Apocalypse 20 - Ma Zhiklè

Mvi 1.000

¹ A i rka gol Zhiklè ngiɗè man a shkè te zhiklè, a skwi mwinè vèvèɗ mpèltemtemaʼa te rai, a cèlèlèu mbiaʼa.

² A ngso skwi man nara kedam, zhüzhok zlèzlèa, nengaʼa bi madzagai a Sadan, a ndzawaʼa mvi gozhèm staɗ,

³ a nkalda a vèvèɗ mpèltemtemaʼa, a mpizleda pa a skwi mpizlèʼa, ntkotsa a deɓaʼa, aman a slaha a mpe ta ndohi herkeda a wi asaɓai, ha mvi gozhèm staɗ klèng. Te deɓaʼa ta da prèʼa kèshkata zaʼa.

⁴ A i rka sam nʼnzi bihai, a ndohi man ta da gi kita, ta nza a pa. A i rka mèzhèɓ nshèffè ndohai, man ta zlama ta daʼai a géɗ malwuɗi Yèsu, a géɗ ma Zhiklè, a tengaʼa man ta tsu ri a skwi dak a skwi man ta gu ara nengaʼa, ɓai, a ta co lamba nengaʼa a medi tengaʼa, a ri tengaʼa, ɓai. A ta ngots nshèffè zaʼa, a ta gu bi a nda Kristi, mvi gozhèm staɗ.

⁵ Ndohi mʼmetsaʼa ngiɗè ta ngatsa nshèffè a deɓa ɓai, ha mvi gozhèm staɗ klèng. Nasa nslambaɗkaɗauda nshèlèkuraʼa.

⁶ Mwuffè a sam ndohai man ta te va ndohi man ta slambaɗkaɗauda nshèlèkuraʼa. Mʼmetsi macecèwaʼa a ngècè wuɗi-bai a géɗ tengaʼa asaɓai. Aman ta gi a ndohi mvi skwi a Zhiklè a sam Kristi, a ta gi bi a nda nengaʼa, mvi gozhèm staɗ.

⁷ Te deɓaʼa, man mvi gozhèm staɗ klèng ma, ta da proko Sadan auda te dangi nengaʼa.

⁸ A nengaʼa a ndè aman a pe ta ndohi herkeda te tsagi herkeda faɗ a wai, Gog a Magog, a mɓic ta a sam var. Ta ngrè azɓai, ta kumba ara wyak te woyam mbiaʼa.

⁹ A ta zlèzlèmè a géɗ herkeda, a ta tèuda sam nhèy ndohi var nkezlaʼa a pa, a kokwar man Zhiklè a woyaʼa a ndav na. A vogwa a nkalka te zhiklè, a nʼnde ta ma.

¹⁰ A bi madzagai man a pe ta a wai, ta kalda a vogwa mbiaʼa, a skwi nvècè vogwa te pa, a sam man skwi dak a ndo nhadka ncèkèlma ba nte pa, a ta ga ta matakwan a pats ba a vaɗ ba a mèdèp.

Kita a sam nʼnzi bi nslekaɗaʼa

¹¹ A i rka sam nʼnzi bi mbiaʼa nslekaɗa, a ndo man nʼnza a pa: A sam di nengaʼa, herkeda a giɗfèk to do ta, a ta ngatsa sam nʼnzi tengaʼa te deɓaʼa asaɓai.

¹² A i rka ndohi mʼmetsaʼa, mbibihiaʼa ba a nkèshèhia ba, ta zlatsa a sam nʼnzi bai. A ta winè ɗèlèwèrhi a pa. Ɗèlèwèr ngiɗè, man ta winèʼa, nengaʼa ɗèlèwèr nshèffè; a ta ga ta kita a géɗ ndohi mʼmetsaʼa a géɗ skwi man ta gau, mwindèʼa te ɗèlèwèr-hai.

¹³ A iyam mbiaʼa a mʼmendka ta ndohi mʼmetsaʼa a deɓa zaʼa. A mʼmetsai, a kokwar-bi nengaʼa a mʼmendka ta ndohi mʼmetsaʼa a deɓa zaʼa. A ta ga ta kita a gèɗ ndo staɗ staɗ ara skwi man a gau.

¹⁴ Ta wushede mʼmetsai a kokwar-bi nengaʼa a vogwa mbiaʼa. Vogwa mbia sa, nasa mʼmetsi macecèwaʼa.

¹⁵ Ndo man ta ngots nzlembaɗ nengaʼa te ɗèlèwèr nshèffè ɓai, ta kalda a vogwa mbiaʼa.