Apocalypse 3 - Ma Zhiklè

Njè-ma a sam mpi ndohi Zhiklè te Sardes

¹ Winda na tsuvom mpi ndohi Zhiklè te kokwar Sardes: Nengaʼa man a ngots Mèzhèɓhi Zhiklè tsaraɗ, a bantihi tsaraɗ, a goɗ ar haha: I sun skwi man ka giaʼa. Labar ma ngaya, ara man ka nzi a nshèffè, aman ka metsa.

² Nza a dai, va na wuɗi a njè-kèɗiaʼa te ndav ngaya man a woya a metsi na. I ngots mizlinè ngaya a slra na di a Zhiklè ga zura ɓai.

³ Gar haha huro, ara man ka ngotso, ara man ka tsenaʼa. Fu gèɗèʼa, a ka ngwode ndav! Aman ka nzi a di azɓai, i da shkè ara ndo metsar, ka shin sam tèkè man i da shkè azɓi fèt.

⁴ Aman ka ngots ndohi faɗkata te Sardes, man ta lizha maslaka tengaʼa ɓai. Ta da shèwèlè a nda iyè a maslaka nslekaɗaʼa a va, te man tengaʼa ta amba, aman ta gi arsa.

⁵ Ndo man nʼngaʼa a ngulaʼa, sèi ta va na maslaka nslekaɗaʼa a va. I woya a i gédèshè nzlembaɗ nengaʼa te ɗèlèwèr nshèffè azɓai, a i woya man i ngrédè nzlembaɗ nengaʼa a sam di Bab ga, a sam di golahi nengaʼa ba.

⁶ Ndo man zlembaɗ na a zhè, da tsena ma man Mèzhèɓ Zhiklè a gaɗa ta mpi ndohi Zhiklè.

Njè-ma a sam mpi ndohi Zhiklè te Philadelphie

⁷ Winda na tsuvom mpi ndohi Zhiklè te kokwar Philadelphie: Nengaʼa man nkezla, ndo nzuraʼa man a ngots skwi mwinè ntamagi man a David, man a winèʼa, ndo ngiɗè a slaha a mpizlè te deɓaʼa ɓai. Man a mpizlèa, ndo ngiɗè a slaha a mwinè te deɓaʼa ɓai. Nengaʼa a goɗ ar haha:

⁸ I sun skwi man ka giaʼa. Na haha i wina ntamagi ngiɗè a sam ngaya, ndo a slaha a mpizlèʼa azɓai. I suna, wuɗi ngaya az a vata ɓai; aman ka ɓür ma ga genè, a ka tsakala ma a géɗ nzlembaɗ ga ɓai.

⁹ Na haha i woy a i gi aman ndohi te gi njèngè ma Sadan, man ta gaɗa, nga ndohi Juif, a ta goɗ a ncèkèlma, a ta da shkè, a ta kèlèhai a deɓ sak ngaya, a ta suna ara man i woy ka.

¹⁰ A géɗ man ka ɓür ma ga, a ka zhèr skwi a dai, i ba i woy a i ɓir ka a sam njkédè ndo, man a di a shkè a géɗ ndohi herkeda tèlèba.

¹¹ Na haha, i shkè ndul ndul; ɓür skwi man ka ngotso, ndo ngiɗè da cèma ka mpèɗè gèɗ ngaya ɓai!

¹² Ndo man nʼngaʼa a ngulaʼa, i woy a i giaʼa a sak gi Zhiklè ga, a dè auda te deɓaʼa azɓai, a i woy a i windè a va nengaʼa: nzlembaɗ Bi Zhiklè ga, a nzlembaɗ kokwar mbiaʼa a Zhiklè ga, Jérusalem mɓuaʼa, man a shkèhai te zhiklè, a sam Bi Zhiklè ga. A i windè nzlembaɗ ga mɓuaʼa a pa.

¹³ Ndo man zlembaɗ na a zhè, da tsena ma man Mèzhèɓ Zhiklè a gaɗa ta mpi ndohi Zhiklè.

Njè-ma a sam mpi ndohi Zhiklè te Laodicée

¹⁴ Winda na tsuvom mpi ndohi Zhiklè te kokwar Laodicée: Nengaʼa man zlembaɗ na Amen, ndo malwuɗi nlèɓèslèa a nzuraʼa, nhinkaɗ skwi man Zhiklè a gau, a goɗ ar haha:

¹⁵ I sun skwi man ka giaʼa, ka nze tʼhi ɓai, ka wosla a mizlinè ɓai. Ar a woy ka ga staɗ te vaʼa.

¹⁶ A géɗ man ka te mpataka ambalai, ka nze tʼhi bai, ka wosla a mizlinè ɓai, i da kwol ka.

¹⁷ Ka gaɗa: i ndo mèshèlè, i gau amba, skwi tèlè a zhè a sam ga. A ka sun ɓi genè, ka mbelawa, lamba a nde ka, ka tawassa, ka mandazlai, ka adai.

¹⁸ I gaɗa ka ma maya staɗ: sèi ka shum guro man vogwa a mwoslaʼa, a ka ndi a ndo mèshèlè; a ka shum maslaka nslekaɗaʼa, a ka feda a va, a hori ngaya man ka adai a gidè auda azɓai; a ka shum madzaf dai, a ka da geda a di ngaya, a ka rka di zuraʼa.

¹⁹ Ndohi man i woy ta a ndav ga, i ngatsa ta maya a ndzoan, a i ngez ta. Gar haha nzala va ngaya, a ka ngwode ndav ngaya!

²⁰ Na haha iye a ntamagai, a i bèhè. Ndo man a tsena daʼai ga, a da winay ntamagai, i dè a pa a sam nengaʼa, a nga da ndi skwi a nda nengaʼa, a nengaʼa a nda iyè.

²¹ Ndo man nʼngaʼa a ngulaʼa, i woy nga da nzi a sam nʼnzi ga a vna, lèmèlèmè ara man i gaʼa a ngulaʼa, a i nza tʼhai a nda Bab ga a sam nʼnzi bi nengaʼa.

²² Ndo man zlembaɗ na a zhè, da tsena ma man Mèzhèɓ Zhiklè a gaɗa ta mpi ndohi Zhiklè.