Apocalypse 5 - Ma Zhiklè

Ɗèlèwèr kra tambak

¹ A i rka ɗèlèwèr te ri mandi ndo a géɗ sam nʼnzi bai, skwi mwindèʼa a pa tʼhwaɗaʼa, a deɓa ba, ntkotsa a pa a skwi mpizlèa tsaraɗ.

² A i rka gol Zhiklè man wuɗi na a zhè, a bèhè a wuɗai: Nslaha a mwinè ɗèlèwèr, a mpelasla skwi mpizlè ntkotsaʼa a pa wa?

³ Ndo azɓai, ko te zhiklè, ko tʼherkeda, ko tʼhwaɗ herkeda, man a slaha a mwinè ɗèlèwèr, a mpi di a pa.

⁴ A i kuɗau kumba, aman ta ngatsa ndo ɓai, man a slaha a mwinè ɗèlèwèr, a mpi di a pa.

⁵ A ndo nhalaʼa staɗ a ngaɗayè: Ka kuɗ ɓai! Na haha, marizhèlè te verzi Judée, zluzlor David, nʼngaʼa a ngulaʼa, a da winè ɗèlèwèr a skwi mpizlè ntkotsaʼa a pa tsaraɗ.

⁶ A i rka kra tambak te ndev sam nʼnzi bai a skwihi faɗ a nshèffè, a ndohi nhalaʼa; kra tambak sa ara man ta zlama na daʼai ma, a drom tsaraɗ, a di tsaraɗ. Nasa Mèzhèɓhi Zhiklè tsaraɗ man ta zlinde ta a herkeda tèlèba.

⁷ A kra tambak a mshkè, a nco ɗèlèwèr te ri mandi nengaʼa a géɗ sam nʼnzi bai.

⁸ Ncè ɗèlèwèr na, skwihi faɗ a nshèffè, a ndohi nhalaʼa 24, ta kalahi a deɓ sak kra tambak. Tèlèba te ndev ta ta ngots ganzavar a kokwi guro, nʼndha a burdi. Nasa ntsi ri ndohi Zhiklè.

⁹ A ta slu dimèsh mɓuaʼa, a ta gaɗa: Ka amba, ka slaha a ka cè ɗèlèwèr, a ka pelasla skwi mpizlè ntkotsaʼa, a géɗ man ta zlama ka daʼai, ka sumka ta ndohi te verzi tsaɗ tsaɗ, a daʼai ta tsaɗ tsaɗ, ndohi kokwar a ndohi herkeda tsaɗ tsaɗ tèlèba a deɓa a Zhiklè, a Pombaz ngaya,

¹⁰ a ka ge ta a bihai, a ndohi mvi skwi a Zhiklè, a sam Zhiklè nga, a ta da gi bi a géɗ herkeda.

¹¹ A i rka, a i tsena daʼai golahi Zhiklè kumba. Ta a tsagi sam nʼnzi bai, a skwihi a nshèffè, a ndohi nhalaʼa. Ta ara gozhèm gozhèm kumba,

¹² a ta boho a wuɗai: Kra tambak, man ta zlama na daʼai, amba, a slaha a ncè wuɗi bai, a mèshèlè, a maya, wuɗai a nslébèrdè, a nʼnjè-lè, a nshid gèɗ.

¹³ A skwi nʼngaʼa tèlèba te zhiklè, tʼherkeda, tʼhwaɗ herkeda, te woyam mbiaʼa, a skwi tèlèba te pa, i tsena ara man ta gaɗa: A nengaʼa man a nzi a géɗ sam nʼnzi bai, a kra tambak, nshid gèɗ, a nslébèrdè, a nʼnjèlè, a wuɗi mbiaʼa te nhinkaɗ na a mèdèp!

¹⁴ A skwihi faɗ a nshèffe ta gaɗa: Amen; a ndohi nhalaʼa ta kalahi a deɓ sak nengaʼa, a ta slubordo nengaʼa.