiaʼa, a iyam mbiaʼa man ta kezla makar, a nʼngwode na a Pombaz.

⁹ A skwi te pa, man Zhiklè a mva na nshèffè, man ta kezla makar, ta bazl ta, a wuromhai man ta kezla makar, ta gedas ta.

¹⁰ A gol Zhiklè mamakaraʼa a ntsu tolom: A banti mbiaʼa a kalkaɗahai ara vogwa mbiaʼa, a nkal na a ndev woyam man ta kezla makar, a nlèlè iyam ba.

¹¹ Nzlembaɗ bantiaʼa, dèrvowa. A iyam, man ta kezla makar, a nʼngwode na a dèrvowa, a ndohi kumba ta bazl ta, a géɗ man ta su iyam sa, iyam nɗuzlekzlekaʼa.

¹² A gol Zhiklè mafaɗaʼa a ntsu tolom: a ntsu pats man ta kezla makar, a kia a bantihai man ta kezla makar, a ta ngwode ta a ruva. Ko pats ko vaɗ man ta kezla makar, a nze na.

¹³ A i rka, a i tsena Vezi man a hi te ndev giɗfèk, man a goɗ ngèɗè a wuɗai: Wobau, wobau, wobau a sam tengaʼa man ta nza a géɗ herkeda, a géɗ njèkèɗi tolom makar, man golahi Zhiklè ngiɗè ta hinè a ta tsia antanta.