Apocalypse 6 - Ma Zhiklè

Skwi ntkotsa a tsaraɗ man a pizlèda ɗèlèwèr a pa

¹ A i rka kra tambak, man a mpelasla skwi mpizlè ntkotsaʼa staɗ te va tsaraɗ, a i tsena staɗ te va skwihi faɗ a nshèffe, man a goɗ ngèɗè ara ntsi iyam: Wash-kè!

² A i rka plèsh nslekaɗa ngiɗè. A ndo man a deɓ plèsh a lèkèɗ te rai. Ta paɗa na gèɗ, a ndè, aman a da gi a ngulaʼa.

³ Aman a mpelasla skwi mpizlè ntkotsaʼa macecèwaʼa, i tsena skwi macecèwaʼa man a nshèffe, man a gaɗa: Washkè!

⁴ A plèsh ngiɗè a mshkè auda, plèsh nteva. Ndo man a deɓ plèsh ta va na wuɗi ngédeshè gumi tʼherkeda, a ndohi ta zli daʼai ta; a nengaʼa a nʼngots kafahi gwèsh mbiaʼa.

⁵ Aman a mpelasla skwi mpizlè ntkotsaʼa mamakaraʼa, i tsena skwi mamakaraʼa man a nshèffè, man a gaɗa: Washke! A i rka plèsh mʼmadza. Ndo a deɓ plèsh a nʼngots skwi nlivè skwai ara kilo te ri na.

⁶ A i tsena ngèɗè staɗ te va skwihi faɗ a nshèffe, man a gaɗa: dau agoda staɗ te di mvèkè a mizlinè. Salawa agoda makar te di nvèkè a mizlinè. Aman gani mbar a barassa da ngwode ɓai!

⁷ Aman a mpelasla skwi mpizlè ntkotsaʼa mafaɗaʼa, i tsena ngèɗè skwi mafaɗaʼa man a nshèffè, man a gaɗa: Washke!

⁸ A i rka plèsh nkuftorhoʼa. Ndo a deɓ plèsh, nzlembaɗ na mʼmetsai, a kokwar-bi mʼmetsai a jèjèrèʼa. Tengaʼa ta ngots wuɗai a géɗ herkeda, a sam man ta kezla faɗ, aman ta keɗaʼa a kafahi gwèsh, a mai, a mʼmetsai, a skwi dakhai.

⁹ Aman a mpelasla skwi mpizlè ntkotsaʼa mazlamaʼa, i rka te laɓi sam mvi skwi a Zhiklè, mèzhèɓ ndohi man ta bazl ta a géɗ ma Zhiklè, a géɗ ma malwuɗi tengaʼa.

¹⁰ A ta boho a wuɗai, a ta gaɗa: Bai, ka ndo nkezlaʼa, ndo nzuraʼa, nʼnzi tèkè aman ka gi kita azɓai, ka pela Pombaz nga azɓai a sam tengaʼa tʼherkeda?

¹¹ A ta va ta maslaka nslekaɗaʼa staɗ staɗ, a ta gaɗa ta aman ta nzi kètè dai, ha ɓèlèlihi ngiɗè a kramamhi tengaʼa ngiɗè ba man sèi ta da bazl ta dai, ara tengaʼa.

¹² A i rkaʼa: man a mpelasla skwi mpizlè ntkotsaʼa mamokwaʼa, herkeda a ngudzau kumba, pats a nʼnde na a ruva téɗèɗikɗikaʼa, a ki a nʼnde na a Pombaz,

¹³ a bantihi te giɗfèk ta wush ta hai a herkeda, lèmèlèmè ara wof kslor, man nyi na a wush na, aman kozlar a gègérdèʼa.

¹⁴ Giɗfèk a mʼmende va na a deɓa ara ɗèlèwèr man ta paɗaʼa, a zahai a herkedahai te ndev iyam, tèlèba ta hel ta auda a sam nʼnzi ta.

¹⁵ A bihi herkeda a ndohi mbibihiaʼa, a bihi sojè, a ndohi mèshèlè, a ndohi wuɗai, a ɓèlèlihi tèlèba, a wud ngwihi tèlèba, ta nghede va ta a slrats, te di kwazlazlamhai te za,

¹⁶ a ta gaɗa ta zahai a kwazlazlamhai: Va-mbeɗka nga a gèɗ, va-nghede nga a sam di nengaʼa man a nzi a géɗ sam nʼnzi bai, a sam ndzoan kra tambak!

¹⁷ Aman ndzoan nengaʼa mbiaʼa a mshkè ma. Nslaha a nzlècè wa?