Apocalypse 22 - Ma Zhiklè

¹ Te deɓaʼa a nʼngray woyam mbiaʼa a iyam nshèffè nkéɗècèʼa, man a shkè auda a sam nʼnzi Bi Zhiklè a kra tambak.

² A tsagi woyam cèw, te ndev civèɗ, wof nshèffè staɗ, man a yi skwai, sak 12, tʼhwaɗ mvi staɗ, a yi wud na a kia kia. Vah wofaʼa a mbel ta ndohi herkeda te matakwan.

³ Skwi mphomdaʼa az te pa ɓai. Sam nʼnzi bi Zhiklè a kra tambak a da zhè te pa, a ɓèlèlihi nengaʼa ta takaha,

⁴ a ta rka Zhiklè a iyam di a iyam dai, a nzlembaɗ nengaʼa a zhè a medi tengaʼa.

⁵ Vaɗ a da gi asaɓai, ko pitirla, ko pats azɓai, aman Zhiklè, Bai, a da hela ta sam. A ta gi bai a mèdèp.

Yèsu a di a shkè

⁶ A ngaɗayè: Ma haha nzuraʼa a vava: Bi Zhiklè, Bi mèzhèɓ ndohi nhadka ma, a nzlündo gol nengaʼa man a ngra ta ɓèlèlihi nengaʼa skwi man a da gia ndul ndul.

⁷ Na haha, i shkè ndul ndul. Mwuffe a sam nengaʼa man a fi gèɗ a ma man ɗèlèwèr haha a hodkoɗai.

⁸ Iyè, Jean, iyè man i tsena ar haha, a i rka ar haha. Ncin na, mrkè na, i kalahai a deɓ sak nengaʼa, a i tsu ri a gol Zhiklè man a ngray ar haha.

⁹ A nengaʼa a ngaɗayè: Az arsa ɓai! Aman iyè ba, i ɓèlè ara ngaya, ara kramamhi ngaya, ndohi nhadka ma, a tengaʼa man ta fi gèɗ a ma ɗèlèwèr haha. Tsu ri a Zhiklè!

¹⁰ A ngaɗayè: Ka pizlè ma man dèlèwèr haha a hodkoɗi a skwi mpizlè ntkotsaʼa ɓai, aman tiɗè sama ma!

¹¹ Ndo man a gi skwi ambaɓiaʼa, da gu ambaɓi a ma ma. Ndo man nlizhèʼa, da lüzho a ma ma. Ndo man a gi zuraʼa, da gu zuraʼa a ma ma. Ndo man ndav nengaʼa nkezlaʼa, da gu aman ndav nengaʼa nkezla a ma ma.

¹² Na haha, i shkè a deɓa ndul ndul, a skwi ntul kinè te rai, aman i va na a ndo staɗ staɗ ara skwi nengaʼa man a gau.

¹³ Iyè, Alpha a Oméga, ndo nshèlèkuraʼa a ndo nʼndikèma skwai, nhinkaɗ skwai a nʼndikèma skwai.

¹⁴ Mwuffe a sam tengaʼa man ta pènè maslaka ta, a ta ngècè skwi ta a sam wof nshèffè, ta de a pa a ntamagi kokwar.

¹⁵ Kdadihai, ndohi mʼmbèh skwai, ndohi mphömè, ndohi nkeɗ ndo, ndohi vrai, ndo staɗ staɗ tèlèba man a cèkèlma te ngèɗè, te skwi man ta giaʼa, ta tʼuda.

¹⁶ Iyè, Yèsu, i zlinde ta golahi ga a ma malwuɗi ar haha a sam kinè, a ta ngra ta mpi ndohi Zhiklè. Iyè zluzlor verzi David, mavar prèk man a hél sam.

¹⁷ A Mèzhèɓ Zhiklè a medemi ta gada: Washkè! A ndo man a tsenaʼa, da goɗ: Washkè! A ndo man iyam a dza na, da shkè. Ko wawa man a woyaʼa, da co iyam nshèffè, ambalai.

¹⁸ I ngreda ta ndohi tèlèba man ta tsena ma man ɗèlèwèr haha a hodkoɗai: Ndo man a vi ma a vaʼa, Zhiklè a da va na matakwan man ta Windo te ɗèlèwèr haha a vaʼa.

¹⁹ Ndo man a helaha te ma man ɗèlèwèr haha a hodkoɗai, Zhiklè a da helaha te skwi man a ngècè a sam wof nshèffè, a sam kokwar nkezlaʼa, man ta Windo te ɗèlèwèr haha.

²⁰ Nengaʼa man a ngrédè ma malwuɗi ar haha, a gaɗa: Anai i shkè ndul ndul. Amen, washkè, Bai Yèsu.

²¹ Pombi Bi Yèsu da zhè a nda kinè tèlèba! Amen.