Apocalypse 2 - Ma Zhiklè

Njè-ma a sam mpi ndohi Zhiklè te Ephése

¹ Winda na tsuvom mpi ndohi Zhiklè te kokwar Ephèse: Nengaʼa man bantihi tsaraɗ te ri mandi na, man a dè te va sam nfi vogwahi tsaraɗ, a goɗa ar haha:

² I sun skwi man ka giaʼa, a skwi man ka va na va ma, a nzhèr skwi a di ngaya, ara man ka cè ta ndohi ambaɓihiaʼa azɓai, a ka jkede ta ndohi man ta gaɗa: nga ndohi sak, a ka ngats ta te ncèkèlma, ta ndohi sak ka ɓai.

³ Ka zhèr skwi a dai, a ka zhüɓ skwi nʼnzalaʼa a géɗ nzlembaɗ ga, a ngeza ka ɓai.

⁴ Aman skwi man ambahay ɓai a sam ngaya, aman ka woy Zhiklè ara man ka hünko ka ɓai.

⁵ Hur sam man ka men ngaya a deɓa te pa, ngwode ndav ngaya, a ka gu skwi man ka gu nshèlèkura zaʼa. Man ɓai i shkè, a i cè skwi nfi vogwa ngaya auda a sam nʼnzi na.

⁶ Aman skwi man amba man ka ngotso, ka gi shèwa a ndohi Nicolaite, man iyè ba i gi shèwa a tengaʼa.

⁷ Ndo man zlembaɗ na a zhè, da tsena ma man Mèzhèɓ Zhiklè a gaɗa ta mpi ndohi Zhiklè: Ndo man nʼngaʼa a ngulaʼa, a da ndi wof nshèffè man a zhè a sam Bi Zhiklè mbelaʼa.

Njè-ma a sam mpi ndohi Zhiklè te Smyrne

⁸ Winda na tsuvom mpi ndohi Zhiklè te kokwar Smyrne: Nengaʼa man ndo nshè-lèkuraʼa, ndo nʼndikèma skwai, man te va nasa mʼmetsa, anai a zhè a nshèffè zaʼa, a goɗa ar haha:

⁹ I sun matakwan ngaya a ntèwèshè ngaya; aman ka ndo mèshèlè genè. I sun ndohi man ta derɗe ka, man ta gaɗa, nga ndohi Juif, aman ta ndohi Juif ka ɓai, ta ndohi gi njèngè ma Sadan.

¹⁰ Ka gu zlau matakwan man ka da sia ɓai! Na haha bi madzagai a da pe ta matrehiaʼa te ndev kinè a dangai, aman a jkédè kinè, a kin si matakwan mʼmèn kula. Nza a nlèɓèslè, ha ka metsi ngaya, a i da va ka mpèɗè gèɗ nshèffè.

¹¹ Ndo man zlembaɗ na a zhè, da tsena ma man Mèzhèɓ Zhiklè a gaɗa ta mpi ndohi Zhiklè: Ndo man nʼngaʼa a ngulaʼa, skwa a da dza na a sam mʼmetsi macecèwaʼa azɓai.

Njè-ma a sam mpi ndohi Zhiklè te Pergame

¹² Winda na tsuvom mpi ndohi Zhiklè te kokwar Pergame: nengaʼa man a ngots kafahi gwèsh wètwètèa, man a zli skwi te tsagi cèw, a goɗa ar haha.

¹³ I sun sam nʼnzi ngaya, sam nʼnzi bi Sadan a pa. Aman ka gshè va a iyè genè, ka tsakal ma a géɗ ncè-a-ndav ɓai, ko pats man ta keɗa Antipas, ndo malwuɗi ga nzuraʼa a sam kinè, a sam man Sadan a nzi a pa.

¹⁴ Aman skwi ngiɗè kètè ambahay ɓai a sam ngaya. Tengahia ngiɗè a sam ngaya ta gshè va a njè ma Balaam, man a gaɗa na Balak, da slafaɗama ta sak a ndohi Israel, a ta ndi vrai a ta gi mphömè.

¹⁵ Ka ba antanta ka ngots ndohi ngshè va a njè-ma Nicolaite.

¹⁶ Ngwode ndav ngaya, man ɓai i shkè tsam tsam, a i gi var a tengaʼa a kafahi gwèsh te ma ga.

¹⁷ Ndo man zlembaɗ na a zhè, da tsena ma man Mèzhèɓ Zhiklè a gaɗa ta mpi ndohi Zhiklè: Ndo man nʼngaʼa a ngulaʼa, i woya man i da va na manna nʼnghedaʼa, a i woya man i va na kwa nslekaɗaʼa, a deɓ kwa sa nzlembaɗ ngiɗè mɓuaʼa a zhè, ndo ngiɗè a sun nengaʼa ɓai, sèi nengaʼa man a ngots kwaʼa.

Njè-ma a sam mpi ndohi Zhiklè te Thyatire

¹⁸ Winda na tsuvom mpi ndohi Zhiklè te kokwar Thyatire: Kra Zhiklè man di nengaʼa a vècè ara nèʼèn vogwa, a sak nengaʼa a si di ara züdo guro, a goɗ ar haha:

¹⁹ I sun skwi man ka giaʼa, i sun mwoy-ndo ngaya, a ncè-a-ndav ngaya, ara man ka pi ndav a vna, a ka zhèr skwi a dai, ara man ka ngredèʼa auda. I suna, mizlinè man ka gu te deɓaʼa a fena mizlinè man ka gu nshèlèkuraʼa.

²⁰ Aman skwi man ambahay ɓai a sam ngaya, aman ka va na civèɗ a ngwoz Jézabel, man a hur a gaɗa i ngwoz nhadka ma, a njè ta ɓèlèlihi ga, a zlakede ta, aman ta gi mphömè, a ta ndi vrai.

²¹ I zhoro aman a di a ngwèdè ndav. Aman nengaʼa a woya a njèkeda mphömè na ɓai.

²² Na haha i da kaldahai a sam mʼmènè na, a ndohi man ta gu mphömè a vna i kalde ta a va matakwan mbiaʼa, sèi man ta woy a ta jèkeda mizlinè mphömè ngwoz sa kla.

²³ A i woya man i bazl ta wudahi ta. A mpi ndohi Zhiklè tèlèba sèi da suna, iyè man i wuzhè ndav, kala nguzgoz ba, a i va na a ndo staɗ staɗ te ndev kinè ara mizlinè na.

²⁴ Aman a sam kinè, njèkèɗi ndohi te Thyatire, man kin co njè-ma haha ɓai, kinè man kinè te verzi Sadan ɓai, i gaɗa kinè ar haha: I woya man a i ga kinè matakwan ngiɗè azɓai.

²⁵ Aman skwi man kin ngotso, va-ɓüro, ha i shkè.

²⁶ A ndo man nʼngaʼa a ngulaʼa, a ɓir mizlinè ga, ha ndikèma na, i woy a i va na wuɗi-bai a géɗ ndohi herkeda.

²⁷ A nengaʼa a da war ta a gada züdo, a da bazl ta ara shiɗèfihai.

²⁸ Lèmèlèmè i ngots te ri Bab ga. A i woy a i va na mavar prèk.

²⁹ Ndo man zlembaɗ na a zhè, da tsena ma man Mèzhèɓ Zhiklè a gaɗa ta mpi ndohi Zhiklè.