Apocalypse 4 - Ma Zhiklè

Ntsi ri te zhiklè fe géɗèʼa

¹ Te deɓaʼa i pu dai, a i rka ntamagai mwinèʼa te zhiklè. A ngèɗè man i tsena nshèlèkuraʼa, man a gaɗayè ara tolom, a ngaɗa: Tevkaɗa haha, i war a i ngra ka skwi man a da gi a ma. A nasa nasa Mèzhèɓ Zhiklè a mshkè a gèɗ ga.

² A i rka sam nʼnzi bai te zhiklè a zhè, a ndo a nʼnza a pa.

³ Ndo man a nza a pa, nara kwa jaspe a sardoine, kwarai, man a rkè ara éméraude, a ntèuda sam nʼnzi bi a pa.

⁴ Sam nʼnzi bihi 24 ta tèuda sam nʼnzi bi matsa a pa; a géɗ sam nʼnzi bihi ndohi nhalaʼa 24 a pa, a maslaka nslekaɗaʼa, gèɗ mpaɗaʼa a guro.

⁵ Ndidiyam a mshkè auda a sam nʼnzi bai, a ngèɗè, a ntsi iyam. A ma sam nʼnzi bai, skwi ntiv vogwa tsaraɗ, a vogwa a pa, tengaʼa Mèzhèɓhi Zhiklè tsaraɗ.

⁶ Dal sam nʼnzi bai ara woyam mbiaʼa man a si dai, ara kwa man a si di tsuzli-tsuzliaʼa; te ndev sam nʼnzi bai, a tsagi sam nʼnzi bai skwihi faɗ a nshèffè, a di kumba a ma ba, te deɓa ba.

⁷ Skwi nshèlèkuraʼa nara marizhèlè, skwi macecèwaʼa nara kra zlè, mamakaraʼa di ara ndo, mafaɗaʼa nara Vezi man a hai.

⁸ Skwi faɗ staɗ staɗ tèlèba ta ngots kelpasl mokwa, a di kumba tʼhwaɗaʼa, a ta ngots sam nshèk va ɓai, a pats a vaɗ, a ta gaɗa: Nkezlaʼa, nkezlaʼa, nkezlaʼa, Bi Zhiklè, Bi wuɗi tèlèba, man a zhè zlèzlèa, man a zhè antanta, man a di a shkè.

⁹ Te va man skwihi sa ta slébèrdè nʼnjèl ndo man a nzi a géɗ sam nʼnzi bai, man a nzi a nshèffè te nhinkaɗ na a mèdèp, a ta shid gèɗ,

¹⁰ ndohi nhalaʼa 24 ta kalahi a deɓ sak ndo man a géɗ sam nʼnzi bai, ta slubordo nengaʼa man a nzi a nshèffè te nhinkaɗ na a mèdèp, a ta feda mpèɗè gèɗ tengaʼa a hai a ma sam nʼnzi bai, a ta gaɗa:

¹¹ Bai, Zhiklè nga, ka amba man ta slébèrdè nʼnjèl ngaya a wuɗi ngaya, te man ka gu skwi tèlèba. A géɗ man ka woyaʼa ta zhè, ta gaʼa.